“YaNGI HAYoT UChUN, YaNGI OʻZBEKISTON UChUN!” BOSh GʻOYa ASOSIDA BAYRAMOLDI TADBIRLAR BOʻLIB OʻTMOQDA

Xalqimiz xush koʻrib nishonlaydigan bayramlar koʻp. Ayniqsa, Mustaqillik bayrami har bir xonadonga fayz-u tarovat, koʻngillarga zavq bagʻishlagani bilan yanada qadrli. Istiqlol, hurlik shukuhi ufurib turgan yurtimizning har bir goʻshasida ushbu eng ulugʻ va eng aziz kunni munosib kutib olish uchun qizgʻin taraddudlar koʻrilishi ham shundan.

Pishiqchilik fasli – soʻlim yoz neʼmatlarining barchasini oʻzida mujassam etgan fayzli dasturxonlar atrofida  jam boʻlgan nuroniy otaxon va onaxonlar el-yurtga tinchlik, omonlik tilab, duoga qoʻl ochadilar. Oilalar davrasida boshlangan bayramona kayfiyat mahallaga, xalq jam boʻlgan katta davralarga koʻchadi. Hurlik, obodlik  tuygʻularini birgalikda baham koʻrishga ne yetsin!

Amudaryoliklar Istiqlol bayrami tantanalarini ana shunday hamjihatlikda, juda erta boshlab yuborishga odatlanishgan.

“Yangi hayot uchun. Yangi Oʻzbekiston uchun!” bosh gʻoya asosida “Har bir kun – bu imkoniyat, har bir kun – bu kelajak uchun poydevor” shiori ostida Amudaryo tumanining  har bir ovul va mahallasida boʻlib oʻtayotgan Mustaqillikning 32 yilligiga bagʻishlangan bayram tadbirlarida xalqimiz shodiyonalik bilan ishtirok etishmoqda.

Ana shunday bayram tadbirlaridan biri joriy yilining 17-avgust sanasida Mangʻit shahrining Boyovul mahallasida ham oʻtkazildi.

Bayram tadbirida 34-sonli Amudaryo tuman Madaniyat markazi sanʼatkorlari tomonidan namoyish etilgan kontsert dasturi ishtirokchilarga xush kayfiyat baxsh etdi.

Bayramoldi adabiy-musiqiy tadbirda xushovoz xonanda Murodjon Ibragimov rahbarligidagi xalqimiz sevgan taniqli sanʼatkorlar ishtirokidagi kontsert dasturi namoyish etildi. Ayniqsa, Rinat Saparboyev, Xayrulla Habibullayevlar ijrosidagi qoʻshiq va masxarabozlik sanʼati oʻyinlari barchaga manzur boʻldi.

Tadbir davomida boyovullik yoshlar joʻshqin kuy-qoʻshiqlarga raqsga tushib, miriqib dam oldilar.

“Yangi hayot uchun, Yangi Oʻzbekiston uchun!” bosh gʻoyasini oʻzida mujassam etgan bayramoldi adabiy-musiqiy tadbir 19-avgust kuni Qilichboy ovuli va Ayoqchi mahallasi aholisi ishtirokida ham oʻtkazildi.

“Har bir kun – bu imkoniyat, har bir kun – bu kelajak uchun poydevor” shiori  ostida qilichboyliklar davrasida oʻtkazilgan mazkur tadbirda 40-sonli “Amu sadosi” madaniyat markazi sanʼatkorlari tomonidan tayyorlangan kontsert dasturi namoyish etildi. Z.Yoʻldoshev masʼulligida tashkillashtirilgan adabiy-musiqiy  tadbirda sanʼatkorlar tomonidan ijro etilgan kuy-qoʻshiqlar barchaga xush kayfiyat bagʻishladi. Qilichboylik va Ayoqchi mahallalik yoshlar 40-sonli “Amu sadosi” madaniyat markazi sanʼatkorlarining biri-biridan yoqimli kuy-qoʻshiqlarini tinglab, maʼnaviy oziq oldilar, oʻzlari ham joʻr boʻlib kuylashib, raqsga tushdilar.

Shuningdek, Mustaqillik gʻoyalarini, ona Vatan, tinchlik va doʻstlikni, millatlararo totuvlikni madh etuvchi bayramoldi musiqiy tadbiri 22-avgust kuni Choykoʻl ovulidagi 36-sonli “Ofarin” madaniyat markazida yanada joʻshqinlik bilan davom etdi. Markaz rahbari B.Rajabov boshchiligida tashkillashtirilgan bayram tadbirida choykoʻllik nuroniylar va yoshlar, bolajonlar miriqib hordiq chiqardilar.

Boʻlib oʻtayotgan bayram tadbirlarida amudaryolik hunarmandlar tomonidan tayyorlangan hunarmandchilik sanʼati namunalari, hududlar aholisi hayoti haqida hikoya qiluvchi koʻrgazmalar tashkil etilib, bu koʻrgazmalarni tomosha qilgan xalqimiz maʼnaviy oziq olishmoqda.

Mustaqillikning 32 yilligiga bagʻishlangan bu kabi adabiy-musiqiy tadbirlar Amudaryo tumanining barcha qishloq va mahallalari boʻylab davom ztmoqda.

Robiya YOʻLDOShEVA.