ChOYKOʻL OVULIDA “YuKSAK MAʼNAVIYaTLI VA AXLOQLI YoShLAR – JAMIYaT POYDEVORI” MAVZUSIDA MULOQOT TADBIRI OʻTKAZILDI

Yoshlarning maʼnaviyatini yuksaltirish, ular ongida Vatanga muhabbat, milliy-maʼnaviy va umuminsoniy qadriyatlarga sadoqat ruhini shakllantirish, boʻsh vaqtlarini mazmunli oʻtkazishga koʻmaklashish hamda oʻsib kelayotgan yosh avlodni mafkura maydonining turli xurujlaridan himoya qilish, ayniqsa, yoshlarning maʼnaviy-ruhiy intellektual salohiyatini oshirish, jamiyatda ijtimoiy-maʼnaviy muhitni sogʻlomlashtirishga hissa qoʻshish maqsadida Amudaryo televideniyesi tahririyati ijodiy jamoasi tomonidan taʼlim muassasalarida va jamoat tashkilotlarida “Jaholatga qarshi – maʼrifat” tamoyili asosida targʻibot tadbirlari amalga oshirilmoqda.

Bu targʻibot tadbirlariga keng jamoatchilik vakillari, ayniqsa, oʻsmir yoshdagi oʻquvchi-yoshlar, ayol-qizlar keng qamrab olinmoqda. Ana shunday tadbirlardan biri joriy yilning 12-may sanasida Choykoʻl ovulida ham oʻtkazildi. “Jaholatga qarshi – maʼrifat” tamoyili asosida yoshlar oʻrtasida jinoyatchilikning oldini olish, jinoyat sodir qilishga moyil, muqaddas sudlangan va jinoyat sodir qilgan shaxslar bilan ishlashish borasida Choykoʻl ovulida samarali ishlar amalga oshirilmoqda. Tadbirda bu haqda Choykoʻl ovul fuqarolar yigʻini raisi Begzod Aytekov batafsil toʻxtalib oʻtdi. Xususan, “Bir nuroniy – oʻn yoshga masʼul” tamoyiliga koʻra, notinch va toʻliqsiz oilalarda voyaga yetayotgan yoshlar bilan ishlashish, ularning boʻsh vaqtlarini mazmunli oʻtkazishlariga koʻmaklashish maqsadida amalga oshirilayotgan chora-tadbirlar natijasida jinoyat va huquqbuzarlik holatlarining barvaqt oldini olishga erishilmoqda.

Tadbir davomida Choykoʻl ovul fuqarolar yigʻini hududida faoliyat olib boruvchi 32-sonli tayanch punkti profilaktika inspektori, kapitan Azimjon Matyusupov muqaddam sudlangan va jinoyat sodir qilishga moyil, shuningdek, ichkilikka ruju qoʻygan shaxslar, notinch oilalar bilan ishlashish boʻyicha yaratilgan alohida nazorat tizimi xususida soʻz yuritdi. Unga koʻra, muntazam spirtli ichimlikka ruju qoʻygan fuqarolarning oila aʼzolari bilan doimiy muloqot oʻtkazilib, spirtli ichimlikka mukkasidan ketgan shaxslar narkologiya dispanserida davolanishlari, sogʻlom hayotga qaytishlari uchun zarur choralar koʻrilayotgani bois, bunday shaxslar safi deyarli keskin kamayishiga erishilmoqda.

Ayni paytda 32-sonli tayanch punkti xizmat hududidagi 1079 ta xonadonga birikkan 1122 ta oilada 7200 nafar aholi istiqomat qiladi. Yigʻin raisi, profilaktika inspektori, ovulda faoliyat olib boruvchi hokim yordamchisi, xotin-qizlar faoli, yoshlar yetakchisining hamkorlikdagi faoliyati bois, hududda sogʻlom maʼnaviy muhitni qaror toptirishga xizmat qiluvchi 5 ta ishchi guruhi tuzilib, faoliyati yoʻlga qoʻyilgan.

Ushbu ishchi guruh aʼzolari oʻzaro hamkorlikda hududdagi muammoli xonadonlarda tez-tez boʻlishib, fuqarolar bilan bevosita muloqotda oʻtkazishayotgani bois, hududni ijtimoiy-iqtisodiy obodonlashtirish va maʼnaviy muhitni sogʻlomlashtirish masalalari oʻz vaqtida ijobiy yechim topmoqda. Ayniqsa, ovuldagi jinoyat qilishga moyil, muqaddam sudlangan va probatsiya tartibida jazoni oʻtayotgan, shuningdek, jazoni ijro etish maskanlaridan ozod etilgan shaxslarning roʻyxati alohida shakllantirilib, doimiy yigʻin faollari va masʼullari nazoratiga olingani oʻzining ijobiy samarasini bermoqda.

Tadbirda soʻzga chiqqan hudud boʻyicha profilaktika inspektori Azimjon Matyusupov, Amudaryo televideniyesining “Yuksak maʼnaviyatli va axloqli yoshlar – keladak poydevori” grant loyihasi koordinatori, jurnalist Robiya Yoʻldosheva, Oʻzbekiston Jurnalistlari ijodiy Uyushmasi aʼzosi, shoir va jurnalist, “Jayxun ilhomlari” nodavlat notijorat tashkiloti raisi Oʻrozali Reyimovlar yuksak maʼnaviyatli yoshlarni tarbiyalash jamiyatimizning har bir aʼzosi zimmasidagi masʼuliyatli vazifa ekanligini taʼkidladilar.

Boʻlib oʻtgan tadbirda 22-sonli maktab direktori Azimjon Bekberganov, mahalla faoli Darixa Sharipovalar yoshlarning taʼlim-tarbiyasida oila va maktab hamda mahallaning hamkorligi juda muhim ekanligini taʼkidladilar. Har bir ota-ona oʻz farzandining kim bilan doʻst ekanligi, uning atrofidagi doʻstlari qanday toifadagi odamlar va kasb-kori, jamiyatda tutgan oʻrni haqida maʼlumotga ega boʻlishlari zarurligini qayd etdilar. Ayniqsa, mobil aloqa vositalaridan foydalanishda farzandi koʻproq qanday ilovalarni oʻz telefoniga yuklab olayotgani, kechalari qayerga borib, kim bilan uchrashayotgani ota-onaning doimiy nazoratida boʻlishi zarurligini taʼkidladilar.

Robiya YOʻLDOShEVA.