AMUDARYoDA "SALOMATLIK SAYILLARI" OYLIGI DOIRASIDA TIBBIY KOʻRIK OʻTKAZILDI

Mamlakatimiz boʻylab "Salomatlik sayillari"ga start berildi. Shu munosabat bilan ayni kunlarda Sogʻliqni saqlash vazirligi tashabbusiga koʻra barcha hududlarda "Salomatlik sayillari" oyligi boʻlib oʻtmoqda. Xuddi shunday tadbir Amudaryo tumanidagi Tibbiyot birlashmasida ham tashkil etildi.

Tuman Tibbiyot birlashmasining Tez tibbiy yordam boʻlimi binosi oldida boʻlib oʻtgan sayilda Tashkent va Nukus shahridagi Respublika tibbiyot muassasalaridan turli mutaxassisliklar boʻyicha yuqori malakaga ega boʻlgan tibbiyot xodimlari va mahalliy shifokorlar ishtirok etishdi. Ushbu aktsiya doirasida respublika ixtisoslashtirilgan tibbiyot markazlarining malakali va yetakchi mutaxassislari sayilga tashrif buyurgan tuman aholisi, ayniqsa, ijtimoiy himoyaga muhtoj, surunkali kasalligi bor bemorlar muammolarini oʻrgandi.

Taʼkidlash joizki, Uzbekiston Respublikasi Sogʻliqni saqlash vazirining 2023-yil 28-martdagi tegishli buyrugʻiga asosan mamlakatimizdagi jami 208 ta tuman va shaharda respublikadan jalb qilingan 300 nafarga yaqin nufuzli mutaxassislar, shuningdek, 17,5 ming tibbiy brigada va 175 ming nafardan ziyod mahalliy shifokorlar ishtirokida profilaktik tibbiy koʻriklar, skrining dasturlari va sogʻlomlashtirish tadbirlari tashkil etilmoqda. Salomatlik sayillari har bir hududda ikki bosqichda tashkil etilib, ijtimoiy himoyaga muhtoj, surunkali kasalligi bor bemorlarni hududlarning oʻzida belgilangan tartibda yuqori texnologik muolajalar orqali sogʻlomlashtirish choralari koʻrilmoqda.

Tumanimizda boʻlib oʻtgan tibbiy koʻrik jarayonida 19 ta yoʻnalish boʻyicha mutaxassislar, qoʻshimcha koʻchma rengen, koʻchma mammografiya, oftalmologiya mobil poliklinikalari hamda mahalliy shifokorlar tomonidan 1-18 yoshgacha boʻlgan bolalar, 18-40 yoshgacha boʻlgan fuqarolar, 15 yoshdan 49 yoshgacha boʻlgan fertil yoshidagi ayollar chuqurlashtirilgan tibbiy koʻrikdan oʻtkazildi. Shuningdek, bolalar gelmintoz, onkogematologik, 40 va undan katta yoshdagi fuqarolar yuqumli boʻlmagan, 35 yoshdan katta ayollar onkologik kasalliklarni erta bosqichlarda aniqlash va ularga profilaktik yordam koʻrsatish maqsadida skrining koʻriklarga jalb etildi. Koʻriklarda 1303 nafar aholi qatnashdi.

 Tekshiruvlar natijasida kasalliklar aniqlangan fuqarolar uchun individual sogʻlomlashtirish rejasi tuzildi. Tuman va Respublika darajasida 856 nafar fuqaro ambulator, 131 nafar fuqaro statsionar hamda 21 nafar bemorga davolanishga bepul yoʻllanmalar rasmiylashtirildi. Shuningdek, ijtimoiy himoyaga muhtoj, surunkali xastaligi bor bemorlar ixtisoslashtirilgan markazlarning malakali mutaxassislari tomonidan hududning oʻzida yuqori texnologik muolajalar orqali sogʻlomlashtirilishi belgilandi.

Salomatlik sayliga kelgan fuqarolarga sogʻlom turmush tarzi, toʻgʻri ovqatlanish, jismoniy faollik va kasalliklar profilikatikasi boʻyicha koʻrgazmali materiallar asosida tushuntirishlar berilib, targʻibot ishlari ham olib borildi. Yuqumli boʻlmagan kasalliklar sabab sogʻligʻida muammosi bor fuqarolarga tavsiya va maslahatlar berildi.

Tadbirga tashrif buyurgan amudaryoliklar malakali shifokorlar tomonidan oʻtkazilgan koʻrik davomida bepul tibbiy xizmatlardan foydalanishdi, oʻzlariga salomatliklari boʻyicha muhim tavsiya va maslahatlar bergan tibbiyot xodimlaridan juda minnatdor boʻlishdi.

F.Abdullayev, tuman Tibbiyot birlashmasi boshligʻi.