FIDOYI USTOZ

Maktab ostonasiga ilk qadam qoʻygan oʻgʻil-qiz boshlangʻich taʼlim-tarbiya olishdan tortib, oliy maʼlumotli mutaxassis boʻlib yetishigacha boʻlgan davrda ustozlaridan saboq olib, bilim asoslarini, kasb mahoratini egallaydi.

B

uningdek sharafli vazifani oʻz zimmasiga olib, bor kuch-gʻayratini, salohiyatini kasbiga baxshida etayotgan muallimlarning biri – tumanimizdagi 10-sonli maktabning ona tili va adabiyot fani oʻqituvchisi Rayhon Polvonovadir.

U Boʻzyop ovulida, oʻqituvchilar oilasida dunyoga keldi. Bir umr 10-sonli maktabda oʻqituvchilik qilib, ovul bolalariga ilm-maʼrifat ulashgan ota-onasi Ismoil Polvonov, Xadicha Sultonovalarga havas qilib, Rayhon oʻqituvchilik kasbini tanladi. Maktabdagi dars jarayonlari, ayniqsa oʻquvchilar haqida suhbatlashganlarida ularning yuzlari yorishib, soʻzlarida oʻzgacha mehr tafti sezilib turardi. Shundanmi, oiladagi sakkiz nafar farzandning uch nafari ota-ona kasbini tanlashdi.

Rayhon 1998-yil NDPIni tugatib, oʻqituvchilik faoliyatini 2-sonli maktabda boshladi. 2000-yildan to shu kungacha 10-sonli maktabda ona tili va adabiyot fani oʻqituvchisi boʻlib ishlab kelayapti. 25-yil davomida undan taʼlim olgan ovulning qancha-qancha yoshlari turli sohalarning yetuk mutaxassislari boʻlib yetishdi.

Rayhon Polvonova qoʻlga kiritgan yutuqlar, u zabt etgan choʻqqilar talaygina. Birgina 2020-2021 oʻquv yilida uning Qoraqalpogʻiston Xalq taʼlimi xodimlarini qayta tayyorlash va malakasini oshirish hududiy markazida oʻzbek tilini oʻqitish metodikasida “Sifat” mavzusidagi ochiq dars ishlanmasi ommalashtirildi. 2021-2022 oʻquv yilida “Yilning eng yaxshi oʻzbek tili fani oʻqituvchisi” koʻrik-tanlovining tuman bosqichi gʻolibi boʻldi, Qoraqalpogʻiston bosqichida esa faxrli 3-oʻrinni egalladi. 2022-yilda “Yil ayoli” koʻrik-talovida tuman gʻolibi,  respublika bosqichining faol ishtirokchisi boʻldi. Shu yili “Qishloq hududidagi eng namunali oʻqituvchi” tanlovida tumanda 2-oʻrinni egalladi.

Fidoyi mehnatlari evaziga “Qoraqalpogʻiston Xalq taʼlimi aʼlochisi” koʻkrak nishoni, “Oʻzbekiston Konstitutsiyasining 30-yilligi” esdalik nishoni sohibasi boʻldi.

Oʻqituvchilik mashaqqatli, ammo sharafli kasb. Rayhon turmush oʻrtogʻi Rashid Davlatboyev bilan oila qoʻrgʻonida ungan nihollar – ikki oʻgʻil, ikki qizni ham intiluvchan, ilmli, odobli qilib voyaga yetkazishmoqda. Katta farzandlari Jaloliddin va Rufat oliygohlar talabasi, Sarvinoz, Sevaralar esa 10-sonli maktab oʻquvchilari.

Baʼzan oʻqituvchilarning fan asoslarini chuqur oʻrgatish uchun kuyunishlari, nega oʻqimading, deya tergashlari oʻquvchilarga ogʻir botadi. Biroq yillar oʻtgani sayin hayotning turli pillapoyalarida ular oʻrgatgan ilm qadrini anglab, ustozlariga koʻnglida hurmat bilan yashaydi odam. Shu bois, ustozlarimizni otamizday, onamizday ulugʻ sanaymiz.

Oygul RAJABOVA.