ЧОЙКЎЛ ОВУЛИДА “ЮКСАК МАЪНАВИЯТЛИ ВА АХЛОҚЛИ ЁШЛАР – ЖАМИЯТ ПОЙДЕВОРИ” МАВЗУСИДА МУЛОҚОТ ТАДБИРИ ЎТКАЗИЛДИ

Ёшларнинг маънавиятини юксалтириш, улар онгида Ватанга муҳаббат, миллий-маънавий ва умуминсоний қадриятларга садоқат руҳини шакллантириш, бўш вақтларини мазмунли ўтказишга кўмаклашиш ҳамда ўсиб келаётган ёш авлодни мафкура майдонининг турли хуружларидан ҳимоя қилиш, айниқса, ёшларнинг маънавий-руҳий интеллектуал салоҳиятини ошириш, жамиятда ижтимоий-маънавий муҳитни соғломлаштиришга ҳисса қўшиш мақсадида Амударё телевидениеси таҳририяти ижодий жамоаси томонидан таълим муассасаларида ва жамоат ташкилотларида “Жаҳолатга қарши – маърифат” тамойили асосида тарғибот тадбирлари амалга оширилмоқда.

Бу тарғибот тадбирларига кенг жамоатчилик вакиллари, айниқса, ўсмир ёшдаги ўқувчи-ёшлар, аёл-қизлар кенг қамраб олинмоқда. Ана шундай тадбирлардан бири жорий йилнинг 12 май санасида Чойкўл овулида ҳам ўтказилди. “Жаҳолатга қарши – маърифат” тамойили асосида ёшлар ўртасида жиноятчиликнинг олдини олиш, жиноят содир қилишга мойил, муқаддас судланган ва жиноят содир қилган шахслар билан ишлашиш борасида Чойкўл овулида самарали ишлар амалга оширилмоқда. Тадбирда бу ҳақда Чойкўл овул фуқаролар йиғини раиси Бегзод Айтеков батафсил тўхталиб ўтди. Хусусан, “Бир нуроний – ўн ёшга масъул” тамойилига кўра, нотинч ва тўлиқсиз оилаларда вояга етаётган ёшлар билан ишлашиш, уларнинг бўш вақтларини мазмунли ўтказишларига кўмаклашиш мақсадида амалга оширилаётган чора-тадбирлар натижасида жиноят ва ҳуқуқбузарлик ҳолатларининг барвақт олдини олишга эришилмоқда.

Тадбир давомида Чойкўл овул фуқаролар йиғини ҳудудида фаолият олиб борувчи 32-сонли таянч пункти профилактика инспектори, капитан Азимжон Матюсупов муқаддам судланган ва жиноят содир қилишга мойил, шунингдек, ичкиликка ружу қўйган шахслар, нотинч оилалар билан ишлашиш бўйича яратилган алоҳида назорат тизими хусусида сўз юритди. Унга кўра, мунтазам спиртли ичимликка ружу қўйган фуқароларнинг оила аъзолари билан доимий мулоқот ўтказилиб, спиртли ичимликка муккасидан кетган шахслар наркология диспансерида даволанишлари, соғлом ҳаётга қайтишлари учун зарур чоралар кўрилаётгани боис, бундай шахслар сафи деярли кескин камайишига эришилмоқда.

Айни пайтда 32-сонли таянч пункти хизмат ҳудудидаги 1079 та хонадонга бириккан 1122 та оилада 7200 нафар аҳоли истиқомат қилади. Йиғин раиси, профилактика инспектори, овулда фаолият олиб борувчи ҳоким ёрдамчиси, хотин-қизлар фаоли, ёшлар етакчисининг ҳамкорликдаги фаолияти боис, ҳудудда соғлом маънавий муҳитни қарор топтиришга хизмат қилувчи 5 та ишчи гуруҳи тузилиб, фаолияти йўлга қўйилган.

Ушбу ишчи гуруҳ аъзолари ўзаро ҳамкорликда ҳудуддаги муаммоли хонадонларда тез-тез бўлишиб, фуқаролар билан бевосита мулоқотда ўтказишаётгани боис, ҳудудни ижтимоий-иқтисодий ободонлаштириш ва маънавий муҳитни соғломлаштириш масалалари ўз вақтида ижобий ечим топмоқда. Айниқса, овулдаги жиноят қилишга мойил, муқаддам судланган ва пробация тартибида жазони ўтаётган, шунингдек, жазони ижро этиш масканларидан озод этилган шахсларнинг рўйхати алоҳида шакллантирилиб, доимий йиғин фаоллари ва масъуллари назоратига олингани ўзининг ижобий самарасини бермоқда.

Тадбирда сўзга чиққан ҳудуд бўйича профилактика инспектори Азимжон Матюсупов, Амударё телевидениесининг “Юксак маънавиятли ва ахлоқли ёшлар – келадак пойдевори” грант лойиҳаси координатори, журналист Робия Йўлдошева, Ўзбекистон Журналистлари ижодий Уюшмаси аъзоси, шоир ва журналист, “Жайхун илҳомлари” нодавлат нотижорат ташкилоти раиси Ўрозали Рейимовлар юксак маънавиятли ёшларни тарбиялаш жамиятимизнинг ҳар бир аъзоси зиммасидаги масъулиятли вазифа эканлигини таъкидладилар.

Бўлиб ўтган тадбирда 22-сонли мактаб директори Азимжон Бекберганов, маҳалла фаоли Дариха Шариповалар ёшларнинг таълим-тарбиясида оила ва мактаб ҳамда маҳалланинг ҳамкорлиги жуда муҳим эканлигини таъкидладилар. Ҳар бир ота-она ўз фарзандининг ким билан дўст эканлиги, унинг атрофидаги дўстлари қандай тоифадаги одамлар ва касб-кори, жамиятда тутган ўрни ҳақида маълумотга эга бўлишлари зарурлигини қайд этдилар. Айниқса, мобиль алоқа воситаларидан фойдаланишда фарзанди кўпроқ қандай иловаларни ўз телефонига юклаб олаётгани, кечалари қаерга бориб, ким билан учрашаётгани ота-онанинг доимий назоратида бўлиши зарурлигини таъкидладилар.

Робия ЙЎЛДОШЕВА.