“Milliy qadriyatlarimiz - bebaho boyligimiz” shiori ostida koʻrgazma tashkil qilindi

Milliy qadriyatlarimiz, urf-odatlarimiz bebaho boyligimizdir. Uni asrab-avaylash, avlodlarga meros qoldirish barchamizning muqaddas burchimiz va vazifamizdir.

24-iyul kuni Amudaryo tumanining Toʻlqin ovul fuqarolar yigʻini binosida “Milliy qadriyatlarimiz – bebaho boyligimiz” shiori ostida tadbir tashkil etildi. Tadbirda mahallaning koʻchaboshchi, faol ayollari, yosh qiz-kelinchaklar ishtirok etdilar. Tadbir davomida mahallaning chevar ayol-qizlari oʻz qoʻl mehnatlari bilan tayyorlagan quroq bolishlari, koʻrpa hamda koʻrpachalarini koʻrgazmaga qoʻydilar.

Aytish lozimki, yurtmizdagi har bir hududning oʻziga xos quroq namunalari bor. Ular har xil matolar va shakllardan tikiladi. Quroq qurash odamning sabrini sinovdan oʻtkazadi. Quroq koʻrpa, koʻrpacha, qiz uzatganda qoʻshib beriladi. Quroqdan tikilgan mahsulotlarni kelinning sepiga qoʻshish qizning borgan yerida ildiz otib, palak yoyib, oʻzidan koʻpayib, qoʻshgani bilan qoʻsha qarisin, qurashib ketsin, degan maʼnolarni ifodalaydi. Toʻydan avval quroq tikish, qizining sepiga qoʻshish – oʻzbek xalqining urf-odati.

Koʻrgazmada koʻchaboshchi ayollari milliy hunarmandchiligimiz namunalari boʻlgan quroqchilik, kashtachilik, zardoʻzlik sanʼati haqida batafsil maʼlumot berdilar. Tadbirda ishtirok etayotgan boshqa ayol-qizlarni ham uyda bekor vaqt oʻtkazmaslikka, hunar oʻrganishga chaqirib hunarli boʻlgan inson kam boʻlmasligini hayotiy misollar orqali batafsil tushuntirdilar. Quroq qurash qadimdan kelayotgan xalq amaliy sanʼati ekanligini, quroqni til-koʻzdan, yomonlikdan saqlaydigan tumor sifatida foydalinishlarini aytib, milliy hunarmandchiligimizni rivojlantirish boʻyicha oʻzlarining taklif va tavsiyalarini berib oʻtdilar.

Koʻrgazmada koʻchaboshchi ayollar har bir oʻzbek qiz-kelinchagini bugungi kungacha saqlangan va ayni paytda yanada ommalashib borayotgan, momolarimizdan qolgan quroqchilik anʼanasini davom ettirishga chorladilar.

Toʻlqin ovulidagi sogʻlom maʼnaviy muhit, koʻchaboshchi ayollarining xonadonma-xonadon yurib, ayol-qizlar bilan doimiy ravishda muloqot qilishlari yosh oilalar uchun ibrat boʻlib kelmoqda.

Shuningdek, jamoatchilik asosida tashkil etilgan “Koʻchaboshchi ayollar” tuzilmasi ishlarni nafaqat xonadonbay tashkil etishda, balki xotin-qizlarning mamlakat iqtisodiy, siyosiy va ijtimoiy hayotining barcha jabhalarida faolligini oshirishlarida muhim ahamiyatga ega boʻlmoqda.

Toʻlqin ovulida boʻlib oʻtgan mazkur tadbir ham mahallaning xotin-qizlar faoli Gavhar Bobotayeva hamda koʻchaboshchi ayollarining tashabbusi bilan tashkil etilib, 40 nafarga yaqin ayol-qizlar qamrab olindi.

Milliy hunarmandchilik namunalari koʻrgazmasi yuqori saviyada tashkil etilib, ayol-qizlarga hunar oʻrgangan inson aslo kam boʻlmasligi, hunarli ayol oilaviy daromadiga hissa qoʻshishi mumkinligi, qolaversa kasb-hunar bilan shugʻullangan oilalarda kelishmovchiliklar kelib chiqmasligi, shu sababdan ham yosh qizlarga bolalik paytidan boshlab hunar oʻrgatish lozimligi taʼkidlandi.

Boʻlib oʻtgan milliy hunarmandchilik koʻrgazmasi ishtirokchilarda katta tassurot qoldirdi.

Tuman hokimligining Axborot xizmati.