СУВНИ ТЕЖАЙДИГАН ТЕХНОЛОГИЯЛАРНИНГ АҲАМИЯТИНИ ТАРҒИБ ЭТИШГА БАҒИШЛАНГАН СЕМИНАР БЎЛИБ ЎТДИ

Кейинги йилларда республикамизда суғориладиган майдонлардан юқори  ҳосил олиш, маҳсулот сифатини оширишга улкан эътибор қаратилмоқда ва ушбу мақсад йўлида деҳқончиликка янги-янги инновацион технологиялар жорий этилмоқда.

Сув тежовчи технологиялардан фойдаланиш шуларнинг биридир. 2021 йилда Амударё туманининг 3800 гектар экин майдони, шундан 3730 гектарида томчилатиб, 30 гектарида ёмғирлатиб, 40 гектарида дискрет суғориш технологияси жорий этилди. 2022 йилда эса жами 2630 гектар экин майдонидаги экинлар сув тежовчи технологиялар ёрдамида суғорилди ва юқори ҳосил етиштирилди. Сув тақчиллиги ҳосилдорликка сезиларли салбий таъсир кўрсатаётган бир вақтда деҳқончиликда сув тежайдиган технологияларни жорий этиш экинлар ҳосилдорлигининг ошишига, кам сув сарф қилган ҳолда тупроқ унумдорлиги  яхшиланишига олиб келишини  деҳқонлар, қишлоқ хўжалиги мутахассислари ўз тажрибаларида кўришди. 2022 йилда сув тежовчи технологиялар жорий этилган туманимиз экин майдонларининг айримларига кредит маблағи сарфланган бўлса, айримлари - пахтачилик кластери, фермер хўжаликларининг ўз маблағи ҳисобидан амалга оширилди.

9 март куни Тўлқин овулидаги “Аму соҳили” фермер хўжалиги экин даласида сув тежовчи технологияларни жорий қилишнинг аҳамиятини тарғиб этишга бағишланган семинар бўлиб ўтди.

Тадбирда Ўзбекистон Республикаси сув хўжалигининг сувни тежайдиган илмий ва инновацион технологияларни жорий қилиш бошқармаси бошлиғи Бегзод Холмуроджонов, Қорақалпоғистон Республикаси  насос станциялари ва энергетика бошқармаси бошлиғи ўринбосари Ниятбой Оролбоев, туман Қишлоқ хўжалиги, ирригация бўлимлари бошлиқлари, мутахассислари, кластер корхонаси агрономлари, фермер хўжаликлари раислари иштирок этдилар.

Семинарда Бегзоджон Холмуродов, Ниятбой Оролбоевлар деҳқончиликда сув тежайдиган технологиялардан фойдаланишнинг аҳамияти хусусида, туман Ирригация бўлими бошлиғи Эргаш Йўлдошев ўтган йилларда туманимиз экин майдонларида сув тежовчи технологияларнинг жорий этилиши, ушбу ерлардаги маҳсулот етиштириш кўрсаткичлари ҳақида, бу борадаги келгуси режалар ҳақида маъруза қилди.

Шуни алоҳида эътироф этиш лозимки, жорий йил деҳқончилигида ҳам экинларни суғоришда инновацион технологиялардан кенг фойдаланиш режалаштирилмоқда. Яъни 3240 гектар экин майдонида, шундан 1900 гектар пахта, 175 гектар боғ, 200 гектар узум, 600 гектар бошқа экинлар томчилатиб, 190 гектар ғалла, 10 гектар сабзавот, 15 гектар озуқабоп экинлар ёмғирлатиб, 150 гектар ер дискретли ҳамда 800 гектар ер эгилувчан қувурлар орқали суғорилади. Ҳозирги кунда 28 та фермер хўжалигининг жами 198 гектар экин майдонларига сув тежовчи технологияларнинг қурилиш-монтаж ишлари олиб борилмоқда.

Сув тежайдиган технологиялардан фойдаланиш – маҳсулот етиштиришнинг кўпайишига, элимиз дастурхони тўкин-сочин бўлишига хизмат қилади.

Ойгул РАЖАБОВА.