“ЯНГИ ҲАЁТ УЧУН, ЯНГИ ЎЗБЕКИСТОН УЧУН!” БОШ ҒОЯ АСОСИДА БАЙРАМОЛДИ ТАДБИРЛАР БЎЛИБ ЎТМОҚДА
Халқимиз хуш кўриб нишонлайдиган байрамлар кўп. Айниқса, Мустақиллик байрами ҳар бир хонадонга файз-у тароват, кўнгилларга завқ бағишлагани билан янада қадрли. Истиқлол, ҳурлик шукуҳи уфуриб турган юртимизнинг ҳар бир гўшасида ушбу энг улуғ ва энг азиз кунни муносиб кутиб олиш учун қизғин тараддудлар кўрилиши ҳам шундан.
Пишиқчилик фасли – сўлим ёз неъматларининг барчасини ўзида мужассам этган файзли дастурхонлар атрофида жам бўлган нуроний отахон ва онахонлар эл-юртга тинчлик, омонлик тилаб, дуога қўл очадилар. Оилалар даврасида бошланган байрамона кайфият маҳаллага, халқ жам бўлган катта давраларга кўчади. Ҳурлик, ободлик туйғуларини биргаликда баҳам кўришга не етсин!
Амударёликлар Истиқлол байрами тантаналарини ана шундай ҳамжиҳатликда, жуда эрта бошлаб юборишга одатланишган.
“Янги ҳаёт учун. Янги Ўзбекистон учун!” бош ғоя асосида “Ҳар бир кун – бу имконият, ҳар бир кун – бу келажак учун пойдевор” шиори остида Амударё туманининг ҳар бир овул ва маҳалласида бўлиб ўтаётган Мустақилликнинг 32 йиллигига бағишланган байрам тадбирларида халқимиз шодиёналик билан иштирок этишмоқда.
Ана шундай байрам тадбирларидан бири жорий йилининг 17 август санасида Манғит шаҳрининг Бойовул маҳалласида ҳам ўтказилди.
Байрам тадбирида 34-сонли Амударё туман Маданият маркази санъаткорлари томонидан намойиш этилган концерт дастури иштирокчиларга хуш кайфият бахш этди.
Байрамолди адабий-мусиқий тадбирда хушовоз хонанда Муроджон Ибрагимов раҳбарлигидаги халқимиз севган таниқли санъаткорлар иштирокидаги концерт дастури намойиш этилди. Айниқса, Ринат Сапарбоев, Хайрулла Ҳабибуллаевлар ижросидаги қўшиқ ва масхарабозлик санъати ўйинлари барчага манзур бўлди.
Тадбир давомида бойовуллик ёшлар жўшқин куй-қўшиқларга рақсга тушиб, мириқиб дам олдилар.
“Янги ҳаёт учун, Янги Ўзбекистон учун!” бош ғоясини ўзида мужассам этган байрамолди адабий-мусиқий тадбир 19 август куни Қиличбой овули ва Аёқчи маҳалласи аҳолиси иштирокида ҳам ўтказилди.
“Ҳар бир кун – бу имконият, ҳар бир кун – бу келажак учун пойдевор” шиори остида қиличбойликлар даврасида ўтказилган мазкур тадбирда 40-сонли “Аму садоси” маданият маркази санъаткорлари томонидан тайёрланган концерт дастури намойиш этилди. З.Йўлдошев масъуллигида ташкиллаштирилган адабий-мусиқий тадбирда санъаткорлар томонидан ижро этилган куй-қўшиқлар барчага хуш кайфият бағишлади. Қиличбойлик ва Аёқчи маҳаллалик ёшлар 40-сонли “Аму садоси” маданият маркази санъаткорларининг бири-биридан ёқимли куй-қўшиқларини тинглаб, маънавий озиқ олдилар, ўзлари ҳам жўр бўлиб куйлашиб, рақсга тушдилар.
Шунингдек, Мустақиллик ғояларини, она Ватан, тинчлик ва дўстликни, миллатлараро тотувликни мадҳ этувчи байрамолди мусиқий тадбири 22 август куни Чойкўл овулидаги 36-сонли “Офарин” маданият марказида янада жўшқинлик билан давом этди. Марказ раҳбари Б.Ражабов бошчилигида ташкиллаштирилган байрам тадбирида чойкўллик нуронийлар ва ёшлар, болажонлар мириқиб ҳордиқ чиқардилар.
Бўлиб ўтаётган байрам тадбирларида амударёлик ҳунармандлар томонидан тайёрланган ҳунармандчилик санъати намуналари, ҳудудлар аҳолиси ҳаёти ҳақида ҳикоя қилувчи кўргазмалар ташкил этилиб, бу кўргазмаларни томоша қилган халқимиз маънавий озиқ олишмоқда.
Мустақилликнинг 32 йиллигига бағишланган бу каби адабий-мусиқий тадбирлар Амударё туманининг барча қишлоқ ва маҳаллалари бўйлаб давом зтмоқда.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
