SUVNI TEJAYDIGAN TEXNOLOGIYaLARNING AHAMIYaTINI TARGʻIB ETIShGA BAGʻIShLANGAN SEMINAR BOʻLIB OʻTDI

Keyingi yillarda respublikamizda sugʻoriladigan maydonlardan yuqori  hosil olish, mahsulot sifatini oshirishga ulkan eʼtibor qaratilmoqda va ushbu maqsad yoʻlida dehqonchilikka yangi-yangi innovatsion texnologiyalar joriy etilmoqda.

Suv tejovchi texnologiyalardan foydalanish shularning biridir. 2021-yilda Amudaryo tumanining 3800 gektar ekin maydoni, shundan 3730 gektarida tomchilatib, 30 gektarida yomgʻirlatib, 40 gektarida diskret sugʻorish texnologiyasi joriy etildi. 2022-yilda esa jami 2630 gektar ekin maydonidagi ekinlar suv tejovchi texnologiyalar yordamida sugʻorildi va yuqori hosil yetishtirildi. Suv taqchilligi hosildorlikka sezilarli salbiy taʼsir koʻrsatayotgan bir vaqtda dehqonchilikda suv tejaydigan texnologiyalarni joriy etish ekinlar hosildorligining oshishiga, kam suv sarf qilgan holda tuproq unumdorligi  yaxshilanishiga olib kelishini  dehqonlar, qishloq xoʻjaligi mutaxassislari oʻz tajribalarida koʻrishdi. 2022-yilda suv tejovchi texnologiyalar joriy etilgan tumanimiz ekin maydonlarining ayrimlariga kredit mablagʻi sarflangan boʻlsa, ayrimlari - paxtachilik klasteri, fermer xoʻjaliklarining oʻz mablagʻi hisobidan amalga oshirildi.

9-mart kuni Toʻlqin ovulidagi “Amu sohili” fermer xoʻjaligi ekin dalasida suv tejovchi texnologiyalarni joriy qilishning ahamiyatini targʻib etishga bagʻishlangan seminar boʻlib oʻtdi.

Tadbirda Oʻzbekiston Respublikasi suv xoʻjaligining suvni tejaydigan ilmiy va innovatsion texnologiyalarni joriy qilish boshqarmasi boshligʻi Begzod Xolmurodjonov, Qoraqalpogʻiston Respublikasi  nasos stantsiyalari va energetika boshqarmasi boshligʻi oʻrinbosari Niyatboy Orolboyev, tuman Qishloq xoʻjaligi, irrigatsiya boʻlimlari boshliqlari, mutaxassislari, klaster korxonasi agronomlari, fermer xoʻjaliklari raislari ishtirok etdilar.

Seminarda Begzodjon Xolmurodov, Niyatboy Orolboyevlar dehqonchilikda suv tejaydigan texnologiyalardan foydalanishning ahamiyati xususida, tuman Irrigatsiya boʻlimi boshligʻi Ergash Yoʻldoshev oʻtgan yillarda tumanimiz ekin maydonlarida suv tejovchi texnologiyalarning joriy etilishi, ushbu yerlardagi mahsulot yetishtirish koʻrsatkichlari haqida, bu boradagi kelgusi rejalar haqida maʼruza qildi.

Shuni alohida eʼtirof etish lozimki, joriy yil dehqonchiligida ham ekinlarni sugʻorishda innovatsion texnologiyalardan keng foydalanish rejalashtirilmoqda. Yaʼni 3240 gektar ekin maydonida, shundan 1900 gektar paxta, 175 gektar bogʻ, 200 gektar uzum, 600 gektar boshqa ekinlar tomchilatib, 190 gektar gʻalla, 10 gektar sabzavot, 15 gektar ozuqabop ekinlar yomgʻirlatib, 150 gektar yer diskretli hamda 800 gektar yer egiluvchan quvurlar orqali sugʻoriladi. Hozirgi kunda 28 ta fermer xoʻjaligining jami 198 gektar ekin maydonlariga suv tejovchi texnologiyalarning qurilish-montaj ishlari olib borilmoqda.

Suv tejaydigan texnologiyalardan foydalanish – mahsulot yetishtirishning koʻpayishiga, elimiz dasturxoni toʻkin-sochin boʻlishiga xizmat qiladi.

Oygul RAJABOVA.