Yangilanayotgan Konstitutsiya targʻibotiga bagʻishlangan yigʻilish oʻtkazildi

7-aprel kuni Amudaryo tumani hokimligining majlislar zalida Yangilanayotgan Konstitutsiyaning mazmun-mohiyati va ahamiyatiga bagʻishlangan yigʻilish oʻtkazildi.

Yigʻilishda tuman hokimi Sultonboy Yoʻldashev, Qoraqalpogʻiston Respublikasi Vazirlar Kengashi Raisi oʻrinbosari Maryam Ahmedova, Oliy Majlis Qonunchilik palatasi deputati Zumrad Bekatova hamda mahalla raislari, hokim yordamchilari, xotin-qizlar faoli, yoshlar yetakchilari ishtirok etishdi.

Yigʻilishni tuman hokimi Sultonboy Yoʻldashev ochdi va olib bordi.

Maʼlumki, Oliy Majlis Qonunchilik palatasi yangi tahrirdagi “Oʻzbekiston Respublikasi Konstitutsiyasi toʻgʻrisida”gi qonunni qabul qildi. Qonun 30-aprel, yakshanba kuni boʻlib oʻtadigan umumxalq referendumida ovozga qoʻyiladi. Ushbu muhim siyosiy jarayonda barchani faol ishtirok etishga, fuqarolarning oʻz hayotiga, farzandlari kelajagiga befarq boʻlmaslikka chaqirsh maqsadida oʻtkazilgan yigʻilishda Vazirlar Kengashi Raisi oʻrinbosari Maryam Ahmedova Konstitutsiyaviy qonunning mazmuni va ahamiyati haqida batafsil maʼlumot berdi.

Yangi tahrirga asosan, Oʻzbekiston Respublikasi Konstitutsiyasidagi moddalar soni hozirgi 128 tadan 155 taga, undagi normalar esa 275 tadan 434 taga oshirilmoqda, 128 ta moddaning 91 tasiga kontseptual oʻzgarishlar kiritilayotir. Umuman olganda, Konstitutsiya 65 foizga yangilanmoqda.

Oliy Majlis Qonunchilik palatasi deputati Zumrad Bekatova Oʻzbekiston Respublikasining yangi tahrirdagi konstitutsiyasi ijtimoiy adolat, erkinlik va tenglik tushunchalari bilan chambarchas bogʻliq boʻlib, inson va davlatning huquqiy holatini belgilashda inson huquqlari ustuvorligiga tayanganini taʼkidladi.

Shuningdek, yoshlar mamlakati boʻlgan Oʻzbekistonda Yangi Qomusimizning 79-moddasida “Davlat yoshlarning shaxsiy, siyosiy, iqtisodiy, ijtimoiy, madaniy, ekologik huquqlari himoya qilinishini taʼminlaydi, ularning jamiyat va davlat hayotida faol ishtirok etishini ragʻbatlantiradi. Davlat yoshlarning intelektual, ijodiy, jismoniy va ahloqiy jihatdan shakllanishi va rivojlanishi uchun, ularning taʼlim olishiga, sogʻligʻini saqlashda, uy-joyga, ishga joylashishga, bandlik va dam olishga boʻlgan huquqlarini amalga oshirish uchun shart-sharoitlar yaratadi” deya belgilangani yoshlar kelajagi uchun mustahkam huquqiy poydevor boʻladi.

Yigʻilish davomida soʻzga chiqqanlar “Oʻzbekiston Respublikasi Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasining matni 2022-yil 25-iyundan 1-avgustga qadar oʻtkazilgan umumxalq muhokamasida va undan keyingi jarayonlarda kelib tushgan takliflar, fikr-mulohazalarni inobatga olgan holda maromiga yetkazilganligini, Konstitutsiyani koʻp millatli xalqimiz birgalikda yaratganini taʼkidlashib, barchani 30-aprel kuni hamjihat va hamfikr boʻlib kelajagimiz uchun ovoz berishga chorladilar.

Darhaqiqat, yangilanayotgan Bosh Qomusimizda inson va fuqarolarning huquq, erkinlik va majburiyatlari tenglik hamda teng huquqlilik asosida amalga oshiriladi. Shunday ekan, uning har bir moddasiga inson qadr-qimmatini himoyalaydigan, Yangi Oʻzbekistonning yangi taraqqiyot yoʻnalishlarini belgilab beradigan muhim vosita sifatida qaragan holda Referendumda faol ishtirok etaylik, aziz yurtdoshlar!

Tuman hokimligining Axborot xizmati.