ShOIR VA YoZUVChILAR BILAN UChRAShUV KOʻNGILLARGA ZAVQ-ShAVQ BAGʻIShLADI

Mahallalarda, oilalarda ijtimoiy-maʼnaviy muhit barqarorligiga salbiy taʼsir koʻrsatuvchi holatlar, ayniqsa, oʻsib kelayotgan yosh avlodni turli yot gʻoyalardan himoya qilish, yoshlarning dunyoqarashini va maʼnaviyatini yuksaltirish, yoshlar oʻrtasida kitobxonlikni yanada ommalashtirish, Prezidentimiz tomonidan ilgari surilgan beshta muhim tashabbusni eng chekka qishloqlar yoshlari oʻrtasida yanada keng va faol ommalashtirish maqsadida www.amunews.uz veb-sayti tahririyati tomonidan amalga oshirilayotgan “Sogʻlom muhit – sogʻlom hayot” grant loyihasi doirasidagi tadbirlar joylarda munosib kutib olinmoqda. Quvonarlisi shundaki, mazkur loyiha ijodkorlari tomonidan tashkillashtirilayotgan maʼnaviy-maʼrifiy tadbirlar, turli soha masʼullari, mahallalardagi koʻpni koʻrgan nuroniylar, ijodkorlar ishtirokidagi uchrashuvlar, davra suhbatlarida yoshlar tarbiyasi bilan bogʻliq muammolar roʻy-rost tilga olinib, bu muammolarni bartaraf etish choralari koʻrilmoqda. Shuningdek, ijodkorlar bilan uchrashuvlarda olis qishloqlarda yashayotgan, ijodga moyil yoshlar ham kashf etilib, ularning ijod namunalari amunews.uz veb-saytida va “Taraqqiyot koʻzgusi”, “Mening oilam” gazetalarida yoritib borilmoqda.

Ana shunday uchrashuv tadbiri joriy yilning 20-sentyabr sanasida “Jayxun ilhomlari” NNTda ham oʻtkazildi. www.amunews.uz veb-sayti ijodiy jamoasi bilan “Jayxun ilhomlari” NNT hamkorligida oʻtkazilgan ushbu maʼnaviy-maʼrifiy tadbirda Amudaryo tumanida yashab, ijod etayotgan ijodkorlar, “Turmush chorrahalarida” turkum hayotiy hikoyalari hamda lirik sheʼrlari bilan adabiyot ixlosmandlariga yaqindan tanish boʻlgan Zuhra Ahmedova, Oʻzbekiston Jurnalistlari ijodiy Uyushmasi aʼzosi, “Jayxun ilhomlari” NNT raisi, shoir Oʻrozali Reyimov hamda “Barkamol avlod” bolalar maktabi va 40-sonli maktabning sheʼriyatga ixlosmand oʻquvchi-yoshlari ishtirok etishdi.

Uchrashuv tadbirini Oʻzbekiston Jurnalistlari ijodiy Uyushmasi aʼzosi, “Jayxun ilhomlari” NNT raisi, shoir Oʻrozali Reyimov ochdi va www.amunews.uz veb-sayti ijodiy jamoasi tomonidan amalga oshirilayotgan “Sogʻlom muhit – sogʻlom hayot” grant loyihasi doirasidagi tadbirlarning mahallalarda, oilalarda ijtimoiy-maʼnaviy muhit barqarorligini taʼminlashdagi, shuningdek, maʼnan yetuk insonlarni tarbiyalash, aholi keng qatlamlari, ayniqsa, yoshlar oʻrtasida kitobxonlikni yanada rivojlantirishdagi ahamiyati xususida toʻxtaldi. Shundan soʻng, “Sogʻlom muhit – sogʻlom hayot” grant loyihasining maqsadi va undan kutilayotgan natijalar toʻgʻrisida loyiha ijodkorlaridan biri, jurnalist Robiya Yoʻldosheva batafsil maʼlumot berdi.

Uchrashuv tadbiri davomida Oʻzbekiston Jurnalistlari ijodiy uyushmasi aʼzosi, shoir Oʻrozali Reyimov ijod mashaqqati haqida va adabiyotning inson hayotida tutgan oʻrni xususida soʻz yuritib, oʻzining ijodiy faoliyati davomida erishgan yutuqlari, hayotidagi sinovlarni yengib oʻtishda adabiyotdan, ijoddan kuch olgani toʻgʻrisida soʻzlab berdi. U oʻz ijodidan namunalar oʻqib berdi.

Sheʼr oʻqish navbati Zuhra Ahmedovaga berilganida uchrashuv ishtirokchilari Zuhraning hayotiy hikoyalari haqiqiy turmush lavhalari ekanligini eʼtirof etishib, olqishladilar.

Tadbir davomida “Barkamol avlod” bolalar maktabi va 40-sonli maktabning iqtidorli oʻquvchilari ham oʻzlarining ona Vatan, doʻstlik, ona, tinchlik mavzusidagi sheʼrlaridan oʻqib berishdi.

Amudaryo tumanida yashab, ijod etayotgan qalamkashlar bilan yoshlarning uchrashuvi biri-biridan yoqimli taassurotlarga boy, qiziqarli, samimiy muloqot va sheʼrxonlik kechasiga aylanib ketdi va tadbir barchaga zavq-shavq bagʻishladi.

Robiya YOʻLDOShEVA