MUBORAK RAMAZON KUNLARIDA OVUL VA MAHALLALARDA ROʻZADORLAR UChUN IFTORLIK DASTURXONI YoZILMOQDA

Shu kunlarda yurtdoshlarimiz Ramazon oyining roʻzasini tinchlik-osoyishtalik, bagʻri butunlikda ado etishmoqda. Bu muqaddas oyda imon-eʼtiqod bilan qilinadigan duolar mustajob boʻladi. Ushbu muborak kunlarda Alloh taolo bandalariga osmon eshiklarini ochib, duolarni qabul qiladi.

Xalqimiz uchun ezgulik, mehr-muruvvat, saxovat, olijanoblik va shukronalik timsoli boʻlgan, yuksak insonparvarlik tamoyillarini oʻzida mujassam etgan shunday fazilatli kunlarda Jumurtov shaharchasidagi “Qasr” toʻyxonasida shaharcha va Bobur nomli ovul aholisi uchun iftorlik dasturxoni yozildi. Unda hududda yashovchi roʻzador nuroniylar, mahalla faollari, mehnat faxriylari, imomlar ishtirok etdi.

25-mart kuni Prezidentimiz tashabbusiga koʻra tashkil etilgan ushbu marosimda tuman hokimi oʻrinbosari Mahmud Shermetov, Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyevlar ham qatnashishdi.

Iftorlikda tuman bosh imom-xatibi Abdurahmon Matsapoyev insoniylik, maʼnaviy poklik, shukronalik fazilatlari, muqaddas dinimiz arkonlarini eʼzozlash, tinchlikdek ulugʻ neʼmat qadriga yetish kerakligi xususida soʻzladi. Shuningdek, bosh imom-xatib oʻz soʻzida bunday muborak kunlarda roʻza tutishlik har bir musulmon uchun juda katta imtihon hisoblanishini, roʻza tutgan musulmon uchun xos mukofot berilishini va Ramazon oyida qilingan har bir solih amalning ajri bir necha barobar koʻpaytirib berilishini aytib oʻtdi.

Iftorlik dasturxoni atrofida Qurʼon tilovati qilinib, Qadr kechasining fazilati, Ramazon hayiti, hayit odoblari haqida ham maʼruzalar qilindi

Jumurtov shaharchasidagi “Qasr” toʻyxonasida iftorlikda ishtirok etgan roʻzadorlar yurtimizga tinchlik-osoyishtalik, dehqonlarimiz yetishtirayotgan mahsulotlar hosiliga baraka tilab, duolar qilishdi.

26-mart kuni Mangʻit shahridagi “Istiqlol” toʻyxonasida ham Navoiy nomli va Boʻston mahallalarida yashovchi roʻzadorlar uchun iftorlik marosimi oʻtkazildi. Oʻzbekiston Respublikasi Prezidenti tashabbusi bilan tashkil etilgan ushbu ehson tadbirida tuman hokimi oʻrinbosari Mahmud Shermetov, Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyevlar qatnashishdi.

Iftorlik dasturxoni nozu-neʼmatlar bilan toʻldirildi. Milliy taom — osh damlanib, yigʻilganlarga tortiq qilindi.

Soʻzga chiqqanlar muqaddas mohi Ramazon kunlarida muhtojlarga mehr-oqibat, xayr-saxovat koʻrsatish xalqimizga xos fazilat ekanligini taʼkidladilar. Muborak oy davomida miskinlar holidan xabar olish, ehtiyojmandlarga xayr-ehsonlar berish savobli amallardan sanaladi. Zero, Ramazon insonlarni oʻzaro mehr-oqibatli boʻlishga, keksalar va bemorlar, yaqinlar holidan xabar olishga, muhtojlarga saxovat qilishga chaqiradi.

Ehson dasturxoniga toʻplanganlar iftorlikda tuman bosh imom-xatibi Abdurahmon Matsapoyevning Ramazoni sharif shukuhi, ushbu oyning fazilatlari haqidagi maʼruzalarini tinglashdi. Shuningdek, Qurʼon oyatlari oʻqilib, Oʻzbekiston zaminida el farovonligi yoʻlida xizmat qilib oʻtganlar haqiga, yurtimiz tinch, osmonimiz musaffo boʻlishini, xonadonlarimizda hamisha tinchlik hukm surishini, moʻl va barakali rizq tilab, duolar qilindi.

Xayr-ehson qilish maqsadida ovul va mahallalarda tashkil etilgan iftorlik tadbirlari oʻzgacha ruhda koʻtarinki kayfiyatda oʻtdi.

O.Xudoyberganova.