“Обод ва хавфсиз маҳалла” тамойилини ҳаётга татбиқ қилиш масаласида йиғилиш ўтказилди

Давлат муттасил ривожланар экан, ҳуқуқбузарликларни содир этиш турлари ҳам мураккаблашиб боради. Шу боис, бугун мамлакатимизда ҳуқуқбузарликлар профилактикасини самарали ташкил этиш ва амалга ошириш нафақат ички ишлар органларининг, балки ҳуқуқни муҳофаза қилувчи барча ташкилотлар фаолиятининг муҳим йўналишларидан бири саналади.

4 апрель куни Амударё тумани ҳокимлигининг катта мажлислар залида Ўзбекистон Республикаси Ички ишлар вазирлиги академияси бошлиғи ўринбосари, полковник Ойбек Камолов иштирокида йиғилиш бўлиб ўтди.

Йиғилишда тумандаги фуқаролар йиғини раислари, профилактика инспекторлари, ҳоким ёрдамчилари, хотин-қизлар фаоллари ҳамда ёшлар етакчилари ҳам иштирок этишди.

Йиғилишни туман ҳокими Султонбой Йўлдашев олиб борди. Йиғилишда Ўзбекистон Республикаси Ички ишлар вазирлиги, Ўзбекистон Республикаси камбағалликни қисқартириш ва бандлик вазирлиги, Ўзбекистон Республикаси Ёшлар сиёсати ва спорт вазирлигининг 2023 йил 30 март кунги “Обод ва хавфсиз маҳалла” тамойили асосида Республика маҳаллаларида хавфсиз муҳитни яратиш механизмларини белгилаш тўғрисида”ги қўшма қарорининг мазмун-моҳияти кенг тарзда тушунтирилди.

Унда Ўзбекистон Республикаси Ички ишлар вазирлиги академияси бошлиғи ўринбосари, полковник Ойбек Камолов ҳуқуқбузарликларнинг барвақт олдини олиш ва жиноятчиликка қарши курашиш соҳасидаги ислоҳотларнинг бугунги ҳолати, ҳуқуқбузарликлар профилактикаси ва жиноятчиликка қарши курашишда маҳалла ва маҳаллалардаги ёшлар етакчилари, ҳоким ёрдамчилари, хотин-қизлар фаоллари ҳамда профилактика инспекторларининг ўрни ҳақида сўз юритди. Шунингдек, “Обод ва хавфсиз маҳалла” тамойили асосида ишлашни ташкил қилиш ва уни амалга ошириш механизмлари ҳақида маълумот берилди.

Бунда аввало, ижтимоий профилактика объекти бўлган шахслар тоифасига бандлиги таъминланмаган, меҳнатга лаёқатли ва доимий даромад манбаига эга бўлмаганлар, алкоголь, қимор, таваккалчиликка ружу қўйган ёшлар, низоли оилалар ҳамда бошқа салбий иллатларга эга бўлган шахслар киритилиши айтиб ўтилди.

Эндиликда мана шундай фуқароларни барвақт аниқлаш ва уларнинг жиноят ёки ҳуқуқбузарлик содир этишига йўл қўймаслик мақсадида профилактика инспектори аҳолини “хонадонбай” ва “фуқаробай” ўрганиши зарурлиги таъкидланди.

Маҳалла раислари ва хотин-қизлар фаоллари ўз маҳалласидаги низоли оилалар билан мунтазам равишда мулоқотни йўлга қўйиши, уларни яраштиришга эришиши лозимлиги ҳам қайд этиб ўтилди.

Таъкидланганидек, ҳоким ёрдамчиси бандлиги таъминланмаган аҳолининг иш билан банд бўлишига, доимий даромад манбаига эга бўлишига кўмаклашиши зарур. Ёшлар этакчиси эса, ёшлар билан тизимли равишда ишлашиши, уларнинг бўш вақтини мазмунли ўтказиб, ҳар хил қимор ўйинлари ва алкоголь маҳсулотларига ружу қўйишининг олдини олиши зарур.

Қорақалпоғистон Республикасида янгидан татбиқ қилинаётган ҳуқуқбузарликлар профилактикаси ва жиноятчиликка қарши курашиш, ички ишлар органларининг, фуқароларнинг ўзини ўзи бошқариш органлари ва фуқаролик жамиятининг бошқа институтлари билан ўзаро ҳамкорлик тўғрисида имзоланган “Маҳаллаларда хавфсиз муҳитни яратиш механизмларини белгилаш тўғрисида”ги қўшма қарори ўйлаймизки, маҳаллалар ободлиги ва осудалиги, фуқаролар хавфсизлигини таъминлашда муҳим омил бўлиб хизмат қилади.

Туман ҳокимлигининг Ахборот хизмати.