Ахборотлаштириш ва телекоммуникациялар соҳасида назорат инспекцияси раҳбариятининг сайёр қабули ўтказилди

Мамлакатимизда инсон манфаатлари олий қадрият даражасига кўтарилган. Бугун барча давлат идоралари фаолиятида аҳолининг мурожаатлари билан ишлаш бўйича сифат жиҳатидан мутлақо янги тизим яратилди. Жойларда ўтаётган сайёр қабуллар аҳолининг муаммоларини ҳал этишда, шак-шубҳасиз, кутилган натижаларни бермоқда. Зеро, давлатимиз раҳбари таъкидлаганидек, халқ давлат органларига эмас, балки давлат идоралари халқимизга хизмат қилиши керак.

Шу сабабли ҳам бугунги кунда юртимизда халқ билан фаол ва очиқ мулоқот олиб бориш, аввало инсоннинг ҳуқуқ ҳамда манфаатларини таъминлаш орқали халқимизнинг фаровон, бахтли ҳаёт кечириши учун кўплаб саъй-ҳаракатлар амалга оширилмоқда.

Жумладан, Республикамиз бўйлаб ўтказилаётган сайёр қабуллар жараёнида аҳолининг муаммолари ўрганилиб, кўплаб муаммолар ижобий ҳал этилишига эришилмоқда.

Жорий йилнинг 12 октябрь куни Амударё туманининг Олмазор маҳалласи ҳудудида жойлашган 82-сонли мактаб биносида Ахборотлаштириш ва телекоммуникациялар соҳасида назорат инспекцияси раҳбариятининг жисмоний ва юридик шахсларнинг бугунги кундаги соҳага оид муаммоларини ўрганиш ва уларни бартараф этиш мақсадида навбатдаги сайёр қабули ўтказилди.

Сайёр қабулда Ахборотлаштириш ва телекоммуникация технологиялари хизматларидан фойдаланишда истеъмолчилар ҳуқуқларини ҳимоя қилиш, соҳадаги муаммолар ва уларни бартараф этиш олиб борилаётган ишлар тўғрисида сўз юритилди.

Шунингдек туман аҳолисига замонавий телекоммуникация хизматларидан фойдаланиш имкониятларини кенгайтириш мақсадида телекоммуникация станциялар сони 6тага, оптик линияли терминал ускуналари сони 10тага ҳамда уларнинг умумий сиғими 18,3 минг рақамга етказилганлиги қайд этилди.

Шу йўналишда олиб борилган ишлар натижасида йил бошидан 274,7 километр масофада оптик толали алоқа линиялари қурилиб, умумий узунлиги 1 минг 249 километрга, кенг полосали портлар сони 6 минг 280тага оширилиб, уларнинг умумий сиғими 15 мингтага етказилди.

Телекоммуникация тармоқларини ривожлантириш билан бир қаторда туманда 240та ижтимоий соҳа объектларида интернет хизматларига уланиш имконияти яратилди. Жумладан, Халқ таълими бўлимларида 88та, мактабгача таълим ташкилотларида 51та, тиббиёт муассасаларида 15та, маҳалла ва овул бинолари учун 49та ҳамда профилактика инспекторларининг хизмат хоналарига 37та оптик толали алоқа линиялари ўрнатилди.

Шуни таъкидлаш жоизки, туманда мобил алоқа қамровини кенгайтириш ҳамда сифатини яхшилаш мақсадида 11та янги ва 18та таянч станциялар кенг полосали технологияларга модернизация қилинди.

Сайёр қабул иштирокчилардан келиб тушган мурожаатларнинг аксариятига қабул давомида масъул раҳбар ва ходимлар томонидан ҳуқуқий маълумот берилди, қолган мурожаатларни ўрнатилган тартибда ўрганиб чиқиб, ижобий ҳал қилиш учун назоратга олинди.

Шу билан бирга, “Ўзкомназорат” ташкилотининг узлуксиз ишлайдиган 1144 рақамли ишонч телефони ҳамда телеграмдаги “Алоқа назорат” гуруҳи орқали ҳам мурожаат йўллаш имкониятлари яратилганлиги ҳақида айтиб ўтди.

Туман ҳокимлиги Ахборот хизмати