Insholar tanlovi gʻoliblari taqdirlandi

“Mahalla” xayriya jamoat fondi Amudaryo tuman boʻlinmasi tomonidan “Obod mahallam” nomli grant loyihasining ish rejasi boʻyicha oʻrinlarda turli tadbirlar, uchrashuvlar, seminarlar oʻtkazilib kelinmoqda.

Loyihaning asosiy maqsadi atrof-muhitni muhofaza qilish va tabiiy resurslardan oqilona foydalanish, fuqarolarning oʻzini oʻzi boshqarish organlari, nodavlat notijorat tashkilotlari va fuqarolar bilan hamkorlikda hududlarni obodonlashtirish va koʻkalamzorlashtirish, atrof-muhit muhofazasiga hissa qoʻshishdan iboratdir.

Shuningdek, mazkur loyiha asosida maktab oʻquvchilari oʻrtasida Ekologiyaga oid mavzularda insholar tanlovlari oʻtkazilib kelinmoqda. Jumladan oʻtgan yilning dekabr oyida Qipchoq hududidagi maktablar oʻquvchilari oʻrtasida “Yashil tabiatni asrash – oʻz qoʻlimizda” shu yilning fevral oyida esa Qilichboy hududidagi maktablar oʻquvchilari oʻrtasida “Koʻchat ekish ezgu anʼana” mavzusida insholar tanlovlari oʻtkazildi.

“Taraqqiyot koʻzgusi” gazetasi tahririyati bilan hamkorlikda oʻtkazilgan bu insholar tanlovlarida oʻquvchilar ekologiya va jonli tabiat haqida chuqur bilimlarga ega ekanligini namoyish etdilar.

Quvonarli joyi shundaki, maktab oʻquvchilari ona tabiatga boʻlgan iliq munosabatlarini moʻyqalam orqali ham ifodalay oldilar. Mangʻit shahri va shahar atrofidagi hududlarda joylashgan maktablar oʻquvchilari oʻrtasida oʻtkazilgan “Tabiat va biz” mavzusidagi rasmlar tanlovi soʻzimizning dalilidir.

Yaqinda biz soʻz yuritayotgan “Obod mahallam” loyihasi asosida aholi, ayniqsa yoshlarni tabiatga ehtiyotkorona munosabatda boʻlish, tabiiy resurslarni tejashga daʼvat qilish, ularning ekologiyaga oid bilimlarini oshirish maqsadida “Jayxun ilhomlari” NNT bilan birgalikda Xitoy ovuli hududida joylashgan maktablar oʻquvchilari oʻrtasida “Men ekkan inhol” mavzusida insholar tanlovi oʻtkazildi. Bu insholar tanlovida hududdagi 13 ta umumtaʼlim maktablaridan oʻquvchilar ishtirok etishdi.

Insholar tanlovining gʻoliblari va sovrindorlari badiiy kengash aʼzolari tomonidan aniqlandi. Unga koʻra, 85-sonli maktabning 10-sinf oʻquvchisi Sevinchoy Umrboyeva “Eng yaxshi, tahliliy fikrlari uchun” 1-oʻringa, 2-sonli maktabning 8-sinf oʻquvchisi Gulhayo Paraxatova “Insonparvarlik tuygʻulari ulugʻlangan joʻshqin fikrlari uchun” 2-oʻringa, 68-sonli maktabning 10-sinf oʻquvchisi Mashhura Fayzullayeva “Eng yaxshi, ezgulik targʻibotchiligi uchun” 3-oʻringa munosib deb topildilar.

Shuningdek, 10-sonli maktabning 11-sinf oʻquvchisi Shohnoza Sherimbetova, 9-sonli maktabning 10-sinf oʻquvchisi Ziyoda Sobirova insholar tanlovidagi “Faol ishtiroki uchun” sovrindorlar qatoridan oʻrin oldilar.

Gʻolib va sovrindorlarga “Mahalla” xayriya jamoat fondi Amudaryo tuman boʻlinmasi tomonidan tayyorlangan qimmatbaho sovgʻalar va “Faxriy yorliqlar” tantanali ravishda topshirildi.

Oʻ.Reyimov.