Xalq deputatlari Amudaryo tuman Kengashining 61-sessiyasi toʻgʻrisida axborot

2023-yil 26-may kuni Xalq deputatlari Amudaryo tuman Kengashining 61-sessiyasi boʻlib oʻtdi.

Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdi.

Sessiyani tuman hokimi – Xalq deputatlari tuman Kengashi raisi Sultonboy Yoʻldashev ochdi va olib bordi. Sessiya kotibligiga 1-Navoiy saylov okrugidan deputat Gulshod Yusupova saylandi.

Sessiyada dastlab joylarda xotin-qizlarni qiynayotgan muammolarni hal qilish hamda jamiyatda ayollarning nufuzini yanada oshirish boʻyicha koʻrilayotgan choralar samaradorligi toʻgʻrisida tuman hokimi oʻrinbosari, Oila va xotin-qizlar boʻlimi boshligʻi Goʻzal Saburovaning hisoboti tinglandi.

Axborotda keltirib oʻtilganidek, shu kungacha 4-bosqich “Ayollar daftari”ga kiritilgan 5 ming 398 nafar xotin-qizlarning 2 ming 974 nafariga turli yordamlar koʻrsatilgan. Shuningdek, “Oilaviy qadriyatlarni mustahkamlash” komissiyasi tomonidan 122 ta oila yarashtirilib, ajrim holatlari oʻtgan yildagiga nisbatan 21 taga kamaygan.

Shundan soʻng, Amudaryo tumani mahalliy byudjeti mablagʻlarining 2023-yil 1-chorak davomida sarflanishi yuzasidan tuman Moliya boʻlimi mudiri Ulugʻbek Bekniyazovning hisoboti tinglandi. Taʼkidlanganidek, 2023-yil 1-chorak davomida byudjet mablagʻlari hisobidan jami 77 mlrd. 991 mln. 325 ming soʻm mablagʻlar sarflangan.

Sessiya ishida 2023-yil 1-aprel holatiga aniqlangan erkin qoldiq mablagʻlari hisobidan ajratiladigan mablagʻlar toʻgʻrisida tuman hokimining birinchi oʻrinbosari Rashid Salayev hisobot berdi. Hisobotda erkin qoldiq mablagʻlarining sarflash yoʻnalishlari boʻyicha taklif berildi. Taklif deputatlar tomonidan bir ovozdan maʼqullandi.

Sessiya kun tartibida Yoshlar ishlari agentligi tuman boʻlimi boshligʻi Sardor Ismailovning hisoboti tinglandi. Hisobotda “Yoshlar balansi” asosida ijtimoiy ahvoli, qobiliyati hamda qiziqishlariga qarab yoshlar “yashil”, “sariq”, “qizil” toifalarga ajratilgani maʼlum qilinib, “qizil” toifaga kiritilgan 1 316 nafar yoshlarning roʻyxatini tasdiqlash boʻyicha taklif berildi. Taklif deputatlar tomonidan bir ovozdan maʼqullandi.

Sessiya ishida “Davlat hokimiyati va boshqaruvi organlari faoliyatining ochiqligi toʻgʻrisida”gi Qonun ijrosi yuzasidan tuman hokimligining Axborot xizmati rahbari Fotima Eshimbetovaning axboroti tinglandi. Axborotda hokimlik veb-saytining ochiq maʼlumotlar boʻlimiga joylashtirlgan maʼlumotlar, media tadbirlarning vaqtida bajarilishi, hukumat qarorlari va farmonlarining tumandagi ijrosi va uni yoritib borish masalalari xususida batafsil maʼlumot berildi.

Shundan soʻng, Oʻzbekiston Respublikasi Prezidentining “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari toʻgʻrisida”gi qaroriga asosan quyosh fotoelektrik stantsiyalari hamda quyosh suv isitish qurilmalarini 2023-yil yakuniga qadar oʻrnatish boʻyicha rejalarning bajarilishi haqida tuman hokimi oʻrinbosari Nodirbek Kamolovning hisoboti tinglandi.

Taʼkidlab oʻtilganidek, ijtimoiy soha obʼektlari, korxonalar, “Temir daftar”, “Yoshlar daftari” hamda “Ayollar daftari”ga kiritilgan oilalarga quyosh fotoelektrik stantsiyalari hamda quyosh suv isitish qurilmalarini 2023-yilning yakuniga qadar oʻrnatish boʻyicha reja-jadval dasturi ishlab chiqilgan va bu borada aholi hamda tadbirkorlarga amaliy yordamlar koʻrsatilmoqda.

Sessiya ishida fuqarolardan kelib tushayotgan murojaatlar tahlili asosida mahallalardagi hokim yordamchilari faoliyati natijadorligini aniqlash yuzasidan tuman Xalq qabulxonasi boʻlimi yetakchi mutaxassisi Sanʼat Avezovning axboroti tinglandi. Axborotda taʼkidlanganidek, tumandagi hokim yordamchilari tomonidan shu kungacha jami 272 ta tadbirkorlik subʼektlari yangidan tashkil etilgan boʻlib, shundan 138 tasi yakka tartibdagi tadbirkorlar, 134 tasi yuridik maqomdagi tadbirkorlardir.

Sessiya kun tartibida Davlat kadastrlari palatasi Qoraqalpogʻiston Respublikasi boshqarmasi tuman filiali boshligʻi Sherzod Sultanovning ham hisoboti tinglandi. Hisobotda tumandagi shahar va shaharchalarning, ovullarning chegaralari maxsus komissiya tomonidan amaldagi tartib-qoidalar asosida qayta belgilangani maʼlum qilinib, deputatlar eʼtiboriga havola qilindi. Tumandagi shahar va shaharchalar, ovullarning chegaralari deputatlar tomonidan bir ovozdan tasdiqlandi.

Sessiya ishida Kengash vakolatiga kiritilgan boshqa masalalar ham atroflicha koʻrib chiqilib, tuman Kengashining tegishli qarorlari qabul qilindi.

 Shuning bilan sessiya oʻz ishini yakunladi.

Tuman hokimligining Axborot xizmati.