42-сонли мактаб ўқувчилари Ахборот-кутубхона марказига саёҳатга олиб борилди

Китоб – ақл чироғи, инсоннинг камолотга етишида йўлчи-юлдуз. Шу боис, китобхонлик халқимиз учун энг устувор қадрият сифатида эъзозланади. Ёшлар маънавиятини юксалтириш, уларнинг дунёқарашини шакллантиришдаги ўрни эса ниҳоятда катта.

Умумтаълим мактаблари, олий ўқув юртлари талабалари, шунингдек, маҳаллалардаги уюшмаган ёшлар, тадбиркор ёшларнинг билимини янада ошириш, уларни миллий руҳ билан суғорилган адабиётлар билан яқиндан таништириш мақсадида Амударё телевидениеси ижодий жамоаси томонидан “Юксак маънавиятли ёшлар – келажак пойдевори” грант лойиҳаси доирасида амалга оширилаётган китобхонлик тарғиботига бағишланган давра суҳбатлари, “Ёш китобхон”, “Намунали китобхон оила” мавзусидаги кўрик-танловлар, ўқувчи-ёшларнинг кутубхоналарга саёҳат тадбирлари китобсевар ёшларга олам-олам завқ бағишламоқда.

Жорий йилнинг 20 апрель санасида 42-сонли умумтаълим мактаби китобсевар ўқувчиларининг Амударё  Ахборот-кутубхона марказига саёҳати ҳам қизиқарли таассуротларга бой ва мароқли ўтди.

Китобсевар ўқувчи-ёшларни Ахборот-кутубхонанинг хизмат қилиш бўлими ходими Гуласал Қўчқорова ва кутубхоначи опалари мамнуният билан кутиб олишди Ахборот-кутубхона марказининг хизмат қилиш бўлими ходимаси Гуласал Қўчқорова Ахборот-кутубхона фаолияти, айни пайтдаги мавжуд китоб  жамғармаси, китобларнинг сақланиши ва улардан фойдаланиш тартиб-қоидалари ҳақида ўқувчиларга кенг  тушунчалар ва  маълумотлар берди. Шу билан бирга кутубхонанинг янги адабиётлар бўлимига келтирилган янги китоблар ҳақида ҳам зарур маълумотлар бериб, китобхон ёшларга соҳаларга оид бўлимларда жамланган болаларбоп адабиётларни ўқишни тавсия қилди. Хусусан, овқатланиш  гигиенеси, ўсмир ёшлар гигиенаси, шунингдек, атрофимиздаги олам билан боғлиқ воқеа-ҳодисалар ҳақидаги адабиётлар билан батафсил таништирди.

Шундан сўнг, “Юксак маънавиятли ёшлар – келажак пойдевори” грант лойиҳаси координатори, кутубхонага саёҳат ташкилотчиси, журналист ва шоира Робия ЙЎлдошева билан ўқувчи-ёшларнинг дилдан суҳбати ташкил этилди.

Робия Йўлдошева китобнинг ўз ҳаётида тутган ўрни, шахс сифатида шаклланишидаги юксак аҳамияти ҳақида сўз юритиб, китоб – инсонни тарбияловчи, орзулар сари етакловчи қудратли куч эканлигини таъкидлади. Китоб – энг яқин сирдош, маслаҳатгўй, йиқилганда суягувчи, ғам босганда дилга малҳам, толиққанда мадор, куч-қувват, кўнгил камларини тўлдиргувчи, қалб дардига малҳам, оби ҳаёт чашмаси, дея таърифлади у.

Дарвоқе, Ахборот-кутубхона марказининг айни пайтдаги китоб жамғармаси 64053 та бўлиб, шундан бадиий адабиётлар 46109, адабиётшуночликка оид китоблар 1305, табиий ва аниқ фанлар йўналишидаги илмий оммабоп ва назарий адабиётлар 5305 тани ташкил этади. Ахборот-кутубхонада китобларнинг электрон нусхалари ҳам мавжуд ва китобхонларга бу хизмат туридан фойдаланишлари учун зарур шароитлар яратилган.

Тадбир давомида ўқувчи-ёшлар турли саволлар билан мурожаат қилдилар ва масъуллар томонидан қониқарли жавоблар олдилар. Шу билан бирга кутубхонага уюштирилган саёҳатдан завқ-шавқ олганларини изҳор этдилар. Китобсевар ёшлар ўзбек, қорақалпоқ ва бошқа миллат ёзувчилари қаламларига мансуб бадиий адабиётларни мутолаа қилиш учун танлаб олдилар.

Кутубхонага саёҳат тадбири қизиқарли таассуротларга бой ва мароқли бўлди.

Рисолат ИБРАГИМОВА, 42-сонли мактабнинг ижодий-маданий масалалар бўйича тарғиботчиси.