KITOBXONLIK BUYuK KELAJAK KAFOLATIDIR
Yaxshi kitob insonda Vatanga muhabbat, milliy va umuminsoniy qadriyatlarga hurmat tuygʻularini yuksaltiruvchi, ezgulikka undovchi mayoqdir. Kitob mutolaasining insonning har tomonlama yetuk, komil shaxs sifatida shakllanishida oʻrni beqiyosdir. Kitob har qanday bilimning joni va yuragi, har qanday fanning ibtidosidir.
Aziz yoshlar, boʻsh vaqtingizni zoye ketkazmay, kelajagingiz poydevorini mustahkam qilib, koʻp kitoblar oʻqib, bilim olib, ilm choʻqqilarini zabt eting! Sizlarga yangi kelgan adabiyotlarni tavsiya qilamiz:
“Muhabbat bekati” – bu bekatda inson umrida aqalli bir bora toʻxtab oʻtadi. Bekatda qancha toʻxtashidan qatʼiy nazar, bu davr qalbida abadiy muhrlanib qoladi va bu nurli xotiralar umr soʻngigacha koʻnglini munavvar etib turadi. Adib Abdurahmon Ibrohimning ushbu yangi toʻplamidan joy olgan qissa va hikoyalar xuddi shu mavzuga bagʻishlangan.
A.Qorjovovning “Soʻnggi gunoh” qissasida toʻyiga bir kun qolganda vafot etgan yigitning oʻlimidan soʻng roʻy bergan sirli voqealar hikoya qilinadi. Kuyov yigit suvga gʻarq boʻlgan hovuz yaqinidagi binoga yillar oʻtgach, bir qizning kelishi bilan asosiy sarguzashtlar boshlanadi… Shuningdek, kitobdan muallifning ”Uch ayol fitnasi” qissasi ham joy olgan boʻlib, maktab chogʻlari qalin dugona boʻlgan uch sinfdoshning achchiq sirlari yillar oʻtib, birin-ketin ochiladi…
Oʻ.Usmonning "Lahzaning larzalari" nomli kitobiga turli yillarda yozilgan sara hikoyalari jamlangan. Har bir hikoyada murakkab hayotiy munosabatlar va inson ruhiy olamining ming bir evrilish va ziddiyatlari aks etgan. Chuqur falsafiy maʼno singdirilgan, oʻziga xos badiiy uslub va tabiiylik mujassam boʻlgan hikoyalarni oʻqib, zavq olasiz, oʻyga tolasiz, shaxs va jamiyat muammolarini qalbdan his etasiz. Turk yozuvchisi Amina Shenlikoʻgʻli qalamiga mansub “Loʻli" romanida ham turli davrlarda yuz bergan voqea-hodisalar tasvirlangan. Yozuvchi asar haqida shunday deydi:
"Sevishgan yoshlar hamda Serpilning akasini asar bosh qahramoni sifatida gavdalantirdim. Oʻzim yashagan, his qilgan, eshitgan va koʻrganlarimni Serpil va Samo misolida tahlil qildim, asriy qadriyatlarga nazar tashladim". Asrlar davomida biror millat loʻlilarchalik ezilmaganini koʻpchiligimiz yaxshi bilamiz… Asar davomini oʻqish orqali shu mavzuda batafsil maʼlumotlarni bilib olasiz.
R.Romanova, tuman AKM axborot-bibliografiya xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
