36-SONLI MAKTAB OʻQITUVChISI AZIMBOY SAFARBOYeV “XALQ TAʼLIMI FIDOYISI” KOʻKRAK NIShONI BILAN TAQDIRLANDI

Taʼlim sohasida salkam 35-yildan beri faoliyat koʻrsatib kelayotgan malakali pedagog, tajribali matematika oʻqituvchisi Azimboy Safarboyev taʼlim jarayoniga innovatsion texnologiyalarni tatbiq etib, yoshlarning intellektual salohiyatini oshirib kelmoqda. Yaqinda mahoratli ustoz soha rivojiga qoʻshgan munosib hissasi uchun “Xalq taʼlimi fidoyisi” koʻkrak nishoni bilan taqdirlandi.

Ustoz oʻtgan yillar davomida tumanimizdagi bir necha umumtaʼlim maktablari hamda sobiq Amudaryo Qishloq xoʻjaligi kasb-hunar kollejida matematika fanidan dars berib, koʻplab shogirdlar yetishtirdi. Ayni paytda undan taʼlim olgan yoshlar turli sohalarda faoliyat koʻrsatib, jamiyat rivojiga munosib hissalarini qoʻshishmoqda.

Azimboy Safarboyev 1965-yilda Amudaryo tumanida ziyoli, yaʼni oʻqituvchilar oilasida tugʻilib, voyaga yetgan. Oʻrta maktabni tugatganidan soʻng, 1982-89-yillarda Toshkent Davlat universiteti, hozirgi Oʻzbekiston Milliy universitetining matematika fakultetida taʼlim olgan. Sohadagi faoliyatini 1988-yilda Toshkent shahar 157-sonli maktabining matematika fani oʻqituvchisi boʻlib ishlashdan boshlagan. 1989-yilda Amudaryo tumaniga qaytib kelib, ishni 15-sonli maktabda davom ettirgan. Ustoz hozirgi kunda 36-sonli maktabda matematika fanidan dars berish bilan birga oʻzi tashkil etgan “Yosh matematiklar” toʻgaragida qiziquvchi yoshlarga fan sirlarini oʻrgatib, iqtidorlarini yuzaga chiqarishlariga koʻmaklashib kelayotgani natijasida ular turli yutuqlarga erishishmoqda.

Mahoratli pedagogning oʻquvchilari umumtaʼlim fanlari olimpiadasining Qoraqalpogʻiston bosqichida, jahon olimpiadalarida muvaffaqiyatli qatnashib kelishmoqda. Undan taʼlim olgan koʻplab iqtidorli oʻquvchi-yoshlar har oʻquv yilida yurtimizdagi va xorijdagi turli nufuzli oliy taʼlim muassasalari talabalari boʻlishmoqda.

Azimboy Safarboyev 2015-yilda Oʻqituvchilar bayrami arafasida “Oʻzbekiston oʻrta maxsus kasb-hunar taʼlimi aʼlochisi”, 2016-yilda “Oʻzbekiston Respublikasi Mustaqilligiga 25-yil” koʻkrak nishonlari bilan taqdirlangan.

Oʻz ustida muntazam ravishda ishlab kelayotgan fidoyi oʻqituvchi ilmiy-uslubiy izlanishlari asosida 2010-2014-yillarda oʻz muallifligida yaratgan «Zamonaviy darsni tashkil etish metodikasi», «Trigonometrik tenglama va tengsizliklar sistemalari», «Logarifmik tenglamalarni yechishning qulay usullari», «Abituriyent uchun matematikadan test savollari», «Kvadrat funktsiyalar grafigi», «Oʻquvchilarda mantiqiy fikrlashda matematika fanining oʻrni» kabi 12 dan ortiq oʻquv-metodik qoʻllanmalari taʼlim jarayoniga tadbiq etilgan. Shuningdek, u yaratgan «Matematikadan olimpiada masalalari» mavzusidagi elektron dars ishlanmasi, 150 dan ortiq koʻrgazmali vositalari, murakkab mavzularni oʻqitish boʻyicha elektron slayd va plakatlardan dars mashgʻulotlarida samarali foydalanilmoqda.

Fidoyi va jonkuyar oʻqituvchi taʼlim muassasasi va mahallada oʻtkaziladigan tadbirlarda ham faol qatnashib, mamlakatimizning taʼlim tizimida amalga oshirilayotgan islohotlar va ularning samaralarini targʻib qilib kelmoqda. Azimboy Safarboyev izlanuvchan pedagog, jonkuyar va kamtar inson sifatida hamkasblari va mahalladoshlari oʻrtasida ham hurmat qozongan.

Biz Azimboy Safarbovning kelgusidagi ishlarida muvaffaqiyat tilab qolamiz.

Ozoda Xudoyberganova, 36-sonli maktabning ijodiy-madaniy masalalar boʻyicha targʻibotchisi.