AMUDARYo TELEVIDENIYeSI TAHRIRIYaTI TOMONIDAN OʻTKAZILGAN “MAHALLAMIZNING ENG ZIYoLI OILASI” TANLOVI GʻOLIBLARI ANIQLANDI

Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” grant loyihasi doirasida yoshlar maʼnaviyatini yuksaltirish, ular ongida Vatanga muhabbat, milliy va umuminsoniy qadriyatlarga sadoqat ruhini shakllantirish maqsadida turli tadbirlar, tanlovlar oʻtkazilib, targʻibot ishlari olib borilmoqda. Tahririyat xodimlari tomonidan tashkil etilgan ushbu tadbirlar nafaqat yoshlar, balki turli yoshdagi aholiga ham manzur boʻlib, barchasida faol ishtirok etishmoqda.

14-iyun kuni mazkur grant loyihasi doirasida “Mahallamizning eng ziyoli oilasi” tanlovi gʻoliblarini taqdirlash marosimi boʻlib oʻtdi. Ushbu marosimda “Jayhun ilhomlari” nodavlat notijorat tashkiloti rahbari Oʻrozali Reyimov hamda Amudaryo televideniyesi tahririyati xodimlar ishtirok etishdi. Shuningdek, hududlarda ijtimoiy-maʼnaviy-muhit barqarorligini taʼminlashga hissa qoʻshish, aholi oʻrtasida oilaviy kitob oʻqish anʼanasini ommalashtirish, oilalarda kutubxonalar tashkil qilishni targʻib qilish, shu orqali oila aʼzolarining maʼnaviyatini yuksaltirishga erishish kabi maqsadlarda oʻtkazilgan ushbu tanlovda faol qatnashgan va gʻolib boʻlgan oilalar tashrif buyurishdi.

Boʻston mahallasidan tashrif buyurgan tadbirkor, hoji ona Gulasal Oʻrozmetovaning oilasida 13 nafar aʼzosi bor. U 2 oʻgʻli, 3 kelini, 8 nevarasi bilan yashab kelmoqda. Katta oʻgʻli Ruslan Iskandarov tuman Ichki ishlar boʻlimida xizmat qiladi. Kichik oʻgʻil Zafarjon esa qurilish ishlari bilan shugʻullanadigan “Viktoriya-xolding” MChJ rahbari boʻlib ishlaydi. Katta kelini Nodiraxon “Istiqlol” toʻyxonasini boshqaradi, ikkinchi kelin Malohatxon “ARISTOKRAT-baby” nodavlat oilaviy MTT rahbari, kichik kelin esa savdo xodimi.

Gulasal opa rahmatli umr yoʻldoshi Toʻliboy aka bilan birgalikda oilada farzandlarining bilimli, oʻqimishli, boʻlishlariga alohida eʼtibor qaratishdi. Shu tufayli ular kichik yoshdanoq kitobxonlikka, bilim olishga qiziqib, oʻzlari tanlagan kasblarning egalari boʻlib yetishishdi. Endilikda esa onaxon nevaralarning boʻsh vaqtlaridan unumli foydalanishlariga imkoniyat yaratib, koʻproq kitobxonlikka qiziqtirishmoqda.

Onaxon oʻz farzandlari bilan birgalikda koʻplab xayrli ishlarga ham bosh-qosh boʻlmoqda. “Viktoriya-xolding” MChJda 35 ta, “ARISTOKRAT-bebi” nodavlat oilaviy MTTda 16 ta ish oʻrni yaratib, ishsiz fuqarolarning bandligini taʼminlashdi. Yaqinda Xitoy Respublikasidan kiritilgan 150 ming AQSh dollari miqdoridagi investitsiya mablagʻlari hisobidan tashkil etilib, ishga tushirilishi kutilayotgan beton zavodida esa 150 ta ish oʻrni yaratilib, ishsiz fuqarolar bandligini taʼminlash koʻzda tutilmoqda. Qurilish tashkilotiga rahbarlik qilib kelayotgan farzandi Zafarjon oʻtgan yili tumandagi Yangiobod mahalla fuqarolar yigʻini binosini oʻz mablagʻi hisobidan qurib foydalanishga topshirdi.

Boyovul mahallasidan ziyoli oila deb topilgan Egambergan Yodgorovlar oilasi aʼzolari ham 13 nafardan iborat. Oila sohibi Egambergan Yodgorov umr yoʻldoshi Pardagul Yusupova bilan birgalikda 3 oʻgʻilni voyaga yetkazishgan. Ular biri zavodda, biri fabrikada ishchi boʻlib ishlashgan va farzandlarning bilimli, oʻqimishli boʻlishlariga alohida eʼtibor qaratishgan. Hozir oʻgʻillar ham, shu oilaga tushgan 3 nafar kelinlar ham tumandagi umumtaʼlim maktablarida oʻqituvchi boʻlib ishlab, elga ziyo tarqatishmoqda. Ziyoli oilada kamolga yetayotgan 5 nafar nevara ham bobo-buvilaridan ertaklar tinglab, turli kitoblarni oʻqib, kamolga yetishmoqda.

Tanlovda gʻolib boʻlgan Gulzor mahallasidagi Jumamurodovlar oilasida 2 oʻgʻil, 2 qiz voyaga yetgan boʻlsa, hozirda xonadonda 2 kelin va 4 nafar nevaralar bilan yashashadi. Tumandagi sobiq 44-sonli avtobazada shofyor boʻlib ishlagan oila sohibi Baxtiyor Jumamurodov, 40-sonli maktabgacha taʼlim tashkilotida tarbiyachi boʻlib ishlagan xonadon bekasi Enajon Avezmurodovalar ham asosiy vaqtini farzandlarini el koriga yaraydigan insonlar qilib tarbiyalashga bagʻishlab, kam boʻlishmadi. Hozir oʻgʻillari oʻz hunarlari bilan el xizmatida boʻlib, oilalariga daromad topishmoqda. Qizlar ham biri tikuvchi, biri pazanda boʻlib, kelin boʻlib tushgan xonadonlarida oʻzlari kabi solih farzandlar tarbiya qilishmoqda. Kelinlar esa bogʻchada tarbiyachi, yosh avlod taʼlim-tarbiyasi bilan band.

Shuningdek, tumanimizning chekka hududida joylashgan Nazarxon ovulidan tashrif buyurgan Tozaxon Qdirniyazova ham turmush oʻrtogʻi Xidirboy bilan birgalikda 3 nafar qiz va 1 nafar oʻgʻil farzandni tarbiyalab voyaga yetkazmoqda. Toʻngʻich qizi Nilufar hozirgi kunda Teatr va sanʼat instituti Nukus filialining 3-bosqich talabasi.  Tozaxon ovuldagi 3-sonli maktabda kutubxonachi boʻlib ishlaydi. U kitobxonlik borasida boshqalarga oʻrnak boʻlib, katta yutuqlarni qoʻlga kiritib kelmoqda. U oʻtgan yili Respublikada oʻtkazilgan kitobxonlik festivalida sovrindor boʻlib qaytdi. Bu yil Qoraqalpogʻiston Respublikasi miqyosida oʻtkazilgan kitobxonlik festivalida gʻolib deb topildi hamda birinchi darajali diplom va festivalning maxsus kubogi bilan taqdirlandi.

Grant loyihasi doirasida oʻtkazilgan “Mahallamizning eng ziyoli oilasi” tanlovi gʻoliblarini taqdirlash marosimida oilalar bilan suhbatlar oʻtkazilib, ularning hayotidagi yutuqlari, oilaviy kitobxonlikka boʻlgan munosabati, oiladagi tarbiyaviy udumlar, odatlar xususida soʻzlashildi. Nevaralarning bobo-buvilaridan eshitgan ertaklari, kitobxonlik haqidagi sheʼrlari tinglandi. Shundan soʻng, tanlovda gʻolib deb topilgan har bir oilaga faxriy yorliq va sovgʻalar topshirildi.

Grant loyihasi doirasidagi maʼnaviy-maʼrifiy ahamiyatga ega boʻlgan mazkur tadbir juda qiziqarli oʻtdi. Oilalarining tumanda eng ziyoli deb eʼtirof etilgani, eʼtibor koʻrsatilib ragʻbatlantirilganidan xursand boʻlgan ishtirokchilar tashkilotchilarga oʻz minnatdorchiliklarini bildirishdi.

 O.Xudoyberganova.