GRANT LOYIHASI DOIRASIDA OʻTKAZILGAN “KOʻChMA KUTUBXONA” TADBIRI YoShLARDA KATTA QIZIQISh UYGʻOTDI

Yoshlar maʼnaviyatini yuksaltirish, kitobxonlik madaniyatini yanada kuchaytirish, aholining boʻsh vaqtlarini mazmunli tashkil etish, kitob oʻqishga boʻlgan qiziqishlarini yanada kuchaytirish maqsadida Amudaryo tumanining chekka hududlaridagi ovul va mahallalarda turli tadbirlar oʻtkazilmoqda. Ayniqsa, yoshlarning kitob oʻqishga boʻlgan qiziqishini oshirishga qaratilayotgan alohida eʼtibor tufayli kitobxonlar safi ortmoqda. Bu tuman va respublika miqyosida oʻtkazilayotgan kitobxonlik tanlovlarida gʻolib boʻlayotgan koʻplab yoshlar misolida yaqqol namoyon boʻlmoqda.

Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida ham yoshlarni kitobxonlikka jalb etuvchi turli tadbirlar, tanlovlar tashkil etilib, tumanning chekka hududlaridagi yoshlar ham qamrab olinmoqda. Ushbu grant loyihasi doirasida navbatdagi “Koʻchma kutubxona” tadbiri Qangli ovulidagi 67-sonli maktabda tashkil etildi.

Tadbirda maktab oʻquvchi-yoshlari bilan birgalikda oʻqituvchilari ham ishtirok etishdi.

Tadbir davomida Amudaryo televideniyesi tahririyati xodimlari hamda maktabning ona tili va adabiyot oʻqituvchisi Zulayho Bobojonovalar soʻzga chiqib, bugungi kunda xalqimiz, ayniqsa, yoshlarimiz orasida kitob mutolaasini ommalashtirish, ularning maʼnaviyatini yuksaltirishda maʼrifat maskanlari – kutubxonalarning oʻrni kattaligi, shu bois ularning faoliyatiga alohida eʼtibor qaratilayotganini tilga olib oʻtishdi. Bu maʼrifat maskanlarining, hozirga kelib zamonaviylashayotgani, kitoblarning elektron shakllari, eshitish, koʻrish, audio-video multimediyali turlari ham mavjudligi, koʻchma kutubxonalar, kitoblar koʻrgazmalari tashkil etilayotgani toʻgʻrisida ham maʼlumotlar berishdi.

Taʼkidlash joizki, aholining axborot olishga, axborot-kutubxona muassasalari faoliyatidan erkin, tez va sifatli foydalanishga boʻlgan imkoniyatlari tobora kengayib bormoqda. Kutubxona fondidan foydalanish tizimini takomillashtirish, kitobxonlarga xizmat koʻrsatishda turli yoshdagi aholi qatlamlarining talab va ehtiyojlari, qiziqishlarini eʼtiborga olish, koʻrsatilayotgan qoʻshimcha xizmatlar turlarini yanada kengaytirish va sifatini oshirish mamlakatimizdagi har bir kutubxona oldida turgan muhim vazifadir. Inson yaralibdiki, komillikka intilib yashaydi. Bunga kitobsiz, kitob mutolaasisiz erishib boʻlmaydi. Bu xazinani oʻzida saqlab kelayotgan kutubxonalar esa eng boy ziyo maskanidir.

Grant loyihasi doirasida tashkil etilgan “Koʻchma kutubxona” tadbirida ana shunday  ziyo maskanlaridan unumli foydalanish kerakligi, kitob muotlaasiga koʻproq vaqt ajratish lozimligi, kitoblar yoshlarning yuksak siyosiy bilimli, yetuk intellektual bilim va salohiyatga ega, erkin fikrlovchi insonlar boʻlib voyaga yetishlarida muhim oʻrin tutishi koʻp bora taʼkidlandi.

Tadbir davomida oʻquvchi-yoshlar “Taraqqiyot koʻzgusi” tahririyati qoshida tashkil etilgan “Jayhun ilhomlari” nodavlat notijorat tashkiloti kutubxonasidan keltirilgan kitoblar bilan tanishishdi. Abdulla Qodiriyning “Oʻtgan kunlar”, “Mehrobdan chayon”, Gʻafur Gʻulomning “Shum bola” va boshqa koʻplab adiblarning qiziqarli asarlari va ulardagi qahramonlar haqida oʻz fikrlarini bildirib oʻtgan yoshlar, ushbu kutubxonadagi boshqa kitoblarga juda qiziqishdi va aʼzo boʻlish istagini bildirishdi. Tahririyat xodimlari kutubxonadagi mavjud adabiyotlar, ularning turlari, barcha yoshdagi kitobxonlarga mosligi, yangi keltirilgan kitoblar, kutubxonaning chekka hududlardagi filiallari xususida ham maʼlumotlar berishdi va ularning qiziqishlarini yanada oshirishdi.

Kitoblar insonda Vatanga muhabbat, milliy va umuminsoniy qadriyatlarga hurmat tuygʻularini yuksaltirib, yaxshilik hamda ezgulikka undaydi. Yoshlarni kitobxonlikka jalb etish maqsadida grant loyihasi doirasida oʻtkazilgan ushbu tadbir ham yoshlarning kitob mutolaasiga boʻlgan qiziqishlarini yanada oshirib, kitobxonlar safi ortishida muhim ahamiyatga ega boʻldi.

O.Xudoyberganova.