HOKIM YoRDAMChISI EHTIYoJMAND OILALARGA QOʻY-EChKI OLIShGA YoRDAM BERDI

Oʻzbekiston Respublikasi Prezidentining 2021-yil 3-dekabrdagi 29-sonli Farmoniga muvofiq, respublikamizning har bir mahallasida hokim yordamchilari lavozimi tashkil qilingan edi.

Aholining tadbirkorlik tashabbuslarini amalga oshirishga moliyaviy koʻmaklashish, ularning daromadli mehnat bilan bandligini taʼminlash mexanizmlarini yanada takomillashtirish, mahallabay ishlash tizimini yangi bosqichga olib chiqish orqali kambagʻallikni qisqartirish hokim yordamchilarining asosiy vazifalaridan sanaladi.

Akbar Xoʻjamuratov ham boshqa hamkasblari qatori tumandagi Bosuv mahallasida hokim yordamchisi boʻlib ish boshladi. Ish faoliyatining birinchi kunidan davlat siyosatini mahallagacha tushirish, aholi bandligini taʼminlash, ularning daromadini koʻpaytirish, tadbirkorlikni rivojlantirish, shu orqali kambagʻallikni qisqartirishni oʻziga bosh maqsad qilib oldi.

Akbar Xoʻjamuratov mahalladagi har bir xonadonning, shuningdek, har bir fuqaroning yashash sharoitini uyma-uy yurish orqali oʻrganish, mahallada muvaffaqiyatga erishgan tadbirkorlar va mahalla faollari bilan hamkorlikda ishlash va doimiy fikr almashish vazifalarni toʻgʻri belgilashda deb biladi.

Shuningdek u oʻz tadbirkorlik faoliyatini boshlagan, kengaytirmoqchi boʻlganlarga koʻmaklashish, bilim va koʻnikmaga ega boʻlmagan fuqarolarni oʻquv kurslarida oʻqitish, ishsiz aholini ish bilan band qilib, oilalar daromadini koʻtarish, oilaviy tadbirkorlik dasturlari doirasida imtiyozli kreditlar olish kabi ishlarga koʻmaklashib kelmoqda.

Jumladan, hokim yordamchisining amaliy koʻmagi bilan mahallada “Bosuv qoʻy-echki junlarini yetishtirish kooperatsiyasi” tashkil etildi. Unga mahalladagi 62 nafar ishsiz fuqarolar aʼzo qilindi. Shuningdek, kooperatsiya aʼzolarining bandligini taʼminlash maqsadida yaqinda mahallada yashovchi 15 nafar fuqaroga qoʻylar olib berildi.

Hokimi yordamchisi oʻz zimmasiga yuklatilgan vazifalardan tashqari, har bir fuqaro muammolarini tinglash, ularni hal qilish, ijtimoiy koʻmaklashish, nogironligi bor va ijtimoiy qiynalgan aholi qatlamidan doimiy xabar olib turish kabi ishlarni sidqidildan bajarib kelmoqda.

Hokim yordamchisining saʼy-harakatlari bilan oʻtgan davr mobaynida mahallada yashovchi 730ta xonadon xatlovdan oʻtkazilib, ular ijtimoiy-iqtisodiy sharoitiga qarab toifalarga ajratib olindi. Xatlov natijalariga koʻra mahalladagi ishsizlarning bandligini taʼminlash, ularning turmush sharoitini yaxshilash boʻyicha bir qancha ishlarni amalga oshirdi.

Jumladan, 2022-yilda 86 nafar fuqaroga kredit berish, 7 nafar fuqaroni kasb-hunarga oʻqitish, 128 nafar fuqaroning oʻzini-oʻzi band qilishi, 87 nafar fuqarolarga yer ajratish, 174 nafar fuqaroni doimiy va mavsumiy ishlarga joylashtirish, 11 nafar fuqaroga subsidiyalar ajratish orqali yuzlab fuqarolarning bandligi taʼminlandi.

Joriy yilning 9 oyi davomida esa mahalladagi 120 nafar fuqaroga kredit berish orqali tadbirkorlikka yoʻnaltirish, 19 nafar fuqaroni kasb-hunarga oʻqitish, 81 nafar fuqaroning oʻzini-oʻzi band qilishi, 2 nafar fuqaroga yer ajratish, 121 nafar fuqaroni doimiy va mavsumiy ishlarga joylashtirish va 22 nafar fuqaroga subsidiya ajratish orqali yana koʻplab yurtdoshlarimizning bandligi taʼminlandi. Bundan tashqari, mahallada yangi tadbirkorlik subʼektlarining soni yana 10taga koʻpayishida ham hokim yordamchisining hissasi bor.

Albatta, amalga oshirilayotgan bu kabi ishlar mahalladagi kam taʼminlangan oilalarning daromadlari oshishida muhim vosita boʻladi.

Sevara Ismoilova