ДЎРМАН ОВУЛИДА ИШСИЗ ЁШЛАРГА БИР МАРТАЛИК ФОЙДАЛАНИШ УЧУН БЕРИЛГАН ЭКИН МАЙДОНЛАРДА МЎЛ ҲОСИЛ ЕТИШТИРИЛМОҚДА
Юртимизда ёшларни ҳар томонлама қўллаб-қувватлашга, ҳуқуқ ва манфаатларини таъминлашга, уларнинг давлат ва жамият ҳаётидаги иштирокини кенгайтиришга устувор вазифалардан бири сифатида қаралмоқда. Аҳолисининг 30 фоизидан ортиғини 14 ёшдан 30 ёшгача бўлган ёшлар ташкил этадиган мамлакатимизда шу сабабли ҳам ёшларнинг турмуши фаровон бўлиши учун ғамхўрликлар кучаймоқда. Келажак эгаларини ҳар томонлама комил инсонлар қилиб вояга етказиш, уларнинг иқтидорини, салоҳиятини давлатимиз ҳамда жамиятимизни ривожлантиришга йўналтиришга эътибор кучаймоқда, эҳтиёжманд ёшлар ҳар томонлама қўллаб-қувватланмоқда.
Амударё туманининг Дўрман овулида ҳам ёшлар бандлигини таъминлаш, уларнинг доимий даромадга эга бўлиши ва ҳаёти фаровонлашувига эришиш борасида кўпгина саъй-ҳаракатлар олиб борилмоқда. Жорий йилнинг ўзида олий таълим муассасаларида таълим олаётган 4 нафар талабаларнинг тўлов-шартнома пуллари тўлаб берилди. “Ёшлар дафтари”га киритилган Маҳлиё Жумамуродовага имтиёзли кредит асосида тикув машинаси олиб берилиб, тадбиркорлик фаолиятини бошлашига кўмаклашилди. 1 нафар ишсиз ёшга эса узоқ муддатли ижарага ер олиб берилди.
Овул фуқаролар йиғини масъуллари уйма-уй юриб, аҳоли ҳаётидан хабар олиб, турмушидаги муаммоларни аниқлашга, уларни имкон қадар жойида ҳал этишга интиладилар. Ана шундай саъй-ҳаракатлар натижасида яқинда яна 24 нафар кам таъминланган ёшлар учун имконият яратилган – уларга ҳудуддаги фермер хўжаликларининг буғдойдан бўшаган ва суғориб экишга тайёрланган 5 гектарга яқин экин майдонлари бир марталик фойдаланиш учун ажратиб берилган эди.
Хусусан, “Бешбоев Қурбонғалий” фермер хўжалигидан 5 нафар, “Пирназаров Тўрабой” фермер хўжалигидан 6 нафар, “Камолиддин Бекниёз” фермер хўжалигидан 6 нафар, “Хивали овул” фермер хўжалигидан 7 нафар ёшларга 20 сотихдан ер такрорий экин экиш учун ажратилган эди.
Бунинингдек имкониятдан унумли фойдаланишга ҳаракат қилган ёшлар ўзларига белгиланган ҳудудда оиласи рўзғори учун зарур сабзи, картошка ва чорва учун озуқа экинларини экиб, сифатли парвариш қилишмоқда.
Хосият Мадраҳимова ҳам шулардан бири. У маҳалла ёшлар етакчисига бандлик масаласида қилган мурожаатига жавобан ажратилган 20 сотих ерига оила аъзолари кўмагида сабзи эккан эди. Ҳозирги кунда бир текис униб чиққан экин ҳосилга кирай деб турибди.
Маълумки, ердан ризқ ундириш ғоят машаққатли ва завқли иш. Етарли парвариш қилинган ва тобида озиқлантирилган экингина кўзланган ҳосилни беради. Буни инобатга олган масъуллар ерларни ёшларнинг яшаш ҳудудига яқин ва қулай майдонлардан ажратишди.
Ерни мўл даромад манбаи деб биладиган ёшлар ўзларига берилган экин майдонларда мўл ҳосил етиштиришга ҳаракат қилишмоқда. Чунки ҳар ким ўз ҳаётини фаровон ва обод қилиши учун интилмоғи, машаққатлардан чўчимай меҳнат қилмоғи лозимлигини улар яхши билишади. Яхши ниятлар билан қилинган меҳнат эса бесамар кетмайди.
Ойгул Ражабова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
