Roʻzadorlar uchun iftorlik dasturxoni yozildi

Ramazon oyi nafaqat ibodat, Yaratganning ajru savoblariga erishish, balki xayru saxovat, insonlar oʻrtasida mehr-oqibat rishtalarini mustahkamlovchi muborak oydir. Prezidentimizning “Muborak Ramazon oyini munosib tarzda oʻtkazish toʻgʻrisida”gi qarori, unda belgilab berilgan vazifalar ijrosi doirasida Amudaryo tumanida roʻzadorlar ishtirokida mehr-muruvvat, saxovat tadbirlari amalga oshirilyapti.

Tumandagi barcha mahallalarda roʻzadorlar uchun iftorlik dasturxonlari yozilib, ijtimoiy himoyaga muhtoj oilalar holidan xabar olinmoqda, sovgʻalar ulashilmoqda.

Tumandagi eng soʻnggi xizmat koʻrsatish obʼektlaridan biri boʻlgan “Sher” toʻyxonasida Beruniy va Olmazor mahallasida istiqomat qiluvchi roʻzadorlar uchun iftorlik dasturxonlari yozildi. Dasturxon roʻzadorlar uchun yozilgan noz-neʼmatlar bilan toʻldi.

Iftorlikda tuman hokimi Sultonboy Yoʻldashev ham ishtirok etdi.

Fayzli dasturxon atrofida kechgan suhbatlar jarayonida Ramazon oyining fazilatlari haqida soʻz yuritildi. Yurtimizga tinchlik, oilalarimizga totuvlik, roʻzgʻorlarimizga baraka tilab duolar qilindi. Darhaqiqat, ushbu oyni oylarning sultoni deb bekorga aytishmaydi. Bu oyda gunohlar kechirilib, inson nafsini jilovlaydi.

Kimdir, bu bebaho va betakror toat-ibodat mavsumida oʻzini har tomonlama isloh etib, xatolarini tuzatish, hasad, ginayu kudurat, xusumat kabi maʼnaviy illatlardan qalbini musaffo etib, oʻzi uchun pokiza hayot sahifasini ochishni maqsad qilgan boʻlsa, yana kimdir xayrli ishlar uchun boshqa vaqtlardagidan koʻra koʻproq ajru savoblar beriladigan bu qimmatli fursatlarni gʻanimat bilib, mehru muruvvat, saxovat va silai rahm kabi olijanob ishlarni koʻproq amalga oshirishga intiladi.

Qadimdan musulmonlar Ramazon kirganda har galgidan saxovatliroq boʻlishga odatlanganlar. Davlatmand kishilar zakotlarini ham aynan Ramazonda ado etishlari ham shundandir. Bu oyning barakasidan har bir uy bahramand boʻlib, moʻminlar qalbiga xursandlik va shodlik kirsin uchun odamlar alohida Ramazonga xos xayru ehsonlari bilan bir qatorda zakotlarini ham shu oyda chiqaradilar.

Ehson marosimida soʻzga chiqqanlar muqaddas mohi Ramazon kunlarida muhtojlarga mehr-oqibat, xayr-saxovat koʻrsatish xalqimizga xos fazilat ekanligini taʼkidladilar. Muborak oy davomida miskinlar holidan xabar olish, ehtiyojmandlarga xayr-ehsonlar berish savobli amallardan sanalishi, zero, Ramazon insonlarni oʻzaro mehr-oqibatli boʻlishga, keksalar va bemorlar, yaqinlar holidan xabar olishga, muhtojlarga saxovat qilishga chaqirishi alohida taʼkidlandi.

Ehson marosimiga toʻplanganlar iftorlikda tuman bosh imom-xatibi Abdurahmon Matsafoyevning Ramazoni sharif shukuhi, ushbu oyning fazilatlari haqidagi maʼruzalarini tinglashdi. Marosimda Qurʼon oyatlari oʻqilib, mamlakatimizda xalq farovonligi yoʻlida xizmat qilib oʻtganlar haqiga, yurtimiz tinch, osmonimiz musaffo boʻlishi, xonadonlarimizda hamisha tinchlik hukm surishi, moʻl va barakali rizq tilab, duolar qilindi.

Ovul va mahallalarida bu kabi xayr-ehson tadbirlari Ramazon oyining soʻnggi kunigacha davom etadi.

Tuman hokimligining Axborot xizmati.