DOʻRMAN OVULIDA IShSIZ YoShLARGA BIR MARTALIK FOYDALANISh UChUN BERILGAN EKIN MAYDONLARDA MOʻL HOSIL YeTIShTIRILMOQDA

Yurtimizda yoshlarni har tomonlama qoʻllab-quvvatlashga, huquq va manfaatlarini taʼminlashga, ularning davlat va jamiyat hayotidagi ishtirokini kengaytirishga ustuvor vazifalardan biri sifatida qaralmoqda. Aholisining 30 foizidan ortigʻini 14 yoshdan 30 yoshgacha boʻlgan yoshlar tashkil etadigan mamlakatimizda shu sababli ham yoshlarning turmushi farovon boʻlishi uchun gʻamxoʻrliklar kuchaymoqda. Kelajak egalarini har tomonlama komil insonlar qilib voyaga yetkazish, ularning iqtidorini, salohiyatini davlatimiz hamda jamiyatimizni rivojlantirishga yoʻnaltirishga eʼtibor kuchaymoqda, ehtiyojmand yoshlar har tomonlama qoʻllab-quvvatlanmoqda.

Amudaryo tumanining Doʻrman ovulida ham yoshlar bandligini taʼminlash, ularning doimiy daromadga ega boʻlishi va hayoti farovonlashuviga erishish borasida koʻpgina saʼy-harakatlar olib borilmoqda. Joriy yilning oʻzida oliy taʼlim muassasalarida taʼlim olayotgan 4 nafar talabalarning toʻlov-shartnoma pullari toʻlab berildi. “Yoshlar daftari”ga kiritilgan Mahliyo Jumamurodovaga imtiyozli kredit asosida tikuv mashinasi olib berilib, tadbirkorlik faoliyatini boshlashiga koʻmaklashildi. 1 nafar ishsiz yoshga esa uzoq muddatli ijaraga yer olib berildi.

Ovul fuqarolar yigʻini masʼullari uyma-uy yurib, aholi hayotidan xabar olib, turmushidagi muammolarni aniqlashga, ularni imkon qadar joyida hal etishga intiladilar. Ana shunday saʼy-harakatlar natijasida yaqinda yana 24 nafar kam taʼminlangan yoshlar uchun imkoniyat yaratilgan – ularga hududdagi fermer xoʻjaliklarining bugʻdoydan boʻshagan va sugʻorib ekishga tayyorlangan 5 gektarga yaqin ekin maydonlari bir martalik foydalanish uchun ajratib berilgan edi.

Xususan, “Beshboyev Qurbongʻaliy” fermer xoʻjaligidan 5 nafar, “Pirnazarov Toʻraboy” fermer xoʻjaligidan 6 nafar, “Kamoliddin Bekniyoz” fermer xoʻjaligidan 6 nafar, “Xivali ovul” fermer xoʻjaligidan 7 nafar yoshlarga 20 sotixdan yer takroriy ekin ekish uchun ajratilgan edi.

Buniningdek imkoniyatdan unumli foydalanishga harakat qilgan yoshlar oʻzlariga belgilangan hududda oilasi roʻzgʻori uchun zarur sabzi, kartoshka va chorva uchun ozuqa ekinlarini ekib, sifatli parvarish qilishmoqda.

Xosiyat Madrahimova ham shulardan biri. U mahalla yoshlar yetakchisiga bandlik masalasida qilgan murojaatiga javoban ajratilgan 20 sotix yeriga oila aʼzolari koʻmagida sabzi ekkan edi. Hozirgi kunda bir tekis unib chiqqan ekin hosilga kiray deb turibdi.

Maʼlumki, yerdan rizq undirish gʻoyat mashaqqatli va zavqli ish. Yetarli parvarish qilingan va tobida oziqlantirilgan ekingina koʻzlangan hosilni beradi. Buni inobatga olgan masʼullar yerlarni yoshlarning yashash hududiga yaqin va qulay maydonlardan ajratishdi.

Yerni moʻl daromad manbai deb biladigan yoshlar oʻzlariga berilgan ekin maydonlarda moʻl hosil yetishtirishga harakat qilishmoqda. Chunki har kim oʻz hayotini farovon va obod qilishi uchun intilmogʻi, mashaqqatlardan choʻchimay mehnat qilmogʻi lozimligini ular yaxshi bilishadi. Yaxshi niyatlar bilan qilingan mehnat esa besamar ketmaydi.

Oygul Rajabova