9-SONLI BOLALAR MUSIQA VA SANʼAT MAKTABI OʻQUVChILARINING HISOBOT KONTsERTI BOʻLIB OʻTDI

Har oʻquv yili yakuni arafasida Amudaryo tumanidagi Bolalar musiqa va sanʼat maktablarining hisobot kontsertlarini tashkil etish anʼanaga aylangan. Kontsertda oʻquvchilar oʻzlarining iqtidorlarini, yil davomida olgan bilimlari va mahoratlarini namoyish etishadi.

12-may kuni tuman Madaniyat boʻlimining kontsertlar zalida 9-sonli Bolalar musiqa va sanʼat maktabi oʻquvchilarining hisobot kontserti boʻlib oʻtdi. Kontsertga 9-sonli Bolalar musiqa va sanʼat maktabi oʻqituvchi va oʻquvchilari, tuman Madaniyat boʻlimi masʼullari va xodimlari, oʻquvchilarning ota-onalari va sanʼat ixlosmandlari tashrif buyurishdi.

Ushbu kontsertga “Mening oilam” gazetasi tahririyatining “Besh muhim tashabbus – yoshlarga qanot” grant loyihasi doirasida nogironligi boʻlgan yoshlarning musiqa va sanʼatga qiziqishini oshirish maqsadida umumtaʼlim maktablarining uy sharoitida tahsil olayotgan oʻquvchilari ham jalb etildi.

Kontsert davomida 9-sonli Bolalar musiqa va sanʼat maktabi oʻquvchilari xoreografiya, bayan-akkordeon, torli-kamonli, puflab chalinadigan cholgʻular, xalq cholgʻulari, anʼanaviy sozandalik, anʼanaviy ashulachilik yoʻnalishlari boʻyicha oʻz ijrolarini taqdim etishdi. Shuningdek, anʼanaviy ijro va estrada yoʻnalishi boʻyicha ijrolar, teatrlashtirilgan sahna tomoshalari ham tomoshabinlar eʼtiboriga havola qilindi.

Tadbirni 9-sonli Bolalar musiqa va sanʼat maktabi direktori Yoʻldosh Abdalov ochib berdi va yurtimizda yoshlarning taʼlim olishlari, iqtidorlarini yuzaga chiqarishga qaratilayotgan eʼtibor, yaratilayotgan imkoniyatlar xususida soʻzladi. Shuningdek, ushbu maktabda 250 nafardan ziyod oʻquvchilar 12 ta yoʻnalishlarda taʼlim olishayotgani, ularga 40 nafar oʻqituvchilar musiqa va sanʼatdan chuqur taʼlim berib, iqtidorlarini yuksaltirishga intilishayotgani xususida gapirdi.

Maktab fortepiano, royal, torli-kamonli va puflab chalinadigan musiqiy asboblar bilan toʻliq taʼminlangani, bayan-akkordeon, xalq cholgʻulari, anʼanaviy xonandalik, estrada, tasviriy sanʼat, xoreografiya, teatr sanʼati yoʻnalishlarida tahsil olayotgan oʻquvchi-yoshlar orasida nafaqat Qoraqalpogʻiston, balki Oʻzbekiston Respublikasi miqyosidagi koʻrik-tanlovlar gʻoliblari borligini faxr bilan eʼtirof etib oʻtdi.

Hisobot kontsert dasturidan oʻrin olgan xoreografiya, bayan-akkordeon, torli-kamonli, puflab chalinadigan cholgʻular, anʼanaviy ijro va estrada yoʻnalishlari oʻquvchilari ijrosidagi kuy-qoʻshiq va dilrabo raqslar tomoshabinlarga xush kayfiyat bagʻishladi.

Teatrlashtirilgan sahna tomoshalari, xalq cholgʻulari, anʼanaviy sozandalik, anʼanaviy ashulachilik yoʻnalishlari boʻyicha oʻquvchi-yoshlarning chiqishlari olqishlar bilan kutib olindi. Ayniqsa, maktab oʻqituvchilari Dilfuza Rahimova, Iroda Yendirboyeva, Zumrad Mirzayevalarning oʻquvchilari ijrosidagi “Onajonim”, “Italyanskaya polka”, “Neapol qoʻshigʻi” kuylari, xoreografiya boʻlimi oʻqituvchisi Qunduzoy Eshchanovaning oʻquvchisi ijrosidagi jozibali qoraqalpoqcha raqs va teatr boʻlimi oʻquvchilari ijrosidagi mazmunli sahna tomoshasi, oʻquvchilarning aktyorlik mahorati tomoshabinlarga juda manzur boʻldi.

Hisobot kontsert dasturi yakunida oʻqishda, jamoat ishlarida va tumanda oʻtkaziladigan maʼnaviy-maʼrifiy tadbirlarda faol ishtirok etgan oʻquvchilar, oʻz pedagogik faoliyati davomida yuqori natijalarga erishgan oʻqituvchilar, oʻquv yili davomida doimiy hamkorlik qilgan ota-onalarga minnatdorchilik bildirilib, faxriy yorliqlar topshirildi.

Ozoda Xudoyberganova.