NAVOIY NOMLI MAHALLADA YaNGI “FAYZULLA AVTOSHOP” SAVDO DOʻKONI FOYDALANIShGA TOPShIRILDI

Eng ulugʻ, eng aziz bayram – mamlakatimiz mustaqilligining 32 yilligi arafasida Amudaryo tumanining Navoiy nomli mahallasida yangi qurilgan savdo shoxobchasi foydalanishga topshirildi.

Shu munosabat bilan oʻtkazilgan tantanali tadbirda fuqarolar yigʻini masʼullari, “Yusuf eshon bobo” jomʼe masjidi imom-xatibi va mahalla ahli ishtirok etishdi. Shuningdek, tadbirkorlar, keng jamoatchilik vakillari ham qatnashishdi.

Marosimda soʻzga chiqqanlar yurtimizda fuqarolar hayoti yil sayin farovonlashib borayotganini taʼkidlashib, har bir islohot, avvalo, inson manfaatlariga xizmat qilishi kerakligini, shundagina odamlarimizning turmushi goʻzallashishi, hayotiga mazmun kirishi, koʻnglida xotirjamlik hukm surishini va davlatdan, siyosatdan rozi boʻlib yashashini aytib oʻtishdi. Shuningdek, ushbu savdo majmuasining jonajon Vatanimiz mustaqilligining 32 yilligi arafasida tumanimiz ahli uchun munosib bayram sovgʻasi boʻlganini eʼtirof etishdi.

Tabrik soʻzlaridan soʻng, shu elning piru-badavlat nuroniylari alvon lentalarni kesishdi va savdo doʻkonidagi sharoitlarni, peshtaxtalardagi mahsulotlarni koʻzdan kechirishdi. Zamonaviy savdo majmuasida xaridorlar uchun barcha shart-sharoitlar yaratilgan. Doʻkon savdo qilishga qulay va xaridorlar didiga mos tarzda jihozlangan.

Tumanimiz markazida joylashgan Navoiy nomli mahalla koʻrkiga koʻrk, fayz qoʻshib turgan ushbu muhtasham “Fayzulla avtoshop” savdo doʻkoni “Maqsud oʻgʻli Rahmatjon” nomli xususiy korxona rahbari, tadbirkor Maqsud Abdullayevning oʻz mablagʻi hisobidan qurildi. Avtomobillarning ehtiyot qismlari savdosi yoʻlga qoʻyilgan savdo doʻkoni ish boshlashi bilan 4 nafar yoshlar ishli boʻlishdi. Ularning barchasi shu hudud yoshlari. Kelgusida yana 4 nafar yoshni ish bilan taʼminlash reja qilingan.

Tadbirkor Maqsud Abdullayev “Maqsud oʻgʻli Rahmatjon” xususiy korxonasini 2006-yilda tashkil etgan. Avvallari kichik doʻkonlarda ehtiyojga koʻra avtomobillar uchun zarur boʻlgan ehtiyot qismlarni keltirib, yurtdoshlarimizning ogʻirini yengil, uzogʻini yaqin qilib yurgan tadbirkor oʻz faoliyatini kengaytirish maqsadida katta va zamonaviy koʻrinishdagi ushbu bino qurilishini oʻtgan yili boshlagan edi. Mazkur muhtasham imoratning yer osti qismi omborxona vazifasini bajaradi. Binoning uchta qavatida esa turli xildagi avtomobillar ehtiyot qismlari rastalarga joylashtirilgan boʻlib, savdo-sotiq ishlari amalga oshiriladi.

Tadbirga tashrif buyurganlar Chevrolet avtomobillariga oʻrnatiladigan GM Genuine ehtiyot qismlari sotuvi yoʻlga qoʻyilgan ushbu doʻkondagi mahsulotlarning nisbatan arzonligini koʻrib, shu yerdan xarid qilish va doimiy mijoz boʻlish istagini bildirishdi. Bu kabi sifati kafolatlangan va hamyonbop narxlardagi mahsulotlar xaridorlarni oʻziga jalb qilib, juda qiziqtirdi. Savdo xodimlari har bir ehtiyot qism General Motors Engineering tomonidan ishlab chiqilgani, yuqori sifatli hamda hamyonbopligini aytib, mahsulotlar haqidagi kerakli maʼlumotlarni berishdi.

Yangi savdo majmuasi tadbirkor va xaridorlar uchun keng imkoniyatlar yaratibgina qolmasdan, tuman iqtisodi yuksalishiga ham xizmat qiladi. Bu kabi bunyodkorlik, yaratuvchanlik, tashabbuskorliklarning barchasi odamlarning hayotidan mamnun, jamiyatdan rozi boʻlib yashashiga qaratilgani bilan yanada quvonarlidir.

O.Xudoyberganova.