Manzilli qoʻllab-quvvatlash daftarlariga kiritilgan xotin-qizlarga boʻsh ish oʻrinlari haqida maʼlumot berildi

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti Qoraqalpogʻiston Respublikasi Joʻqorgʻi Kengesi huzuridagi Jamoat fondi tomonidan moliyalashtirilgan “Besh tashabbus – besh imkoniyat!” nomli grant loyihasi doirasida tuman aholisining maʼnaviyatini yuksaltirish, isteʼdodli yoshlarni yuzaga chiqarish, ommaga tanishtirish, yoshlarni turli zararli illatlardan ishonchli himoya qilish borasida keng koʻlamli ishlarni amalga oshirib kelmoqda. Bunda ayniqsa manzilli qoʻllab-quvvatlash daftarlariga kiritilgan yoshlarni, maktab oʻquvchilarini, ayollarni loyiha doirasidagi tadbirlarga keng jalb qilishga eʼtibor qaratilmoqda.

Prezidentimiz tomonidan ilgari surilgan Besh muhim tashabbusni yoshlar hayotiga yanada kengroq tatbiq qilish maqsadida maktablarda kompyuter texnologiyasi boʻyicha ochiq darslar, insholar tanlovlari, sport tadbirlari, “Kitoblar karvoni” aktsiyalari oʻtkazilib, oʻquvchilar ishtirokida tarixiy joylarga sayohatlar uyushtirilmoqda.

Beshinchi tashabbus doirasida manzilli qoʻllab-quvvatlash daftarlariga kiritilgan xotin-qizlarni ish bilan taʼminlashga koʻmaklashish maqsadida ularning Aholi bandligiga koʻmaklashish markazi hamda vakant ish oʻrni mavjud boʻlgan muassasa, korxona va tashkilotlar rahbarlari bilan uchrashuvlarni tashkil qilinmoqda. Grant loyihasi doirasida Beruniy nomli mahalla aholisi bilan oʻtkazilgan uchrashuv ham shular jumlasidandir.

Uchrashuvni mahalla fuqarolar yigʻini xotin-qizlar faoli Mahfuza Ibrohimova kirish soʻzi bilan ochdi. Hozirgi kunda tuman boʻyicha 5365 nafar ayol-qizlar “Ayollar daftari”ga kiritilgan boʻlsa, ularning 70-80 foiziga har tomonlama yordamlar koʻrsatilgan. Beruniy nomli mahalla fuqarolar yigʻinida esa 110 nafar ayol-qizlar “Ayollar daftari”ga kiritilgan boʻlib ularning 95 foiziga ijtimoiy-yordamlar koʻrsatilgan. Ularning koʻpchiligiga ishsizlik nafaqasi tayinlangan. 5 nafar ayolning uy ijara haqi toʻlab berilgan. Koʻpchilik ayol-qizlarga bir martalik yordam koʻrsatilgan. Ayol-qizlarning ish bilan bandligini taʼminlash maqsadida tikuvchilik, konditer mahsulotlari ishlab chiqarishga jalb qilingan. Kompyuter savodxonligi, mono markaz tashkil qilingan.

Uchrashuvda “Taraqqiyot koʻzgusi” gazetasi muxbiri Ozoda Xudoyberganova tumanimizda ayol-qizlarga nisbatan koʻrsatilayotgan katta eʼtibor haqida gapirdi. “Jayxun ilhomlari” nodavlat notijorat tashkiloti raisi Oʻrozali Reyimov bu yoʻnalishda xizmat qiluvchi tashkilotlar tomonidan olib borilayotgan ishlarga alohida toʻxtalib oʻtdi.

Tuman kambagʻallikni qisqartirish va bandlikka koʻmaklashish markazi mutaxassislari Shaxnoza Yusupova, Mohira Ozodboyevalar esa tumanda ayol-qizlar bandligini taʼminlash borasida olib borilayotgan ishlar haqida axborot berib, uchrashuv ishtirokchilarining savollariga javob berdilar.

Uchrashuv qatnashuvchilari tumanimizda hozirgi kunda kambagʻallikni qisqartirish va bandlikka koʻmaklashish borasida amalga oshirilayotgan ishlardan boxabar boʻlib, kelgusida oʻzlariga mos ish oʻrinlariga joylashish boʻyicha masʼullardan maslahatlar oldilar.

Oʻrozali REYIMOV.