АМУДАРЁДА "САЛОМАТЛИК САЙИЛЛАРИ" ОЙЛИГИ ДОИРАСИДА ТИББИЙ КЎРИК ЎТКАЗИЛДИ

Мамлакатимиз бўйлаб "Саломатлик сайиллари"га старт берилди. Шу муносабат билан айни кунларда Соғлиқни сақлаш вазирлиги ташаббусига кўра барча ҳудудларда "Саломатлик сайиллари" ойлиги бўлиб ўтмоқда. Худди шундай тадбир Амударё туманидаги Тиббиёт бирлашмасида ҳам ташкил этилди.

Туман Тиббиёт бирлашмасининг Тез тиббий ёрдам бўлими биноси олдида бўлиб ўтган сайилда Ташкент ва Нукус шаҳридаги Республика тиббиёт муассасаларидан турли мутахассисликлар бўйича юқори малакага эга бўлган тиббиёт ходимлари ва маҳаллий шифокорлар иштирок этишди. Ушбу акция доирасида республика ихтисослаштирилган тиббиёт марказларининг малакали ва етакчи мутахассислари сайилга ташриф буюрган туман аҳолиси, айниқса, ижтимоий ҳимояга муҳтож, сурункали касаллиги бор беморлар муаммоларини ўрганди.

Таъкидлаш жоизки, Ӯзбекистон Республикаси Соғлиқни сақлаш вазирининг 2023 йил 28 мартдаги тегишли буйруғига асосан мамлакатимиздаги жами 208 та туман ва шаҳарда республикадан жалб қилинган 300 нафарга яқин нуфузли мутахассислар, шунингдек, 17,5 минг тиббий бригада ва 175 минг нафардан зиёд маҳаллий шифокорлар иштирокида профилактик тиббий кўриклар, скрининг дастурлари ва соғломлаштириш тадбирлари ташкил этилмоқда. Саломатлик сайиллари ҳар бир ҳудудда икки босқичда ташкил этилиб, ижтимоий ҳимояга муҳтож, сурункали касаллиги бор беморларни ҳудудларнинг ўзида белгиланган тартибда юқори технологик муолажалар орқали соғломлаштириш чоралари кўрилмоқда.

Туманимизда бўлиб ўтган тиббий кўрик жараёнида 19 та йўналиш бўйича мутахассислар, қўшимча кўчма ренген, кўчма маммография, офтальмология мобиль поликлиникалари ҳамда маҳаллий шифокорлар томонидан 1-18 ёшгача бўлган болалар, 18-40 ёшгача бўлган фуқаролар, 15 ёшдан 49 ёшгача бўлган фертиль ёшидаги аёллар чуқурлаштирилган тиббий кўрикдан ўтказилди. Шунингдек, болалар гельминтоз, онкогематологик, 40 ва ундан катта ёшдаги фуқаролар юқумли бўлмаган, 35 ёшдан катта аёллар онкологик касалликларни эрта босқичларда аниқлаш ва уларга профилактик ёрдам кўрсатиш мақсадида скрининг кўрикларга жалб этилди. Кўрикларда 1303 нафар аҳоли қатнашди.

 Текширувлар натижасида касалликлар аниқланган фуқаролар учун индивидуал соғломлаштириш режаси тузилди. Туман ва Республика даражасида 856 нафар фуқаро амбулатор, 131 нафар фуқаро стационар ҳамда 21 нафар беморга даволанишга бепул йўлланмалар расмийлаштирилди. Шунингдек, ижтимоий ҳимояга муҳтож, сурункали хасталиги бор беморлар ихтисослаштирилган марказларнинг малакали мутахассислари томонидан ҳудуднинг ўзида юқори технологик муолажалар орқали соғломлаштирилиши белгиланди.

Саломатлик сайлига келган фуқароларга соғлом турмуш тарзи, тўғри овқатланиш, жисмоний фаоллик ва касалликлар профиликатикаси бўйича кўргазмали материаллар асосида тушунтиришлар берилиб, тарғибот ишлари ҳам олиб борилди. Юқумли бўлмаган касалликлар сабаб соғлиғида муаммоси бор фуқароларга тавсия ва маслаҳатлар берилди.

Тадбирга ташриф буюрган амударёликлар малакали шифокорлар томонидан ўтказилган кўрик давомида бепул тиббий хизматлардан фойдаланишди, ўзларига саломатликлари бўйича муҳим тавсия ва маслаҳатлар берган тиббиёт ходимларидан жуда миннатдор бўлишди.

Ф.Абдуллаев, туман Тиббиёт бирлашмаси бошлиғи.