Bojxona qoʻmitasi tashabbusi bilan ehtiyojmand aholi vakillari va nuroniylar uchun iftorlik dasturxoni yozildi

Mamlakatimizda muborak Ramazon oyini munosib tarzda oʻtkazishga qaratilgan keng koʻlamli ishlar izchil davom etmoqda. Davlatimiz rahbarining “Muborak Ramazon oyini munosib tarzda oʻtkazish toʻgʻrisida”gi qarori asosida bu yil ushbu muborak oy “Ramazon – mehr-muruvvat, ahillik va shukronalik oyi” gʻoyasi ostida tashkil oʻtkazilmoqda. Ushbu ezgu tashabbusdan koʻzlangan asosiy maqsad — xalqimizga xos insonparvarlik, bagʻrikenglik, saxovat va oʻzaro hurmat kabi qadriyatlarni yanada mustahkamlash, ularni keng targʻib etishdan iborat.

Qaror ijrosi doirasida joylarda iftorlik dasturxonlari yozilib, xayriya tadbirlari oʻtkazilmoqda. Bunday tadbirlar nafaqat diniy-maʼnaviy ahamiyatga ega, balki aholi oʻrtasida oʻzaro hamjihatlik va birdamlik muhitini kuchaytirishga xizmat qilmoqda. Ayniqsa, ehtiyojmand oilalar, keksa insonlar va jismoniy imkoniyati cheklangan fuqarolarga koʻrsatilayotgan eʼtibor jamiyatda ijtimoiy himoya tamoyillarining mustahkamlanishiga zamin yaratayapti.

Ramazon oyi munosabati bilan Bojxona qoʻmitasi tashabbusi asosida Qoraqalpogʻiston Respublikasining Amudaryo, Beruniy va Toʻrtkoʻl tumanlarida ehtiyojmand aholi vakillari uchun iftorlik tadbirlari tashkil etildi. Ushbu xayrli amallar orqali yuzlab fuqarolar bir dasturxon atrofida jam boʻlib, muborak oyning fayzidan bahramand boʻlishdi. Tadbirlarda nuroniylar, keng jamoatchilik vakillari hamda sohada faoliyat yuritayotgan masʼul xodimlar ishtirok etdi.

Amudaryo tumani tashkil qilingan iftorlik marosimida soʻz olganlar yurtdoshlarimizni muqaddas Ramazon oyi bilan samimiy qutlab, amalga oshirilayotgan xayriya tadbirlari insonlar oʻrtasida mehr-oqibat rishtalarini yanada mustahkamlashga xizmat qilayotganini taʼkidladilar. Shuningdek, Ramazon oyining maʼnaviy fazilatlari, saxovat va shukronalikning inson hayotidagi oʻrni haqida fikr-mulohazalar bildirildi. Aytib oʻtilganidek, bu oy nafaqat roʻza tutish, balki ezgu amallar qilish, muhtojlarga koʻmak berish, qalblarni yaqinlashtirish oyidir.

Tadbir davomida duoga ochilgan qoʻllar, keksalarning samimiy tilaklari va ezgu niyatlari iftorlik dasturxoniga alohida fayz bagʻishladi. Yoshi ulugʻ insonlarning duolari ishtirokchilar qalbida iliq tuygʻular uygʻotdi. Bunday samimiy muhit jamiyatda oʻzaro hurmat va bagʻrikenglik muhitini yanada mustahkamlashga xizmat qiladi.

Muhimi, mazkur xayrli tadbirlar faqat alohida hududlar bilan cheklanib qolmayapti. Respublika boʻylab turli tashkilot va idoralar tomonidan ehtiyojmand aholi qatlamlarini qoʻllab-quvvatlashga qaratilgan iftorlik va xayriya aktsiyalari izchil davom ettirilmoqda. Bu esa Ramazon oyining mazmun-mohiyati — mehr-muruvvat va shukronalik gʻoyalari amalda oʻz ifodasini topayotganini koʻrsatadi.

Prezidentimizning “Muborak Ramazon oyini munosib tarzda oʻtkazish toʻgʻrisida”gi qarorida qayd qilinganidek, keyingi yillarda mamlakatimizda inson qadri, huquq va manfaatlarini taʼminlash, jamiyatimizda tinchlik, doʻstlik va hamjihatlik muhitini mustahkamlash, aholi, ayniqsa, ehtiyojmand toifalarni ijtimoiy himoya qilish borasida amalga oshirilayotgan keng koʻlamli islohotlar tufayli muqaddas islom dinining insonparvarlik mohiyati, oʻzaro ahillik, saxovat va shukronalik gʻoyalarini oʻzida mujassam etgan muborak Ramazon oyi xalqimiz qalbiga yanada yaqin va moʻʼtabar ayyomga aylanmoqda. Ushbu maʼtabar va muborak ayyom munosabati bilan yozilgan iftorlik dasturxoni ham mana shu xayrli ishlarning amaliy ifodasi boʻldi.

Muborak Ramazon oyini yuqori saviyada tashkil etish, ehtiyojmandlarga yordam koʻrsatish va milliy qadriyatlarimizni asrab-avaylashga qaratilgan bu kabi ezgu ishlar jamiyatimizda insonparvarlik tamoyillarini yanada mustahkamlashga hissa qoʻshmoqda.