“QALDIRGʻOCh” BOLALAR YoZGI OROMGOHINING OChILIShIGA BAGʻIShLANGAN TADBIR BOʻLDI

Maktablarda oʻquv yili poyoniga yetib, bolajonlar yozgi taʼtilga chiqishdi. Bunday damlarda ularni soʻlim oromgohlar oʻz bagʻriga chorlaydi. Oromgohlarda bolalar koʻngilli dam olib, yangi doʻstlar orttirib, turli sport, ijodiy toʻgaraklarda iqtidorlarini yuksaltiradilar. Qatʼiy reja asosida olib boriladigan chiniqish mashqlari, turli tanlovlar va madaniy dam olish tadbirlari oʻquvchilar qalbida oʻchmas taassurotlar qoldiradi.

Doʻrman ovuli Amudaryo tumanining eng havosi musaffo, fayzli goʻshalaridan biri sanaladi. Ovulda faoliyat koʻrsatayotgan, atrofini koʻp yillik muhtasham chinorlar, archalar oʻrab turgan 84-sonli maktab binosida har yili tashkil qilinadigan "Qaldirgʻoch" bolalar yozgi dam olish oromgohi bolalarning eng sevimli maskaniga aylangan.

Joriy yilning 2-iyun kunidan ish faoliyatini boshlagan mazkur oromgohda bu yilgi yoz mavsumida 5 ta bosqichda, har bosqichda 100 nafardan jami 500 nafar bolalarni qabul qilish rejalashtirilgan. Oromgoh joriy yilgi ilk faoliyatini boshlagan birinchi bosqichda Mangʻit shahri va shahar atrofidagi 1-, 16-, 30-, 31-, 36-, 38-, 40-, 55-, 56-, 57-, 82- va 87-sonli maktablarning 7 yoshdan 14 yoshgacha boʻlgan jami 100 nafar oʻquvchilari qamrab olindi.

Shu munosabat bilan 2-iyun kuni maktab oldida tantanali tadbir oʻtkazildi. Unda tuman hokimi oʻrinbosarlari Mahmud Shermetov, Goʻzal Soburova, Maktabgacha va maktab taʼlimi boʻlimi mudiri Saida Sodiqova, maktablar direktorlari, Milliy gvardiya, Ichki ishlar boʻlimi xodimlari, dam oluvchi bolalarning ota-onalari ishtirok etdilar.

Tadbirda tuman hokimi oʻrinbosarlari Mahmud Shermetov, Goʻzal Soburovalar bolajonlarni oromgohning ochilishi bilan qizgʻin qutlab, bu yaratilayotgan sharoit yurtimizda bolajonlarning barkamol boʻlib voyaga yetishlariga qilinayotgan davlatimizning gʻamxoʻrligining bir ifodasi ekanligini taʼkidladilar. Soʻzga chiqqanlar saf boʻlib, quvonchdan koʻzlari yonib turgan bolalarning koʻngilli dam olishlarini tiladilar.

“Qaldirgʻoch” bolalar oromgohi direktori Zafar Abdullayev yigʻilganlarni oromgohda bolalarning yaxshi dam olishlari, qulay sharoitlarda ovqatlanishlari uchun yaratilgan sharoitlar bilan tanishtirdi.

Oromgohda bolalarning boʻsh vaqtlari mazmunli oʻtishi uchun “Besh tashabbus” doirasida toʻgaraklar faoliyati yoʻlga qoʻyilgan boʻlib, ularga malakali oʻqituvchi-murabbiylar ham tayinlanganini barcha havas bilan eʼtirof etdi.

Oromgohning ochilish marosimi hudud sanʼatkorlarining kontsert dasturi bilan davom etdi. Dilrabo kuy-qoʻshiqlar, raqslar bolalarning oromgohga ilk qadam qoʻygan kunining taassurotlarga boy, esda qolarli boʻlishini taʼminladi. Ularning oromgoh bagʻrida oʻtadigan har bir kuni doʻstlari safi kengayib, chiniqib, ilm olishga ishtiyoqi oshishiga xizmat qiladi, albatta. Chunki yozgi taʼtil davrida ish boshlaydigan buningdek maskanlar dam olish oromgohlari sanalsa ham, aslida u yerda oʻtkaziladigan mashgʻulotlar, tadbirlar bola dunyoqarashini boyitib, ijodiy qobiliyatini yuksaltiradi, bolajonlarning har tomonlama kamol topishiga xizmat qiladi. Zero, bolalar va oʻsmirlarning yozgi dam olish oromgohlari faoliyati taʼlim tizimining bir qismidir.

Oygul RAJABOVA.