OʻRIK GULI

Shoʻx-shodon qiz Layloning boshiga musibat tushdi. Ogʻir kasallik asta-sekin uni holdan toydirib, toʻshakka mixlab qoʻydi. Mana bir yil oʻtdi hamki, uning dardiga davo topilmadi.

Uning holidan xabar olib, tez-tez kelib turadigan dugonalari ham soʻnggi kunlarda kelmaydigan boʻlishdi. Bu holdan Layloning dardi battar ogʻirlashdi. Aslida dugonalarini ham ayblab boʻlmasdi. Sogʻ-salomat yurgan dugonalarini koʻrib Layloning kayfiyati buzilardi, yugurib-oʻynab yurgan kezlarini qoʻmsab, koʻziga yosh kelardi. Dugonalari uni yupatishga soʻz topolmasdi.

U oʻtgan yili bahorda kasallikka chalingan edi. Laylo ogʻir xayollar girdobida, tushkun ahvolda qoldi, umidsizlikka berila boshladi. “Bahor oʻtdi, yoz oʻtdi, kuz keldi, qish oʻtdi, yana bahor keldi, men haliyam yotibman...” maʼyus oʻyga choʻmardi Laylo.

U necha-necha shifokorlarning, tabiblarning maslahatlariga asosan davolanib koʻrdi, ota-onasi ulkan umidlar bilan uni juda koʻp shifokorlarga olib borishdi, afsus foydasi boʻlmadi.

Shunday kunlarning birida Laylo tabib momoning aytgan gaplarini eslab qoldi. Oʻsha tabib momo hovlingdagi oʻrik gullaganda yaxshi boʻlib ketasan, degan edi.

Layloning yuragi hapqirib ketdi. Onasini chaqirib, oʻrik gulladimi, deb soʻradi koʻzlari yonib. Qizidagi bu oʻzgarishdan  hayratga tushgan ona hovliga otildi. Biroq oʻrik gullamagan edi.

Shu-shu boʻldi-yu, Laylo har kuni onasidan oʻrik guli haqida  soʻray boshladi. Ona bechora "ana-mana" deb qizini ovutishdan charchamasdi.

Shu zaylda kunlar oʻtaverdi. Bir kuni ertalab qizidan xabar olgani kirgan onasi Layloning jonsiz yotganini koʻrib hushidan ketib yiqildi...

Maʼraka oʻtdi. Barcha oʻz tashvishi, ishi bilan boʻlib ketdi. Layloning xonasini yigʻlab-yigʻlab yigʻishtirayotgan onasi hovlidagi oʻrikning oppoq boʻlib gullaganini koʻrib, qotib qoldi.

– Eh, bahorjon, – alam bilan shivirladi ona, – oʻrik gulingni buncha qizgʻonding. Bir hafta oldin gullaganingda, balki qizim...

Ona oʻrik guliga qarab birpas termulib turdi-da, derazani asta yopdi.

Shoira GULMONOVA, 87-maktab oʻquvchisi.