AMUDARYoDA GʻALLA EKISh IShLARI BOShLANDI

Oʻlkamizda yoz fasli oxirlab bormoqda. Bunday paytda dehqonlarimiz gʻoʻza parvarishining oxirgi agrotexnik tadbirlarini nihoyasiga yetkazish, paxta yigʻim-terimiga tayyorgarlik koʻrish bilan bir qatorda kelgusi yil hosili uchun bugʻdoy ekish ishlarini ham amalga oshirishadi.

Ekishning sifatli ado etilishi urugʻlarning bexato unub chiqishini va kelgusi yilda moʻl hosil berishini taʼminlaydi. Shuning uchun ham bu ishga masʼuliyat bilan qaraladi.

 16-avgust kuni kelgusi yil hosili uchun kuzgi gʻalla ekishga puxta tayyorgarlik koʻrish maqsadida tumanning Oʻrta qala ovuli hududida faoliyat yurituvchi «Yusufxoʻja» fermer xoʻjaligi dalasida gʻalla ekish boʻyicha koʻrgazmali seminar boʻlib oʻtdi.

Seminarda Qoraqalpogʻiston Respublikasi Vazirlar Kengashi Raisi Farhod Ermanov, Oʻzbekiston Respublikasi Qishloq xoʻjaligi vaziri oʻrinbosari Botir Togʻayev, Qoraqalpogʻiston Respublikasi Joʻqorgʻi Kengesi vakili Axmet Ibragimov, Qoraqalpogʻiston Respublikasi Vazirlar Kengashi raisi oʻrinbosari Daryabay Qaypov, Qoraqalpogʻiston Respublikasi Qishloq xoʻjaligi vaziri oʻrinbosari Fozil Nurmuhamedov hamda tuman sektor rahbarlari, tuman hokimining qishloq va suv xoʻjaligi masalalari boʻyicha oʻrinbosari Murod Erjanov va sohaga masʼullari, fermerlar ishtirok etishdi.

Seminarda Qoraqalpogʻiston Respublikasi Vazirlar Kengashi Raisi Farhod Ermanov soʻzga chiqib, bu yilgi gʻallani sifatli va oʻz vaqtida ekish, mavsumni uyushqoqlik bilan oʻtkazish, shu bilan bir qatorda ekish mavsumidagi barcha chora-tadbirlarni oʻz vaqtida amalga oshirish yuzasidan tegishli soha vakillariga topshiriqlar berdi.

Gʻalladan yuqori va sifatli hosil olishning asosiy garovi – bu yerni ekishga sifatli tayyorlash, hududning tuproq-iqlim sharoitlarini inobatga olib nav tanlash, sifatli urugʻlik ekish muddati va meʼyorlariga rioya qilish, gʻalla nihollarini toʻliq undirib olish hamda oʻz muddatida parvarishlashdan iborat ekanligi seminar davomida alohida taʼkidlab oʻtildi.

Shuningdek, yuz berayotgan iqlim oʻzgarishlarini inobatga olgan holda, qishloq xoʻjaligi maydonlariga erta ishlov berish, ekin ekiladigan maydonlarni tayyorlash va bugʻdoy urugʻlarini kechiktirmasdan ekish zarurligi soha vakillariga alohida taʼkidlandi.

Tumanda 2024-yil hosili uchun 5380 gektar yer maydoniga gʻalla ekish rejalashtirilgan boʻlib, shundan 4980 gektari ochiq maydonga va 450 gektari gʻoʻza qator orasiga ekiladi.

Shuni alohida taʼkidlash kerakki, amudaryolik gʻallakorlar bu yilgi ekish mavsumiga puxta tayyorgarlik koʻrdilar. Jumladan, yerlarning shoʻri oʻz vaqtida yuvilib, lazerli uskunalar bilan tekislandi hamda dalalar oʻz vaqtida haydaldi. Endilikda gʻallakorlarimiz ekish ishlarini uyushqoqlik bilan tez kunlarda yakunlab, erta kuzda dalalardan tekis nihol olishga harakat qilishadi.

Shuningdek, seminar davomida fermer xoʻjaliklari rahbarlariga qishloq xoʻjaligi sohasida ilgʻor innovatsiyalarni qoʻllagan holda zamonaviy usulda mahsulot yetishtirishning afzalliklari, sarf-xarajatlarni qisqartirish, yerdan unumli hosil olish boʻyicha kerakli tavsiyalar berildi.

Sevara Ismoilova