Salomatlik va sifatli ovqatlanishni tashkil etish oyligi doirasida seminar-trening oʻtkazildi
Bugungi kunda mamlakatimizda ertamiz egalari boʻlgan yosh avlod tarbiyasi va ularning maktabgacha boʻlgan tayyorgarligiga katta eʼtibor qaratilib, maktabgacha taʼlim tizimida bir qator yangilanishlar hamda oʻzgarishlar amalga oshirilmoqda. Chunki, maktabgacha yoshdagi bolaga singdirilgan bilim va qadriyatlar uning kelgusida qanday inson boʻlishini belgilab beradi. Shu bilan birga, maktabgacha taʼlim uygʻun rivojlangan shaxsni shakllantirishda muhim ahamiyat kasb etadi.
Muassasalarda bolalarga berilayotgan taʼlim va tarbiya ularning shaxs sifatida shakillanishida qanchalik muhim ahamiyat kasb etsa, jismoniy tarbiya va sport bilan shugʻullanishi, toʻgʻri ovqatlanishi ham bolaning kamolotida shunchalik muhim oʻrin tutadi.
Shu sababli ham maktabgacha taʼlim tizimida aprel oyi “Salomatlik va sifatli ovqatlanishni tashkil etish oyligi” deb eʼlon qilingan. Bundan koʻzlangan maqsad − maktabgacha taʼlim muassasalarida tarbiyalanuvchilarni xavfsiz va sogʻlom ovqatlantirishni tashkil etish boʻyicha olib borilayotgan ishlarni takomillashtirish, muassasalarning oshxonalarida sanitariya-gigiyena qoidalariga rioya qilinishini taʼminlash va epidemiyaga qarshi tadbirlar samaradorligini oshirish, ovqat tayyorlash uchun masʼul xodimlarning bilimlarini mustahkamlashdan iborat.
Shu munosabat bilan 28-aprel kuni Amudaryo tumanidagi 40-sonli davlat maktabgacha taʼlim tashkilotida “Bolalar salomatligini taʼminlash va sogʻlom ovqatlanishni tashkil etish – eng muhim vazifamiz!” shiori ostida koʻrgazmali seminar-trening boʻlib oʻtdi.
Seminar-treningda Qoraqolpogʻiston Respublikasi Maktabgacha va maktab taʼlimi vazirligi xodimlari, Qoraqolpogʻiston Respublikasi Oshpazlar uyushmasi aʼzolari, Amudaryo tumani Sanitariya-epidemiologik osoyishtalik va jamoat salomatligi boʻlimi mutaxassislari hamda tumandagi barcha maktabgacha taʼlim tashkilotlari oshpazlari ishtirok etishdi.
Seminar-trening davomida tizim xodimlariga Maktabgacha taʼlim tashkilotlarining davlat va nodavlat tarmoqlarini yanada kengaytirish, ular oʻrtasida sogʻlom raqobat muhitini shakllantirish, bolalarning sogʻlom va barkamol oʻsishini taʼminlash borasida amalga oshirilayotgan ishlar haqida maʼlumotlar berildi. Shuningdek, ishtirokchilarga muzlatgichda saqlanayotgan oziq-ovqat mahsulotlari va tayyorlanayotgan taomlar sanitariya-gigiyena qoidalariga toʻgʻri kelishi, taomlarning xavfsizligi va sifatini kafolatlash, oshxonalarda tayyorlanayotgan taomlarga sifatli masalliqlar ishlatish lozimligi batafsil tushuntirildi.
Seminar-treningda oshxonalarni orasta saqlash lozimligi, bolalar uchun shakllantirilgan kunlik taomnomalarning tarkibida ozuqaviy moddalarning yetarli miqdorda boʻlishi kerakligi aytib oʻtildi.
Seminar yakunida maktabgacha taʼlim tizimida namunali faoliyat yuritayotgan bir guruh oshpazlar tuman Maktabgacha va maktab taʼlimi boʻlimi tomonidan faxriy yorliqlar bilan taqdirlandi.
Shu oʻrinda aytish kerakki, Maktabgacha taʼlim tashkiloti tarbiyalanuvchilarining sogʻlom va xavfsiz ovqatlanishini tashkil etishda nafaqat muassasa mudiralari, balki oshpaz va hamshiralar, tarbiyachilar ham masʼuldirlar. Sababi, ertangi kun egalari boʻlgan yosh avlodning salomatligini saqlash har kim uchun muhim va dolzarb vazifadir.
Diana Bazarbayeva QDUning jurnalistika fakulʼteti talabasi
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
