TARGʻIBOT TADBIRIDA OʻZBEKISTON RESPUBLIKASI IIV QOShIDAGI AShULA VA RAQS ANSAMBLINING KONTsERT DASTURI NAMOYISh ETILDI

30-aprel kuni boʻlib oʻtadigan umumxalq referendumiga Amudaryo tumanida ham qizgʻin tayyorgarlik koʻrilmoqda. Shu bilan birga aholi oʻrtasidagi targʻibot tadbirlari ham koʻtarinki ruhda davom etmoqda.

19-aprel kuni tuman Madaniyat boʻlimida boʻlib oʻtgan navbatdagi targʻibot tadbirida Oʻzbekiston Respublikasi Ichki ishlar vazirligi qoshidagi ashula va raqs ansamblining kontsert dasturi ham namoyish etildi. Unda tuman Ichki ishlar boʻlimi xodimlari va ularning oila aʼzolari, tumanimizning faol yoshlari, mehnat faxriylari, taʼlim sohasi xodimlari va OAV vakillari qatnashishdi.

Tadbirda ishtirok etgan Oliy majlis Qonunchilik palatasi deputati Zumrad Bekatova hamda Qoraqalpogʻiston Respublikasi Joʻqorgʻi Kengesi deputati Sanobar Xoʻjamurodova, “Yosh kitobxon oila” tanlovining Oʻzbekiston Respublikasi bosqichi gʻolibi Umidbek Oʻrinboyevlar Umumxalq Referendumiga qoʻyilgan yangi tahrirdagi Konstitutsiya xususida soʻzlab, barchani muhim siyosiy jarayonda faol ishtirok etishga chaqirishdi.

Oliy majlis Qonunchilik palatasi deputati Zumrad Bekatova, Qoraqalpogʻiston Respublikasi Joʻqorgʻi Kengesi deputati Sanobar Xoʻjamurodova, “Yosh kitobxon oila” tanlovining Oʻzbekiston Respublikasi bosqichi gʻolibi Umidbek Oʻrinboyevlar Vatanimiz taqdiri va ravnaqi, inson qadri, yurtdoshlarimiz haq-huquqlari himoyasini oʻzida mujassam etgan Yangi Oʻzbekistonning Konstitutsiyaviy qonun loyihasi, mazkur hujjatning ahamiyati, muhim jihatlari haqida maʼlumotlar berib oʻtdi. Shuningdek, bir yilga yaqin vaqt davomida Asosiy Qonunimizni takomillashtirish borasida keng koʻlamli ishlar amalga oshirilgani, keng jamoatchilikning takliflari asosida maromiga yetkazilgani toʻgʻrisida keng toʻxtaldilar. Shuningdek, referendum va uni oʻtkazish tartib-qoidalari haqida ham tushunchalar berildi.

Shundan soʻng, tadbir Oʻzbekiston Respublikasi IIV qoshidagi ashula va raqs ansamblining kontsert dasturi bilan davom ettirildi. Ashula va raqs ansambli rahbari Uchqun Tillayev hamda soʻz ustalari Zokir Ochildiyev, Oʻtkir Muhammadxoʻjevlar ishtirokchilarga xushkayfiyat ulashishdi.

Xushovoz xonandalar Feruza Jumaniyozova va boshqalarning chiqishlari ishtirokchilariga juda manzur boʻldi hamda ularning yoshlik, muhabbat, ona yurt madhini tarannum etgan kuy-qoʻshiqlari davraga fayz kiritdi. Shoʻxchan ashulalar quvnoq raqslarga ulanib ketdi.

Shu oʻrinda aytib oʻtmoqchimizki, umumxalq muhokamasi natijasida ishlab chiqilgan qonun loyihasi referendum yoʻli bilan qabul qilinishinida yurt taqdiriga, uning kelajagiga befarq qaramaydigan har bir fuqaro faol ishtirok etishi kerak.

Zero, konstitutsiyaviy islohotlarda “inson – jamiyat – davlat” degan tamoyil ilgari surilayotgani mamlakatimizda inson qadri, haq-huquqlari, shaʼni har narsadan ustun ekanligini amalda namoyon etadi. Bosh qomusimizga kiritilayotgan oʻzgarishlarning butun mazmun-mohiyati aholining ijtimoiy va moddiy farovonligini taʼminlashga, inson huquqlarini hamma narsadan ustuvor qoʻyishga qaratilgan. Shunday ekan, barchamiz 30-aprel kuni oʻtkaziladigan Referendumda faol ishtirok etaylik, aziz yurtdoshlar!

Targʻibot tadbirida el sevgan sanʼatkorlarning chiqishlari tadbir ishtirokchilariga koʻtarinki kayfiyat baxsh etib, ularni xalq farovonligi hamda Vatan taraqqiyoti yoʻlida birlashishga chorladi.

O.Xudoyberganova.