OʻQUV MARKAZIDA XOTIN-QIZLAR TIKUVChILIK VA KASANAChILIKNI OʻRGANIShMOQDA
Bugungi kunda yurtimizda xotin-qizlarni qoʻllab-quvvatlash, ularni kasb-hunarga yoʻnaltirish, tadbirkorlikka keng jalb etishga alohida eʼtibor qaratilmoqda. Ayniqsa, manzilli daftarlarga kiritilgan, ishsiz ayol-qizlarning bandligini taʼminlash, tadbirkorlik faoliyatini yoʻlga qoʻyishga koʻmaklashish borasida qator amaliy ishlar bajarilmoqda.
Amudaryo tumanida ham ishsiz, kam taʼminlangan, ehtiyojmand xotin-qizlarga kasb-hunar oʻrgatish va ularni tadbirkorlikka yoʻnaltirish orqali bandligini taʼminlash maqsadida Navoiy nomli mahalla hududidagi sobiq Bandlikka koʻmaklashish markazi binosidan xona ajratilib, oʻquv markazi tashkil etildi va zaruriy jihozlari bilan taʼminlandi.
Mazkur oʻquv markazida bandligi taʼminlanmagan xotin-qizlar uchun qisqa muddatli bepul oʻquv kurslari tashkil etilgan. Tikuvchilik hamda kasanachilik yoʻnalishida xotin-qizlarga hunar oʻrgatish yoʻlga qoʻyilgan. Markazda hunar oʻrganish uchun tashrif buyurgan xotin-qizlarga “Tamara TEXTILE” tikuvchilik korxonasi rahbari, tadbirkor Tamara Yusupova tikish-bichish ishlarini, tadbirkor Raʼno Murodova esa dekorativ buyumlar, gullar yasashni oʻrgatmoqda.
Ayni paytda markazda hunar oʻrganayotgan ayol-qizlarga yetarli sharoitlar yaratilgan xonalarda mashgʻulotlar oʻtkazilmoqda. Ularga ayollar va erkaklar, bolalar kiyimlarini bichish, mavsumiy kiyimlarni tikish, mato tanlash, chokni mustahkamlab tikish kabilar boʻyicha yoʻl-yoʻriqlar berilib, tushunchalari mustahkamlanadi. Bezak yasashga qiziquvchi ayol-qizlarga ham gulqogʻoz tanlash, ranglardan, boʻyoqlardan foydalanish, gulbargchalar tayyorlash kabilar oʻrgatiladi. Oʻquv kursi yakunida tinglovchilarga masus sertifikatlar beriladi va kelgusida oʻz tadbirkorlik faoliyatini yoʻlga qoʻyishlarida amaliy yordam koʻrsatiladi.
Taʼkidlash joizki, ushbu oʻquv markazi Oʻzbekiston Respublikasi Prezidentining 2022-yil 21-sentyabrdagi “Xotin-qizlar bandligini oshirish va salomatligini mustahkamlashga oid qoʻshimcha chora-tadbirlar toʻgʻrisida” Qarori ijrosini taʼminlash maqsadida tashkil etildi. Prezident Qaroriga koʻra tashkil etilgan ushbu markazga tuman Oila va xotin-qizlar boʻlimi tomonidan ishsiz, ayniqsa, qishloq joylarda bola tarbiyasi bilan uyda oʻtirib qolgan ehtiyojmand ayollar, «Ayollar daftari»ga kiritilgan xotin-qizlarni jalb etishga alohida eʼtibor qaratilmoqda. Shuningdek, bunday ayollarning bandligini taʼminlash maqsadida ovul va mahallalarda tikuvchilik, qandolatchilik, pazandachilik kabi yoʻnalishlarda tadbirkorlik faoliyatini yoʻlga qoʻyishlariga yaqindan koʻmaklashilmoqda.
Ushbu markaz faoliyatining asosiy maqsadi ishsiz va band boʻlmagan aholini hududiy hamda mintaqaviy mehnat bozorida talab yuqori boʻlgan zamonaviy kasblarga oʻqitishdan iborat. Oʻtgan davr mobaynida oʻquv markazida 83 nafar xotin-qizlar tikuvchilik yoʻnalishida kasb-hunar oʻrganib, sertifikatlarga ega boʻlishdi. Hozirgi paytda shundan 10 nafari oʻz uyida tikuvchilik tsexini tashkil etdi. Shuningdek, koʻplab ayol-qizlar dekorativ buyumlar va turli gullar, savatlar, chiroqlar yasashni oʻrganishdi va elimizning toʻy-bazmlarida xonadonlarini bezaklar bilan bezab, xizmat koʻrsatishni yoʻlga qoʻyishdi.
Kelgusida ushbu oʻquv markazida boshqa yoʻnalishlar boʻyicha ham oʻquv kurslarini tashkil etish rejalashtirilgan boʻlib, ularga chekka hududlardagi ayol-qizlarni koʻproq jalb etish maqsad qilingan. Bu kabi amaliy ishlar tumanda ayol-qizlarning hunar oʻrganishlarida, oʻz-oʻzini ish bilan band qilishi, shu hunarlari orqali doimiy daromadga ega boʻlishlarida muhim ahamiyat kasb etadi.
O.Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
