OChIQ DARS OʻTKAZILDI

Butun mamlakatimiz boʻylab maktab oʻquvchilarining har tomonlama bilimli, zehnli, zamonaviy taʼlim texnologiyalaridan unumli foydalana oluvchi avlod boʻlib yetishuvi uchun katta eʼtibor qaratilmoqda. Yosh avlod zamonaviy maktablarda, zamonaviy oʻquv qurollaridan foydalangan holda taʼlim-tarbiya olmoqda.

Mamlakatimiz Prezidenti tomonidan yoshlar maʼnaviyatini yuksaltirish va ularning boʻsh vaqtini mazmunli tashkil etish boʻyicha 5 ta muhim tashabbus eʼlon qilingan edi. Birinchi ­­­– tashabbus yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirishga, isteʼdodini yuzaga chiqarishga xizmat qiladi. Ikkinchi tashabbus esa yoshlarni jismoniy chiniqtirish, ularning sport sohasida qobiliyatini namoyish qilishlari uchun zarur sharoitlar yaratishga yoʻnaltirilgan. Uchinchi tashabbus doirasida aholi va yoshlar oʻrtasida kompyuter texnologiyalari va internetdan samarali foydalanishni tashkil etishga eʼtibor qaratiladi. Toʻrtinchi tashabbus yoshlar maʼnaviyatini yuksaltirish, ular oʻrtasida kitobxonlikni keng targʻib qilish boʻyicha tizimli ishlarni tashkil qilishga yoʻnaltirilgan boʻlsa, beshinchi tashabbus xotin-qizlarni ish bilan taʼminlash masalalarini nazarda tutadi.

Respublikamizning barcha joylarida ana shu muhim besh tashabbus doirasida vazifalarni amalga oshirish uchun muhim loyihalar amalga oshirilib, amaliy ishlar olib borilmoqda.

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti tomonidan amalga oshirilayotgan, “Besh tashabbus ­– besh imkoniyat!” nomli loyiha asosida aholining maʼnaviyatini yuksaltirish, yoshlarning isteʼdodlarini yuzaga chiqarish, ularni turli zararli illatlardan ishonchli himoya qilish uchun tashkilotlarda, ovul va mahalla fuqarolar yigʻinlarida, maktablarda turli tadbirlar, uchrashuvlar, davra suhbatlari oʻtkazib kelinmoqda.

Yaqinda loyiha doirasida Prezidentimiz tomonidan eʼlon qilingan besh muhim tashabbusning uchinchi tashabbusi doirasida Nazarxon ovuli hududida yashovchi yoshlar uchun 3-sonli maktabda “Kompyuter texnologiyalari va internetdan samarali foydalanish” mavzusida ochiq dars oʻtkazildi.

Aytish joizki, Nazarxon ovuli hududida joylashgan ushbu maktabda yuqori malakali ikki nafar mutaxassis oʻqituvchi informatika fanidan oʻquvchilariga saboq beradi. Zamonaviy sinfxonalarda bilim olayotgan yoshlar ustozlari Qirmizi Kamolova, Gulshod Reypnazarovalardan kompyuter texnologiyalari va internetdan samarali foydalanish sirlarini puxta oʻrganmoqdalar.

Loyihaning asosiy maqsadi manzilli qoʻllab-quvvatlash daftarlariga kiritilgan yoshlarga har tomonlama yordam koʻrsatishdir. Loyiha doirasida “Taraqqiyot koʻzgusi”, “Mening oilam” gazetalari va Amudaryo televideniyesi tahririyatlari bilan hamkorlikda oʻtkazilayotgan tadbirlar oʻzining juda katta samarasini bermoqda.

Tashkilot tomonidan loyiha asosida maktab oʻquvchilari oʻrtasida “Men havas qiladigan badiiy qahramon”, “Orol – mening taqdirimda”, “Navroʻz – umumxalq bayrami”, “Mustaqillik – oliy neʼmat” mavzularida insholar tanlovlari, “Ranglarda vatan manzaralari” mavzusida rasmlar tanlovi eʼlon qilinib, tanlov gʻoliblari sovgʻalar, “Faxriy yorliq”lar bilan taqdirlandi. Tumanning olis hududlarida yashovchi yoshlar uchun teatr tomoshalari, kontsertlar, “Kitoblar karvoni” tashkil etildi.

Maktabda besh muhim tashabbus doirasida turli tadbirlar tashkil qilib kelinmoqda. Jumladan, uchinchi tashabbus doirasida ham kompyuter texnologiyalari vositasida turli musobaqalar, ochiq darslar oʻtkazilmoqda. Zero, hozirgi hayotimizni kompyuter texnologiyalarisiz tasavvur qilish qiyin. Shuning uchun ham maktab oʻquvchilari kompyuter saboqlarini astoydil oʻrganmoqdalar.

Oʻtkazilgan ochiq dars mobaynida maktab oʻquvchilari informatika fani sirlarini puxta egallayotganligini yana bir bor namoyish qildilar.

Oʻrozali REYIMOV