GRANT LOYIHASI DOIRASIDA IJODKOR ODIL ShOMURODOVNING “OILA MUQADDAS” KITOBI TAQDIMOTIGA BAGʻIShLANGAN TADBIR OʻTKAZILDI

Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida yoshlar oʻrtasida oʻtkazilayotgan tadbirlarda ularning tafakkuri, maʼnaviy dunyosi boyitilmoqda. Boʻsh vaqtlari mazmunli oʻtkazilib, kitobxonlikka jalb etilmoqda, shu hududdagi ijodkorlar bilan, ularning yangi asarlari bilan tanishtirib borilmoqda. Shu bilan birga intellektual salohiyati oshirilib, milliy, umuminsoniy qadriyatlarimizga hurmat va sadoqat ruhi shakllantirilib borilmoqda.

11-avgust kuni grant loyihasi doirasida “Taraqqiyot koʻzgusi” gazetasi tahririyatida ijodkor Odil Shomurodovning yangi nashrdan chiqarilgan “Oila muqaddas” deb nomlangan kitobi taqdimotiga bagʻishlangan tadbir oʻtkazildi.

Tadbirda “Jayhun ilhomlari” nodavlat notijorat tashkiloti rahbari Oʻrozali Reyimov, “Taraqqiyot koʻzgusi” gazetasi, Amudaryo televideniyesi xodimlari, taniqli ijodkorlar Tursunboy Abdullayev hamda Ahmad Nafasovlar, shuningdek, “Barkamol avlod” bolalar maktabining “Adabiyotchi yoshlar” toʻgaragi oʻqituvchilari va oʻquvchi-yoshlari qatnashishdi. Shuningdek, ijodkor Odil Shomurodovning oila aʼzolari, yaqinlari ham tashrif buyurishdi.

Tadbirda Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida hamkor tashkilotlar bilan amalga oshirilayotgan ishlar xususida soʻz yuritildi. Fuqarolar yigʻinlarida yoʻlga qoʻyilgan maʼnaviy-maʼrifiy tadbirlar, yosh kitobxonlar, ijodkorlar haqidagi koʻrsatuvlar, tuman hududidagi kutubxonalarga tashkil etilayotgan sayohatlar barchaga birdek manzur boʻlayotgani, ommaviy axborot vositalarida yoritilayotgan maqola va xabarlar, lavhalar xususida maʼlumotlar berildi.

Shundan soʻng, “Jayhun ilhomlari” nodavlat notijorat tashkiloti rahbari Oʻrozali Reyimov Odil Shomurodovning ijodiy faoliyati haqida soʻzladi. “Taraqqiyot koʻzgusi” va “Mening oilam” gazetalarida yoritilayotgan sheʼr, hikoyalari oʻz muxlislarini topayotgani, yangi nashrdan chiqqan “Oila muqaddas” deb nomlangan kitobi ham kitobxonlarning qalbidan joy olgani haqida gapirib oʻtdi. Ijodkorning yangi nashrdan chiqqan kitobining mazmun-mohiyati va ahamiyatiga keng toʻxtaldi.

Odil Shomurodov 1966-yilda Amudaryo tumanining Oʻrtaqalʼa ovulida tugʻilgan. U oʻrta maktabni tugatganidan soʻng, Oqmangʻit pedagogika bilim yurtida tahsil olgan. Bilim yurtini tugatganidan keyin 1988-yilda Ellikqalʼa tumanidagi maktablardan birida oʻqituvchi boʻlib ish faoliyatini boshladi. Oʻtgan yillar davomida yosh avlodga taʼlim-tarbiya berish bilan birga turli mavzularda ijod qildi. Ijod namunalari tuman, respublika matbuotida yoritilib bordi.

Tahririyat xodimlari ijodkorning oʻz ijod namunalari bilan yaqindan tanishib borayotgani, uning “Qoraqalpoqman”, “Amudaryom – joʻshqindaryom”, “Oʻzbekistonim”, “Oila muqaddas” kabi sheʼrlari muxlislarga juda manzur boʻlgani, uning sheʼr va hikoyalari chuqur maʼno-mazmunga, tarbiyaviy ahamiyatga egaligi, Vatanga muhabbat, yurtga sodiqlik kabi ezgu tuygʻularni yaqqol his qilish mumkinligini soʻzlab oʻtishdi. Shu bilan birga Odil Shomurodovga ijodiy barkamollik tilab, undan yangi ijod namunalarini kutib qolishini aytishdi.

Tadbir davomida soʻzga chiqqan elda taniqli ijodkorlar Tursunboy Abdullayev va Ahmad Nafasovlar ham tumanda ijodkorlarni qoʻllab-quvvatlash borasida olib borilayotgan ishlar, natijada qobiliyatli, adabiyotsevar va kitobxon yoshlarning safi ortayotgani, ularga qaratilayotgan eʼtibor xususida gapirib, kitob muallifini ushbu yutuq bilan tabriklashdi. Shuningdek, mazkur kitobning yoshlar maʼnaviyatini yuksaltirishga, tafakkurini oshirishga xizmat qilishini ham taʼkidlab oʻtishdi.

Tadbirga tashrif buyurgan yoshlarga ushbu kitobni batafsil oʻqib chiqish, ijodkorning sheʼriyati bilan yaqindan tanishish tavsiya qilindi.

Kitobga boʻlgan muhabbat — bu, eng avvalo, Vatanga, oilaga boʻlgan muhabbatdir. Odil Shomurodov kabi ijodkorlarni maʼnaviyat targʻibotchilari desak, mubolagʻa boʻlmaydi. Ular oʻz ijod namunalari bilan har bir inson qalbiga chuqur kirib boradi va ezgu tuygʻularni shakllantiradi, dunyoqarashini kengaytiradi, maʼnaviyatini boyitadi.

Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida ijodkor Odil Shomurodovning “Oila muqaddas” deb nomlangan kitobi taqdimotiga bagʻishlab oʻtkazilgan tadbir ijodkorlar va kitobxonlarga juda manzur boʻldi.

Ozoda Xudoyberganova.