“BESh MUHIM TAShABBUS – YoShLARGA QANOT” NOMLI GRANT LOYIHASI DOIRASIDA OChIQ DARS MAShGʻULOTLARI OʻTKAZILDI

“Mening oilam” gazetasi tahririyatining “Besh muhim tashabbus – yoshlarga qanot” nomli grant loyihasi doirasida yoshlar beshta tashabbus doirasidagi tadbirlarga jalb etilib kelinmoqda. Ushbu grant loyihasi rejasiga koʻra,  loyiha ijrochisi Ozoda Xudoyberganova tomonidan 76-sonli maktabda Toshyop ovuli hududidagi yoshlar uchun “Kompyuter texnologiyalari va internetdan samarali foydalanish” mavzusida ochiq dars tashkil etildi.

Dars mashgʻuloti davomida maktabning informatika fani oʻqituvchisi Dilfuza Boltayeva kompyuter texnologiyalari va internetdan samarali foydalanish yuzasidan tushunchalar berdi.

Undan tashqari, yoshlarga “Google” qidiruv tizimidan foydalanish, “ZiyoNET” va ADU.UZ elektron kutubxonasidan foydalanish boʻyicha amaliy koʻnikmalar berilib, tushunchalari kengaytirildi. Kompyuter texnologiyalaridan foydalanish koʻnikmalarini rivojlantirish boʻyicha amaliy mashgʻulot ham oʻtkazilib, yoshlar dars davomida olgan bilimlarini amalda sinab koʻrdilar.

Ochiq dars davomida mavzu yuzasidan savol-javob oʻtkazildi va yoshlar oʻz bilimlarini mustahkamlab oldilar.

Qipchoq ovulida joylashgan 11-sonli maktabda ham hudud yoshlari uchun “Kompyuter texnologiyalari va internetdan samarali foydalanish” mavzusida ochiq dars oʻtkazildi. Ushbu tadbirga hududning nogironligi boʻlgan yoshlari va maktab oʻquvchilari qamrab olindi.

Ochiq darsni loyiha ijrochilaridan biri Oygul Rajabova boshlab berdi va kompyuter texnologiyalari va internetning hayotimizdagi tutgan oʻrni, undan samarali foydalanish yuzasidan maʼruza qildi.

Shundan soʻng, maktabning informatika fani oʻqituvchisi Gulchehra Qurbonboyeva oʻquvchilarga kompyuter texnologiyasidan taʼlim olishda, ishlab chiqarish jarayonida foydalanish yoʻl-yoʻriqlari haqida keng tushunchalar berdi.

Maktab direktorining oʻquv ishlari boʻyicha oʻrinbosari Matluba Qurboniyozova oʻquvchilarning kompyuter savodxonligini sinovdan oʻtkazish boʻyicha savol-javoblar oʻtkazdi.

Ochiq dars jarayonida oʻquvchilarning zamonaviy axborot-kommunikatsion texnologiyalarini puxta egallayotganliklari yaqqol namoyon boʻldi.