SIYoSIY PARTIYaLAR VAKILLARI IShTIROKIDA UMUMXALQ REFERENDUMI TARGʻIBOTIGA BAGʻIShLANGAN UChRAShUV OʻTKAZILDI

Shu kunlarda Amudaryo tumanining barcha qishloq va mahallalarida, oʻquv muassasalarida amaldagi Konstitutsiyamizga kiritilayotgan oʻzgartish va qoʻshimchalar yuzasidan “Yangi tahrirdagi Konstitutsiya – ijtimoiy davlat kafolati” mavzusida targʻibot-tashviqot tadbirlari, 30-aprel kuni boʻlib oʻtadigan umumxalq referendumini erkin, shaffoflik asosida oʻtkazishga bagʻishlangan uchrashuvlar, davra suhbatlari, oshkora muloqot tadbirlari oʻtkazilmoqda.

Shunisi eʼtiborliki, boʻlib oʻtayotgan bu kabi tadbirlarga aholi qatlamlarini keng jalb etish, har bir inson qalbida ona Vatanga, kelajak avlod va xalq baxt-saodati uchun daxldorlik hissini uygʻotishga qaratilgan biri-biridan qiziqarli maʼruzalar oʻqilayotgani saylovchilarga manzur boʻlmoqda. Ana shunday tadbirlardan biri joriy yilning 15-aprel sanasida Oʻzbekiston Respublikasi Prezidenti taʼlim muassasalari Agentligi tizimidagi Amudaryo tuman ixtisoslashtirilgan maktabi binosida ham oʻtkazildi.

“Yangi tahrirdagi Konstitutsiya – ijtimoiy davlat kafolati” mavzusidagi mazkur tadbir Oʻzbekiston Liberal-demokratik partiyasi Amudaryo tuman Kengashi hamda Prezident taʼlim muassasalari Agentligi tizimidagi Amudaryo tuman ixtisoslashtirilgan maktabi pedagogika jamoasi hamkorligida tashkil etildi.

Oshkora muloqot, ochiqlik va shaffoflik asosida oʻtkazilgan mazkur tadbirda Qoraqalpogʻiston Respublikasi Joʻqorgʻi Kengesi deputati, Oʻzbekiston Liberal-demokratik partiyasi tuman Kengashi apparat rahbari Yaxshimurod Ahmedov, Joʻqorgʻi Kenges deputati Quvonchboy Boymurodov, xalq deputatlari Amudaryo tuman Kengashi deputatlari Muqaddas Beknazarovva hamda Muyassar Rahmatullayeva, shuningdek, mamlakatimizda faoliyat olib borayotgan siyosiy partiyalar vakillari, umumxalq Referendumida birinchi marta ovoz beradigan yoshlar ishtirok etishdi.

Tashviqot tadbirida Oʻzbekiston Liberal-demokratik partiyasi Amudaryo tuman Kengashi apparat rahbari Yaxshimurod Ahmedov amaldagi Konstitutsiya bilan yangi tahrirdagi Konstitutsiyaning farqi, kiritilayotgan yangi normalar va oʻzgartishlar haqida batafsil toʻxtaldi.

Shundan soʻng, Qoraqalpogʻiston Respublikasi Joʻqorgʻi Kengesi deputati Quvonchboy Boymurodov Yangi tahrirdagi Konstitutsiya loyihasi haqida soʻz yuritib, yanada xalqparvar va ijtimoiy hayotni toʻliq qamrab olgan yangi normalar, xususan, 29-moddaga koʻra, huquqbuzarliklardan jabrlanganlarning huquqlari qonun bilan mustahkamlab qoʻyilgani, 30-moddaning 1-qismiga koʻra, hech kim rasmiy eʼlon qilinmagan qonun asosida javobgar boʻlishi, mol-mulkidan mahrum etilishi mumkin emasligi, 42-moddaning 3-qismida qayd etilganidek, ayollar mehnat huquqi toʻliq taʼminlanishi, 58-modda, 3-qismiga koʻra, ayollar bilan erkaklar uchun tenglik taqdim etilishi, shuningdek, zoʻravonlikning har qanday koʻrinishini cheklash qonuniy kafolatlanayotgani haqida yoshlarga keng tushunchalar berdi.

Tadbir davomida Xalq deputatlari Amudaryo tuman Kengashiga Oʻzbekiston Milliy tiklanish demokratik partiyasidan deputat Muyassar Rahmatullayeva yangilanayotgan Konstitutsiyaning 76-moddasi, 3-qismida oilaning toʻlaqonli rivojlanishi uchun ijtimoiy, iqtisodiy, huquqiy shart-sharoitlar yaratish mustahkamlab qoʻyilayotganini mamnuniyat bilan taʼkidladi.

Joriy 2023-yilning 1-yanvar holatiga mamlakatimizda 9 mln. oila mavjudligi roʻyxatga olinganini, bu oilalarning har bir aʼzosi bekam-u koʻst, obod va farovon hayot kechirishi uchun ularning hayotiy ehtiyojlarini qondirish, xususan, ipoteka va isteʼmol kreditlari olishlarida byurokratik toʻsiqlarga barham berish, chiroyli, koʻngildagidek turmush sharoitlariga ega boʻlishlarida zarur imkoniyatlar yaratish Konstitutsiyaviy mustahkamlab qoʻyilayotganini alohida qayd etdi.

Tadbirda Referendumda birinchi marta ovoz beradigan yoshlar masʼullarga savollar bilan murojaat qildilar va munosib javoblar oldilar. Boʻlib oʻtgan targʻibot-tashviqot tadbiri ochiqlik, shaffoflik asosida, bahs-munozaralarga boy va qiziqarli boʻldi.

Tadbir yakunida Amudaryo tuman turizm va madaniyat boʻlimi sanʼatkorlari tomonidan kontsert dasturi namoyish etildi.

Robiya YOʻLDOShEVA, Ravshan BAHROMOV.