FARZANDINGIZ GIYoHVANDGA AYLANMASIN

"Qora ogʻu” domiga tushib, yoʻldan adashganlar avvaliga ajal urugʻi ortidan ruhan ergashadi, bora-bora bir onlik "rohat” bagʻishlovchi moddani qayta-qayta isteʼmol qilish istagini boshqara olmay qoladilar. Bu - achinarli hol. Biroq, biz achinish bilan ularni bu botqoqdan qutqara olmaymiz. Iroda bilan kurashishga undash lozim ularni. Oldini olish esa oʻz qoʻlimizda!

Bu zahri qotilni isteʼmol qilganlar oʻz ruhiyati va sogʻligiga oʻzi tahdid qilayotganini unutib qoʻyadi. Giyohvand moddalarni qabul qilishni boshlagan (ayniqsa inʼektsiya yoʻli bilan) har qaysi odam vaqt oʻtgani sari shubhasiz, tanazzulga yuz tutib boradi. Oʻzini nazorat qila olmaydi, behafsala, hayotga befarq boʻlib qoladi, har xil kasalliklarga chalinadi, shuningdek bedavo dard – OITS kasalligi ham bundan istisno emas. Shuning uchun bugungi kunda OITSning oldini olish chora-tadbirlari asosan giyohvandlar oʻrtasida kuchaytirilmoqda.

Bizning Qoraqalpogʻiston Respublikasi OITSga qarshi kurash markazimizda, shahar va tumanlardagi Tibbiyot birlashmalarida 17 ta "Ishonch xonalari” faoliyat koʻrsatmoqda. Ular Respublika OITSga qarshi kurash markazi va xalqaro Global fond tomonidan har taraflama toʻla taʼminlangan.

Bu "Ishonch xonalari” Oʻzbekiston Respublikasi Sogʻlikni saqlash Vazirligining 2011-yil 1 avgustdagi 232-sonli buyrugʻiga asosan faoliyat koʻrsatadi. Asosiy vazifasi - OIV va OITS kasalligining oldini olishdir. Shu maqsadda bepul va anonim turda, yaʼni shaxsni isbotlovchi hujjatsiz xizmat koʻrsatiladi va OIVga tahlil bepul qilinadi. Tashrif buyuruvchilarga OIV va OITS haqida, kasallikning yuqish yoʻllari, klinik belgilari, diagnostikasi, davolash va oldini olish choralari toʻgʻrisida maslahatlar, davolanish uchun zarur tibbiyot vositalari bepul beriladi, zarur vaziyatlarda tor doiradagi mutaxassislarga (narkolog, infektsionist, ftiziatr, terapevt va hokazo)  bepul maslahatlar olishga joʻnatiladi.

Hayotda hamma narsa boʻlishi mumkin. Baxt ham, kulfat ham inson kutmaganida roʻy beradi. Asosiysi, kishi tafakkuri va ongida bu nobop odatlarga qarshi immunitet shakllanishi kerak. Unutmang, bu yoʻl xato va uning oqibatlari nafaqat sizning, balki atrofingizdagilarning ham umrini zaharlaydi.