“Миллий қадриятларимиз - бебаҳо бойлигимиз” шиори остида кўргазма ташкил қилинди

Миллий қадриятларимиз, урф-одатларимиз бебаҳо бойлигимиздир. Уни асраб-авайлаш, авлодларга мерос қолдириш барчамизнинг муқаддас бурчимиз ва вазифамиздир.

24 июль куни Амударё туманининг Тўлқин овул фуқаролар йиғини биносида “Миллий қадриятларимиз – бебаҳо бойлигимиз” шиори остида тадбир ташкил этилди. Тадбирда маҳалланинг кўчабошчи, фаол аёллари, ёш қиз-келинчаклар иштирок этдилар. Тадбир давомида маҳалланинг чевар аёл-қизлари ўз қўл меҳнатлари билан тайёрлаган қуроқ болишлари, кўрпа ҳамда кўрпачаларини кўргазмага қўйдилар.

Айтиш лозимки, юртмиздаги ҳар бир ҳудуднинг ўзига хос қуроқ намуналари бор. Улар ҳар хил матолар ва шакллардан тикилади. Қуроқ қураш одамнинг сабрини синовдан ўтказади. Қуроқ кўрпа, кўрпача, қиз узатганда қўшиб берилади. Қуроқдан тикилган маҳсулотларни келиннинг сепига қўшиш қизнинг борган ерида илдиз отиб, палак ёйиб, ўзидан кўпайиб, қўшгани билан қўша қарисин, қурашиб кетсин, деган маъноларни ифодалайди. Тўйдан аввал қуроқ тикиш, қизининг сепига қўшиш – ўзбек халқининг урф-одати.

Кўргазмада кўчабошчи аёллари миллий ҳунармандчилигимиз намуналари бўлган қуроқчилик, каштачилик, зардўзлик санъати ҳақида батафсил маълумот бердилар. Тадбирда иштирок этаётган бошқа аёл-қизларни ҳам уйда бекор вақт ўтказмасликка, ҳунар ўрганишга чақириб ҳунарли бўлган инсон кам бўлмаслигини ҳаётий мисоллар орқали батафсил тушунтирдилар. Қуроқ қураш қадимдан келаётган халқ амалий санъати эканлигини, қуроқни тил-кўздан, ёмонликдан сақлайдиган тумор сифатида фойдалинишларини айтиб, миллий ҳунармандчилигимизни ривожлантириш бўйича ўзларининг таклиф ва тавсияларини бериб ўтдилар.

Кўргазмада кўчабошчи аёллар ҳар бир ўзбек қиз-келинчагини бугунги кунгача сақланган ва айни пайтда янада оммалашиб бораётган, момоларимиздан қолган қуроқчилик анъанасини давом эттиришга чорладилар.

Тўлқин овулидаги соғлом маънавий муҳит, кўчабошчи аёлларининг хонадонма-хонадон юриб, аёл-қизлар билан доимий равишда мулоқот қилишлари ёш оилалар учун ибрат бўлиб келмоқда.

Шунингдек, жамоатчилик асосида ташкил этилган “Кўчабошчи аёллар” тузилмаси ишларни нафақат хонадонбай ташкил этишда, балки хотин-қизларнинг мамлакат иқтисодий, сиёсий ва ижтимоий ҳаётининг барча жабҳаларида фаоллигини оширишларида муҳим аҳамиятга эга бўлмоқда.

Тўлқин овулида бўлиб ўтган мазкур тадбир ҳам маҳалланинг хотин-қизлар фаоли Гавҳар Боботаева ҳамда кўчабошчи аёлларининг ташаббуси билан ташкил этилиб, 40 нафарга яқин аёл-қизлар қамраб олинди.

Миллий ҳунармандчилик намуналари кўргазмаси юқори савияда ташкил этилиб, аёл-қизларга ҳунар ўрганган инсон асло кам бўлмаслиги, ҳунарли аёл оилавий даромадига ҳисса қўшиши мумкинлиги, қолаверса касб-ҳунар билан шуғулланган оилаларда келишмовчиликлар келиб чиқмаслиги, шу сабабдан ҳам ёш қизларга болалик пайтидан бошлаб ҳунар ўргатиш лозимлиги таъкидланди.

Бўлиб ўтган миллий ҳунармандчилик кўргазмаси иштирокчиларда катта тассурот қолдирди.

Туман ҳокимлигининг Ахборот хизмати.