МУБОРАК РАМАЗОН КУНЛАРИДА ОВУЛ ВА МАҲАЛЛАЛАРДА РЎЗАДОРЛАР УЧУН ИФТОРЛИК ДАСТУРХОНИ ЁЗИЛМОҚДА

Шу кунларда юртдошларимиз Рамазон ойининг рўзасини тинчлик-осойишталик, бағри бутунликда адо этишмоқда. Бу муқаддас ойда имон-эътиқод билан қилинадиган дуолар мустажоб бўлади. Ушбу муборак кунларда Аллоҳ таоло бандаларига осмон эшикларини очиб, дуоларни қабул қилади.

Халқимиз учун эзгулик, меҳр-мурувват, саховат, олижаноблик ва шукроналик тимсоли бўлган, юксак инсонпарварлик тамойилларини ўзида мужассам этган шундай фазилатли кунларда Жумуртов шаҳарчасидаги “Қаср” тўйхонасида шаҳарча ва Бобур номли овул аҳолиси учун ифторлик дастурхони ёзилди. Унда ҳудудда яшовчи рўзадор нуронийлар, маҳалла фаоллари, меҳнат фахрийлари, имомлар иштирок этди.

25 март куни Президентимиз ташаббусига кўра ташкил этилган ушбу маросимда туман ҳокими ўринбосари Маҳмуд Шерметов, Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоевлар ҳам қатнашишди.

Ифторликда туман бош имом-хатиби Абдураҳмон Матсапоев инсонийлик, маънавий поклик, шукроналик фазилатлари, муқаддас динимиз арконларини эъзозлаш, тинчликдек улуғ неъмат қадрига етиш кераклиги хусусида сўзлади. Шунингдек, бош имом-хатиб ўз сўзида бундай муборак кунларда рўза тутишлик ҳар бир мусулмон учун жуда катта имтиҳон ҳисобланишини, рўза тутган мусулмон учун хос мукофот берилишини ва Рамазон ойида қилинган ҳар бир солиҳ амалнинг ажри бир неча баробар кўпайтириб берилишини айтиб ўтди.

Ифторлик дастурхони атрофида Қуръон тиловати қилиниб, Қадр кечасининг фазилати, Рамазон ҳайити, ҳайит одоблари ҳақида ҳам маърузалар қилинди

Жумуртов шаҳарчасидаги “Қаср” тўйхонасида ифторликда иштирок этган рўзадорлар юртимизга тинчлик-осойишталик, деҳқонларимиз етиштираётган маҳсулотлар ҳосилига барака тилаб, дуолар қилишди.

26 март куни Манғит шаҳридаги “Истиқлол” тўйхонасида ҳам Навоий номли ва Бўстон маҳаллаларида яшовчи рўзадорлар учун ифторлик маросими ўтказилди. Ўзбекистон Республикаси Президенти ташаббуси билан ташкил этилган ушбу эҳсон тадбирида туман ҳокими ўринбосари Маҳмуд Шерметов, Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоевлар қатнашишди.

Ифторлик дастурхони нозу-неъматлар билан тўлдирилди. Миллий таом — ош дамланиб, йиғилганларга тортиқ қилинди.

Сўзга чиққанлар муқаддас моҳи Рамазон кунларида муҳтожларга меҳр-оқибат, хайр-саховат кўрсатиш халқимизга хос фазилат эканлигини таъкидладилар. Муборак ой давомида мискинлар ҳолидан хабар олиш, эҳтиёжмандларга хайр-эҳсонлар бериш савобли амаллардан саналади. Зеро, Рамазон инсонларни ўзаро меҳр-оқибатли бўлишга, кексалар ва беморлар, яқинлар ҳолидан хабар олишга, муҳтожларга саховат қилишга чақиради.

Эҳсон дастурхонига тўпланганлар ифторликда туман бош имом-хатиби Абдураҳмон Матсапоевнинг Рамазони шариф шукуҳи, ушбу ойнинг фазилатлари ҳақидаги маърузаларини тинглашди. Шунингдек, Қуръон оятлари ўқилиб, Ўзбекистон заминида эл фаровонлиги йўлида хизмат қилиб ўтганлар ҳақига, юртимиз тинч, осмонимиз мусаффо бўлишини, хонадонларимизда ҳамиша тинчлик ҳукм суришини, мўл ва баракали ризқ тилаб, дуолар қилинди.

Хайр-эҳсон қилиш мақсадида овул ва маҳаллаларда ташкил этилган ифторлик тадбирлари ўзгача руҳда кўтаринки кайфиятда ўтди.

О.Худойберганова.