СИЁСИЙ ПАРТИЯЛАР ВАКИЛЛАРИ ИШТИРОКИДА УМУМХАЛҚ РЕФЕРЕНДУМИ ТАРҒИБОТИГА БАҒИШЛАНГАН УЧРАШУВ ЎТКАЗИЛДИ

Шу кунларда Амударё туманининг барча қишлоқ ва маҳаллаларида, ўқув муассасаларида амалдаги Конституциямизга киритилаётган ўзгартиш ва қўшимчалар юзасидан “Янги таҳрирдаги Конституция – ижтимоий давлат кафолати” мавзусида тарғибот-ташвиқот тадбирлари, 30 апрель куни бўлиб ўтадиган умумхалқ референдумини эркин, шаффофлик асосида ўтказишга бағишланган учрашувлар, давра суҳбатлари, ошкора мулоқот тадбирлари ўтказилмоқда.

Шуниси эътиборлики, бўлиб ўтаётган бу каби тадбирларга аҳоли қатламларини кенг жалб этиш, ҳар бир инсон қалбида она Ватанга, келажак авлод ва халқ бахт-саодати учун дахлдорлик ҳиссини уйғотишга қаратилган бири-биридан қизиқарли маърузалар ўқилаётгани сайловчиларга манзур бўлмоқда. Ана шундай тадбирлардан бири жорий йилнинг 15 апрель санасида Ўзбекистон Республикаси Президенти таълим муассасалари Агентлиги тизимидаги Амударё туман ихтисослаштирилган мактаби биносида ҳам ўтказилди.

“Янги таҳрирдаги Конституция – ижтимоий давлат кафолати” мавзусидаги мазкур тадбир Ўзбекистон Либерал-демократик партияси Амударё туман Кенгаши ҳамда Президент таълим муассасалари Агентлиги тизимидаги Амударё туман ихтисослаштирилган мактаби педагогика жамоаси ҳамкорлигида ташкил этилди.

Ошкора мулоқот, очиқлик ва шаффофлик асосида ўтказилган мазкур тадбирда Қорақалпоғистон Республикаси Жўқорғи Кенгеси депутати, Ўзбекистон Либерал-демократик партияси туман Кенгаши аппарат раҳбари Яхшимурод Аҳмедов, Жўқорғи Кенгес депутати Қувончбой Боймуродов, халқ депутатлари Амударё туман Кенгаши депутатлари Муқаддас Бекназаровва ҳамда Муяссар Раҳматуллаева, шунингдек, мамлакатимизда фаолият олиб бораётган сиёсий партиялар вакиллари, умумхалқ Референдумида биринчи марта овоз берадиган ёшлар иштирок этишди.

Ташвиқот тадбирида Ўзбекистон Либерал-демократик партияси Амударё туман Кенгаши аппарат раҳбари Яхшимурод Аҳмедов амалдаги Конституция билан янги таҳрирдаги Конституциянинг фарқи, киритилаётган янги нормалар ва ўзгартишлар ҳақида батафсил тўхталди.

Шундан сўнг, Қорақалпоғистон Республикаси Жўқорғи Кенгеси депутати Қувончбой Боймуродов Янги таҳрирдаги Конституция лойиҳаси ҳақида сўз юритиб, янада халқпарвар ва ижтимоий ҳаётни тўлиқ қамраб олган янги нормалар, хусусан, 29-моддага кўра, ҳуқуқбузарликлардан жабрланганларнинг ҳуқуқлари қонун билан мустаҳкамлаб қўйилгани, 30-модданинг 1-қисмига кўра, ҳеч ким расмий эълон қилинмаган қонун асосида жавобгар бўлиши, мол-мулкидан маҳрум этилиши мумкин эмаслиги, 42-модданинг 3-қисмида қайд этилганидек, аёллар меҳнат ҳуқуқи тўлиқ таъминланиши, 58-модда, 3-қисмига кўра, аёллар билан эркаклар учун тенглик тақдим этилиши, шунингдек, зўравонликнинг ҳар қандай кўринишини чеклаш қонуний кафолатланаётгани ҳақида ёшларга кенг тушунчалар берди.

Тадбир давомида Халқ депутатлари Амударё туман Кенгашига Ўзбекистон Миллий тикланиш демократик партиясидан депутат Муяссар Раҳматуллаева янгиланаётган Конституциянинг 76-моддаси, 3-қисмида оиланинг тўлақонли ривожланиши учун ижтимоий, иқтисодий, ҳуқуқий шарт-шароитлар яратиш мустаҳкамлаб қўйилаётганини мамнуният билан таъкидлади.

Жорий 2023 йилнинг 1 январь ҳолатига мамлакатимизда 9 млн. оила мавжудлиги рўйхатга олинганини, бу оилаларнинг ҳар бир аъзоси бекам-у кўст, обод ва фаровон ҳаёт кечириши учун уларнинг ҳаётий эҳтиёжларини қондириш, хусусан, ипотека ва истеъмол кредитлари олишларида бюрократик тўсиқларга барҳам бериш, чиройли, кўнгилдагидек турмуш шароитларига эга бўлишларида зарур имкониятлар яратиш Конституциявий мустаҳкамлаб қўйилаётганини алоҳида қайд этди.

Тадбирда Референдумда биринчи марта овоз берадиган ёшлар масъулларга саволлар билан мурожаат қилдилар ва муносиб жавоблар олдилар. Бўлиб ўтган тарғибот-ташвиқот тадбири очиқлик, шаффофлик асосида, баҳс-мунозараларга бой ва қизиқарли бўлди.

Тадбир якунида Амударё туман туризм ва маданият бўлими санъаткорлари томонидан концерт дастури намойиш этилди.

Робия ЙЎЛДОШЕВА, Равшан БАҲРОМОВ.