OʻQIShNI OʻRGANGAN BOLAJONLAR

Tumanimizdagi 55-sonli umumtaʼlim maktabining 1A-, 1B-, 1V-sinflari oʻquvchilari uchun yangi yil qoʻshaloq bayramga aylanib ketdi. Bayram kunlari ular ahillikda "Savodxonlik bayrami”ni Qorbobo va Qorqiz hamrohligida, yashil archa atrofida oʻtkazishdi.

Ular oʻz bilimlarini ota-onalari, ustozlari oldida ilk bora namoyish etdilar. Yangi yil haqida sheʼrlar aytib, biri-biridan chiroyli nafis raqslar ijro etishdi. Ota-onalar farzandlari bilan birgalikda davrada raqsga tushdilar, ustozlariga tashakkur aytdilar. "Savodxonlik bayrami”da maʼnaviyat va maʼrifat masalalari boʻyicha direktor oʻrinbosari Nurbek Oʻrozboyev jajji oʻquvchilarga oʻz samimiy tilaklarini bildirdi.

1A-sinf oʻqituvchisi Gulchehra Qodirova, 1B-sinf oʻqituvchisi Nilufar Xudoyberganova, 1V-sinf ustozi Muqaddas Davlatboyevalarning saʼy-harakatlari bilan Yangi yil kechasi serfayz oʻtdi.

Bolajonlar ustozlari va ota-onalari oldida turli harflar qiyofasida sheʼrlar oʻqishdi. "Alifbe”ni oʻrganib olganliklarini oʻqigan sheʼrlari orqali ifodaladilar va "Alifbe” kitobi bilan xayrlashdilar.

Sahnaga "Oʻqish kitobi” taklif qilindi.

Bolajonlarimiz "Oʻqish kitobi”ni qunt bilan oʻrganishga ota-onalari oldida soʻz berdilar. "Laylak qor”, "Shoʻx bola”, "Vatan”, "Ona”, "Alla” kabi qoʻshiqlarni maroq bilan ijro etishib, "Oʻqish kitobi”ga hamroh boʻldilar.

"Savodxonlik bayrami” Yangi yil bayramiga ulanib ketdi. Davraga Qorbobo va Qorqiz tashrif buyurib, bolalarga sovgʻa-salomlar ulashdilar.

Zuhra AHMEDOVA, gazetaning jamoatchi muxbiri.