Buyuk shoh va shoir

Biz umrguzaronlik qilayotgan bu koʻhna Turonda shunday buyuk insonlar yashab oʻtganki, ularning ijodiy merosi, hayratlanarli xizmatlari bashariyat eʼtirofiga, hurmat-ehtiromiga sazovordir. Mana, qariyb olti asrki, buyuk shoir, tarixchi, geograf Zahiriddin Muhammad Bobur xalqimiz ruhiyatining toʻrida yashab kelmoqda. Bu buyuk isteʼdodli sarkarda halokatga yuz tutgan Temur saltanatini yangi asosda qayta tiklashga muyassar boʻldi. Shoirlikda Navoiyga, ruboiynavislikda Umar Hayyomga tenglashtirilgan bu ulugʻ zot oʻz avlodlariga "Boburnoma”dek buyuk asar yozib qoldirdi. Ulugʻ shoirning Vatanga sadoqati, farzand tarbiyasidagi harakatlari, farzandlari bilan munosabatlari biz avlodlar uchun ibrat maktabidir.

Atoqli frantsuz tarixchisi, olim, islom dini haqidagi qator tadqiqotlar muallifi, "Iso paygʻambar hayoti” asarini yozgan E. Renan: "buyuk temuriy tojdorlar Bobur – Humoyun va Akbar orasidagi oqilona vorisiylik tarixda faqat bir marta sodir boʻlgan nodir hodisa”, deb baholaydi. Bobur tirikligida tojini oʻgʻliga topshirgan yagona hukmdordir. Fidoyi oʻgʻli Humoyun esa Hindistonda otasi asos solgan saltanatni turli xil tajovuzlardan omon saqlaydi, nabirasi Akbar esa bu saltanat-u sulolaning dovrugʻini olamga yoydi.

Bobur ijodi oʻzbek xalqi uchun noyob bir xazina. Bu xazinani oʻqib-oʻrganish hamda avlodlarga asrab-avaylab yetkazish uchun yurtimizda katta ishlar amalga oshirilmoqda. 1992-yil Xalqaro Bobur fondi tashkil etildi, "Jahon madaniyati va Bobur” muzeyi ochildi.

Bobur ijodiga nafaqat Oʻzbekistonda, balki butun dunyo miqyosida qiziqish katta. Anna Flora Stilning "Toj kiygan darvesh”, "Oʻn oltinchi asr bunyodkorlari”, "Shahzoda Bobur”, "Togʻ Shahzodasi” kabi ingliz tilida yaratilgan asarlarining barchasi buyuk bobokalonimiz hayoti va ijodi butun dunyo halqlarining maʼnaviyat xazinasini boyitib turganligidan dalolatdir.

Xalqaro Bobur fondi homiyligida ingliz adibasi Margaret Rumer Goden yaratgan "Gulbadan” romani chop etilgani ham fikrimizning yaqqol dalilidir.

Butun ongli hayotini xalqlar doʻstligini mustahkamlash, ona Vatanga cheksiz mehr-muhabbat tuygʻulari bilan yoʻgʻrilgan asarlar yaratishga bagʻishlagan buyuk bobokalonimiz Zahiriddin Muhammad Bobur nomi bilan biz avlodlar har qancha faxrlansak-da oz.