42-sonli maktab oʻquvchilari Axborot-kutubxona markaziga sayohatga olib borildi

Kitob – aql chirogʻi, insonning kamolotga yetishida yoʻlchi-yulduz. Shu bois, kitobxonlik xalqimiz uchun eng ustuvor qadriyat sifatida eʼzozlanadi. Yoshlar maʼnaviyatini yuksaltirish, ularning dunyoqarashini shakllantirishdagi oʻrni esa nihoyatda katta.

Umumtaʼlim maktablari, oliy oʻquv yurtlari talabalari, shuningdek, mahallalardagi uyushmagan yoshlar, tadbirkor yoshlarning bilimini yanada oshirish, ularni milliy ruh bilan sugʻorilgan adabiyotlar bilan yaqindan tanishtirish maqsadida Amudaryo televideniyesi ijodiy jamoasi tomonidan “Yuksak maʼnaviyatli yoshlar – kelajak poydevori” grant loyihasi doirasida amalga oshirilayotgan kitobxonlik targʻibotiga bagʻishlangan davra suhbatlari, “Yosh kitobxon”, “Namunali kitobxon oila” mavzusidagi koʻrik-tanlovlar, oʻquvchi-yoshlarning kutubxonalarga sayohat tadbirlari kitobsevar yoshlarga olam-olam zavq bagʻishlamoqda.

Joriy yilning 20-aprel sanasida 42-sonli umumtaʼlim maktabi kitobsevar oʻquvchilarining Amudaryo  Axborot-kutubxona markaziga sayohati ham qiziqarli taassurotlarga boy va maroqli oʻtdi.

Kitobsevar oʻquvchi-yoshlarni Axborot-kutubxonaning xizmat qilish boʻlimi xodimi Gulasal Qoʻchqorova va kutubxonachi opalari mamnuniyat bilan kutib olishdi Axborot-kutubxona markazining xizmat qilish boʻlimi xodimasi Gulasal Qoʻchqorova Axborot-kutubxona faoliyati, ayni paytdagi mavjud kitob  jamgʻarmasi, kitoblarning saqlanishi va ulardan foydalanish tartib-qoidalari haqida oʻquvchilarga keng  tushunchalar va  maʼlumotlar berdi. Shu bilan birga kutubxonaning yangi adabiyotlar boʻlimiga keltirilgan yangi kitoblar haqida ham zarur maʼlumotlar berib, kitobxon yoshlarga sohalarga oid boʻlimlarda jamlangan bolalarbop adabiyotlarni oʻqishni tavsiya qildi. Xususan, ovqatlanish  gigiyenesi, oʻsmir yoshlar gigiyenasi, shuningdek, atrofimizdagi olam bilan bogʻliq voqea-hodisalar haqidagi adabiyotlar bilan batafsil tanishtirdi.

Shundan soʻng, “Yuksak maʼnaviyatli yoshlar – kelajak poydevori” grant loyihasi koordinatori, kutubxonaga sayohat tashkilotchisi, jurnalist va shoira Robiya YOʻldosheva bilan oʻquvchi-yoshlarning dildan suhbati tashkil etildi.

Robiya Yoʻldosheva kitobning oʻz hayotida tutgan oʻrni, shaxs sifatida shakllanishidagi yuksak ahamiyati haqida soʻz yuritib, kitob – insonni tarbiyalovchi, orzular sari yetaklovchi qudratli kuch ekanligini taʼkidladi. Kitob – eng yaqin sirdosh, maslahatgoʻy, yiqilganda suyaguvchi, gʻam bosganda dilga malham, toliqqanda mador, kuch-quvvat, koʻngil kamlarini toʻldirguvchi, qalb dardiga malham, obi hayot chashmasi, deya taʼrifladi u.

Darvoqe, Axborot-kutubxona markazining ayni paytdagi kitob jamgʻarmasi 64053 ta boʻlib, shundan badiiy adabiyotlar 46109, adabiyotshunochlikka oid kitoblar 1305, tabiiy va aniq fanlar yoʻnalishidagi ilmiy ommabop va nazariy adabiyotlar 5305 tani tashkil etadi. Axborot-kutubxonada kitoblarning elektron nusxalari ham mavjud va kitobxonlarga bu xizmat turidan foydalanishlari uchun zarur sharoitlar yaratilgan.

Tadbir davomida oʻquvchi-yoshlar turli savollar bilan murojaat qildilar va masʼullar tomonidan qoniqarli javoblar oldilar. Shu bilan birga kutubxonaga uyushtirilgan sayohatdan zavq-shavq olganlarini izhor etdilar. Kitobsevar yoshlar oʻzbek, qoraqalpoq va boshqa millat yozuvchilari qalamlariga mansub badiiy adabiyotlarni mutolaa qilish uchun tanlab oldilar.

Kutubxonaga sayohat tadbiri qiziqarli taassurotlarga boy va maroqli boʻldi.

Risolat IBRAGIMOVA, 42-sonli maktabning ijodiy-madaniy masalalar boʻyicha targʻibotchisi.