ТАРҒИБОТ ТАДБИРИДА ЎЗБЕКИСТОН РЕСПУБЛИКАСИ ИИВ ҚОШИДАГИ АШУЛА ВА РАҚС АНСАМБЛИНИНГ КОНЦЕРТ ДАСТУРИ НАМОЙИШ ЭТИЛДИ

30 апрель куни бўлиб ўтадиган умумхалқ референдумига Амударё туманида ҳам қизғин тайёргарлик кўрилмоқда. Шу билан бирга аҳоли ўртасидаги тарғибот тадбирлари ҳам кўтаринки руҳда давом этмоқда.

19 апрель куни туман Маданият бўлимида бўлиб ўтган навбатдаги тарғибот тадбирида Ўзбекистон Республикаси Ички ишлар вазирлиги қошидаги ашула ва рақс ансамблининг концерт дастури ҳам намойиш этилди. Унда туман Ички ишлар бўлими ходимлари ва уларнинг оила аъзолари, туманимизнинг фаол ёшлари, меҳнат фахрийлари, таълим соҳаси ходимлари ва ОАВ вакиллари қатнашишди.

Тадбирда иштирок этган Олий мажлис Қонунчилик палатаси депутати Зумрад Бекатова ҳамда Қорақалпоғистон Республикаси Жўқорғи Кенгеси депутати Санобар Хўжамуродова, “Ёш китобхон оила” танловининг Ўзбекистон Республикаси босқичи ғолиби Умидбек Ўринбоевлар Умумхалқ Референдумига қўйилган янги таҳрирдаги Конституция хусусида сўзлаб, барчани муҳим сиёсий жараёнда фаол иштирок этишга чақиришди.

Олий мажлис Қонунчилик палатаси депутати Зумрад Бекатова, Қорақалпоғистон Республикаси Жўқорғи Кенгеси депутати Санобар Хўжамуродова, “Ёш китобхон оила” танловининг Ўзбекистон Республикаси босқичи ғолиби Умидбек Ўринбоевлар Ватанимиз тақдири ва равнақи, инсон қадри, юртдошларимиз ҳақ-ҳуқуқлари ҳимоясини ўзида мужассам этган Янги Ўзбекистоннинг Конституциявий қонун лойиҳаси, мазкур ҳужжатнинг аҳамияти, муҳим жиҳатлари ҳақида маълумотлар бериб ўтди. Шунингдек, бир йилга яқин вақт давомида Асосий Қонунимизни такомиллаштириш борасида кенг кўламли ишлар амалга оширилгани, кенг жамоатчиликнинг таклифлари асосида маромига етказилгани тўғрисида кенг тўхталдилар. Шунингдек, референдум ва уни ўтказиш тартиб-қоидалари ҳақида ҳам тушунчалар берилди.

Шундан сўнг, тадбир Ўзбекистон Республикаси ИИВ қошидаги ашула ва рақс ансамблининг концерт дастури билан давом эттирилди. Ашула ва рақс ансамбли раҳбари Учқун Тиллаев ҳамда сўз усталари Зокир Очилдиев, Ўткир Муҳаммадхўжевлар иштирокчиларга хушкайфият улашишди.

Хушовоз хонандалар Феруза Жуманиёзова ва бошқаларнинг чиқишлари иштирокчиларига жуда манзур бўлди ҳамда уларнинг ёшлик, муҳаббат, она юрт мадҳини тараннум этган куй-қўшиқлари даврага файз киритди. Шўхчан ашулалар қувноқ рақсларга уланиб кетди.

Шу ўринда айтиб ўтмоқчимизки, умумхалқ муҳокамаси натижасида ишлаб чиқилган қонун лойиҳаси референдум йўли билан қабул қилинишинида юрт тақдирига, унинг келажагига бефарқ қарамайдиган ҳар бир фуқаро фаол иштирок этиши керак.

Зеро, конституциявий ислоҳотларда “инсон – жамият – давлат” деган тамойил илгари сурилаётгани мамлакатимизда инсон қадри, ҳақ-ҳуқуқлари, шаъни ҳар нарсадан устун эканлигини амалда намоён этади. Бош қомусимизга киритилаётган ўзгаришларнинг бутун мазмун-моҳияти аҳолининг ижтимоий ва моддий фаровонлигини таъминлашга, инсон ҳуқуқларини ҳамма нарсадан устувор қўйишга қаратилган. Шундай экан, барчамиз 30 апрель куни ўтказиладиган Референдумда фаол иштирок этайлик, азиз юртдошлар!

Тарғибот тадбирида эл севган санъаткорларнинг чиқишлари тадбир иштирокчиларига кўтаринки кайфият бахш этиб, уларни халқ фаровонлиги ҳамда Ватан тараққиёти йўлида бирлашишга чорлади.

О.Худойберганова.