ГРАНТ ЛОЙИҲАСИ ДОИРАСИДА ИЖОДКОР ОДИЛ ШОМУРОДОВНИНГ “ОИЛА МУҚАДДАС” КИТОБИ ТАҚДИМОТИГА БАҒИШЛАНГАН ТАДБИР ЎТКАЗИЛДИ

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ёшлар ўртасида ўтказилаётган тадбирларда уларнинг тафаккури, маънавий дунёси бойитилмоқда. Бўш вақтлари мазмунли ўтказилиб, китобхонликка жалб этилмоқда, шу ҳудуддаги ижодкорлар билан, уларнинг янги асарлари билан таништириб борилмоқда. Шу билан бирга интеллектуал салоҳияти оширилиб, миллий, умуминсоний қадриятларимизга ҳурмат ва садоқат руҳи шакллантирилиб борилмоқда.

11 август куни грант лойиҳаси доирасида “Тараққиёт кўзгуси” газетаси таҳририятида ижодкор Одил Шомуродовнинг янги нашрдан чиқарилган “Оила муқаддас” деб номланган китоби тақдимотига бағишланган тадбир ўтказилди.

Тадбирда “Жайҳун илҳомлари” нодавлат нотижорат ташкилоти раҳбари Ўрозали Рейимов, “Тараққиёт кўзгуси” газетаси, Амударё телевидениеси ходимлари, таниқли ижодкорлар Турсунбой Абдуллаев ҳамда Аҳмад Нафасовлар, шунингдек, “Баркамол авлод” болалар мактабининг “Адабиётчи ёшлар” тўгараги ўқитувчилари ва ўқувчи-ёшлари қатнашишди. Шунингдек, ижодкор Одил Шомуродовнинг оила аъзолари, яқинлари ҳам ташриф буюришди.

Тадбирда Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ҳамкор ташкилотлар билан амалга оширилаётган ишлар хусусида сўз юритилди. Фуқаролар йиғинларида йўлга қўйилган маънавий-маърифий тадбирлар, ёш китобхонлар, ижодкорлар ҳақидаги кўрсатувлар, туман ҳудудидаги кутубхоналарга ташкил этилаётган саёҳатлар барчага бирдек манзур бўлаётгани, оммавий ахборот воситаларида ёритилаётган мақола ва хабарлар, лавҳалар хусусида маълумотлар берилди.

Шундан сўнг, “Жайҳун илҳомлари” нодавлат нотижорат ташкилоти раҳбари Ўрозали Рейимов Одил Шомуродовнинг ижодий фаолияти ҳақида сўзлади. “Тараққиёт кўзгуси” ва “Менинг оилам” газеталарида ёритилаётган шеър, ҳикоялари ўз мухлисларини топаётгани, янги нашрдан чиққан “Оила муқаддас” деб номланган китоби ҳам китобхонларнинг қалбидан жой олгани ҳақида гапириб ўтди. Ижодкорнинг янги нашрдан чиққан китобининг мазмун-моҳияти ва аҳамиятига кенг тўхталди.

Одил Шомуродов 1966 йилда Амударё туманининг Ўртақалъа овулида туғилган. У ўрта мактабни тугатганидан сўнг, Оқманғит педагогика билим юртида таҳсил олган. Билим юртини тугатганидан кейин 1988 йилда Элликқалъа туманидаги мактаблардан бирида ўқитувчи бўлиб иш фаолиятини бошлади. Ўтган йиллар давомида ёш авлодга таълим-тарбия бериш билан бирга турли мавзуларда ижод қилди. Ижод намуналари туман, республика матбуотида ёритилиб борди.

Таҳририят ходимлари ижодкорнинг ўз ижод намуналари билан яқиндан танишиб бораётгани, унинг “Қорақалпоқман”, “Амударём – жўшқиндарём”, “Ўзбекистоним”, “Оила муқаддас” каби шеърлари мухлисларга жуда манзур бўлгани, унинг шеър ва ҳикоялари чуқур маъно-мазмунга, тарбиявий аҳамиятга эгалиги, Ватанга муҳаббат, юртга содиқлик каби эзгу туйғуларни яққол ҳис қилиш мумкинлигини сўзлаб ўтишди. Шу билан бирга Одил Шомуродовга ижодий баркамоллик тилаб, ундан янги ижод намуналарини кутиб қолишини айтишди.

Тадбир давомида сўзга чиққан элда таниқли ижодкорлар Турсунбой Абдуллаев ва Аҳмад Нафасовлар ҳам туманда ижодкорларни қўллаб-қувватлаш борасида олиб борилаётган ишлар, натижада қобилиятли, адабиётсевар ва китобхон ёшларнинг сафи ортаётгани, уларга қаратилаётган эътибор хусусида гапириб, китоб муаллифини ушбу ютуқ билан табриклашди. Шунингдек, мазкур китобнинг ёшлар маънавиятини юксалтиришга, тафаккурини оширишга хизмат қилишини ҳам таъкидлаб ўтишди.

Тадбирга ташриф буюрган ёшларга ушбу китобни батафсил ўқиб чиқиш, ижодкорнинг шеърияти билан яқиндан танишиш тавсия қилинди.

Китобга бўлган муҳаббат — бу, энг аввало, Ватанга, оилага бўлган муҳаббатдир. Одил Шомуродов каби ижодкорларни маънавият тарғиботчилари десак, муболаға бўлмайди. Улар ўз ижод намуналари билан ҳар бир инсон қалбига чуқур кириб боради ва эзгу туйғуларни шакллантиради, дунёқарашини кенгайтиради, маънавиятини бойитади.

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ижодкор Одил Шомуродовнинг “Оила муқаддас” деб номланган китоби тақдимотига бағишлаб ўтказилган тадбир ижодкорлар ва китобхонларга жуда манзур бўлди.

Озода Худойберганова.