“Obod va xavfsiz mahalla” tamoyilini hayotga tatbiq qilish masalasida yigʻilish oʻtkazildi

Davlat muttasil rivojlanar ekan, huquqbuzarliklarni sodir etish turlari ham murakkablashib boradi. Shu bois, bugun mamlakatimizda huquqbuzarliklar profilaktikasini samarali tashkil etish va amalga oshirish nafaqat ichki ishlar organlarining, balki huquqni muhofaza qiluvchi barcha tashkilotlar faoliyatining muhim yoʻnalishlaridan biri sanaladi.

4-aprel kuni Amudaryo tumani hokimligining katta majlislar zalida Oʻzbekiston Respublikasi Ichki ishlar vazirligi akademiyasi boshligʻi oʻrinbosari, polkovnik Oybek Kamolov ishtirokida yigʻilish boʻlib oʻtdi.

Yigʻilishda tumandagi fuqarolar yigʻini raislari, profilaktika inspektorlari, hokim yordamchilari, xotin-qizlar faollari hamda yoshlar yetakchilari ham ishtirok etishdi.

Yigʻilishni tuman hokimi Sultonboy Yoʻldashev olib bordi. Yigʻilishda Oʻzbekiston Respublikasi Ichki ishlar vazirligi, Oʻzbekiston Respublikasi kambagʻallikni qisqartirish va bandlik vazirligi, Oʻzbekiston Respublikasi Yoshlar siyosati va sport vazirligining 2023-yil 30-mart kungi “Obod va xavfsiz mahalla” tamoyili asosida Respublika mahallalarida xavfsiz muhitni yaratish mexanizmlarini belgilash toʻgʻrisida”gi qoʻshma qarorining mazmun-mohiyati keng tarzda tushuntirildi.

Unda Oʻzbekiston Respublikasi Ichki ishlar vazirligi akademiyasi boshligʻi oʻrinbosari, polkovnik Oybek Kamolov huquqbuzarliklarning barvaqt oldini olish va jinoyatchilikka qarshi kurashish sohasidagi islohotlarning bugungi holati, huquqbuzarliklar profilaktikasi va jinoyatchilikka qarshi kurashishda mahalla va mahallalardagi yoshlar yetakchilari, hokim yordamchilari, xotin-qizlar faollari hamda profilaktika inspektorlarining oʻrni haqida soʻz yuritdi. Shuningdek, “Obod va xavfsiz mahalla” tamoyili asosida ishlashni tashkil qilish va uni amalga oshirish mexanizmlari haqida maʼlumot berildi.

Bunda avvalo, ijtimoiy profilaktika obʼekti boʻlgan shaxslar toifasiga bandligi taʼminlanmagan, mehnatga layoqatli va doimiy daromad manbaiga ega boʻlmaganlar, alkogol, qimor, tavakkalchilikka ruju qoʻygan yoshlar, nizoli oilalar hamda boshqa salbiy illatlarga ega boʻlgan shaxslar kiritilishi aytib oʻtildi.

Endilikda mana shunday fuqarolarni barvaqt aniqlash va ularning jinoyat yoki huquqbuzarlik sodir etishiga yoʻl qoʻymaslik maqsadida profilaktika inspektori aholini “xonadonbay” va “fuqarobay” oʻrganishi zarurligi taʼkidlandi.

Mahalla raislari va xotin-qizlar faollari oʻz mahallasidagi nizoli oilalar bilan muntazam ravishda muloqotni yoʻlga qoʻyishi, ularni yarashtirishga erishishi lozimligi ham qayd etib oʻtildi.

Taʼkidlanganidek, hokim yordamchisi bandligi taʼminlanmagan aholining ish bilan band boʻlishiga, doimiy daromad manbaiga ega boʻlishiga koʻmaklashishi zarur. Yoshlar etakchisi esa, yoshlar bilan tizimli ravishda ishlashishi, ularning boʻsh vaqtini mazmunli oʻtkazib, har xil qimor oʻyinlari va alkogol mahsulotlariga ruju qoʻyishining oldini olishi zarur.

Qoraqalpogʻiston Respublikasida yangidan tatbiq qilinayotgan huquqbuzarliklar profilaktikasi va jinoyatchilikka qarshi kurashish, ichki ishlar organlarining, fuqarolarning oʻzini oʻzi boshqarish organlari va fuqarolik jamiyatining boshqa institutlari bilan oʻzaro hamkorlik toʻgʻrisida imzolangan “Mahallalarda xavfsiz muhitni yaratish mexanizmlarini belgilash toʻgʻrisida”gi qoʻshma qarori oʻylaymizki, mahallalar obodligi va osudaligi, fuqarolar xavfsizligini taʼminlashda muhim omil boʻlib xizmat qiladi.

Tuman hokimligining Axborot xizmati.